ചീരയില കൊണ്ട് അടിപൊളി ഒഴിച്ച് കൂട്ടാൻ; കൊങ്കിണി സ്റ്റൈലിൽ 'ഭജ്ജി അംശേ'
ഇലക്കറികള്‍ രുചിക്കപ്പുറം ആരോഗ്യത്തിനും കൂടെ ചേര്‍ന്നാണ് നമ്മള്‍ നമ്മുടെ ആഹാരക്രമത്തില്‍ ഉള്‍പ്പെടുത്തുന്നത്. ഇലക്കറികളില്‍ വ്യത്യസ്തത കൊണ്ടുവന്നാല്‍, എന്നും കഴിക്കുമ്പോഴുള്ള മടുപ്പ് ഒഴിവാക്കാം. അത്തരം ഒരു ചീരക്കറി ആണിന്നു പരിചയപ്പെടുത്തുന്ന ഈ കൊങ്കണി വിഭവം.
'ഭജ്ജി അംശേ ' എന്നാണിതിന് കൊങ്കണിയില്‍ വിളിക്കുക.ഭജ്ജി എന്നാല്‍ ചീര. അംശേ എന്ന് വെച്ചാല്‍ പുളി രുചി. പേരില്‍ പറഞ്ഞ പോലെ അല്പം പുളി മുന്നിട്ട് നില്‍ക്കുന്ന ചീര കൊണ്ടുള്ള ഒഴിച്ച് കൂട്ടാനാണിത്. സ്ഥിരം ചീര തോരനും പച്ചടിയിലും നിന്നുമൊക്കെ ഇടക്ക് ഒരു മാറ്റം ആവാം ഈ കറിയിലൂടെ.
ആവശ്യമുള്ള സാധനങ്ങൾ
- ചീര - രണ്ട് കുഞ്ഞ് കെട്ട്
- തേങ്ങാ -1 കപ്പ്
- വറ്റല്‍മുളക് - 8-10
- വാളന്‍പുളി - ഒരു നെല്ലിക്ക വലുപ്പത്തില്‍
- വെളുത്തുള്ളി അല്ലികള്‍ - 8-10
- വെളിച്ചെണ്ണ - 2 ടീസ്പൂണ്‍
- ഉപ്പ് - ആവശ്യത്തിന്
തയ്യാറാക്കുന്ന വിധം
ചീര ചെറുതായി അരിഞ്ഞു ആവശ്യത്തിന് ഉപ്പ് ചേര്‍ത്ത് വെള്ളമൊഴിച്ചു വേവിയ്ക്കുക. വറ്റല്‍മുളക് അല്പം എണ്ണയില്‍ ചുവക്കെ വറുക്കുക. ഈ വറുത്ത മുളകും തേങ്ങയും പുളിയും കൂടെ നന്നായി അരയ്ക്കുക. ചീര മുക്കാല്‍ വേവാകുമ്പോള്‍ ഈ അരപ്പു ചേര്‍ത്തിളക്കി തിളപ്പിക്കുക. ഒഴിച്ചു കറിയാണെങ്കിലും, അയവ് തീരെ നേര്‍ത്തു പോവരുത്.ഒരിത്തിരി കട്ടിയായി തന്നേ വേണം. നന്നായി തിളച്ചു വരുമ്പോള്‍ വാങ്ങി വെയ്ക്കാം.
ഇനി വെളുത്തുള്ളി അല്ലികള്‍ ( തൊലി നീക്കി മുഴുവനോടെ ) എണ്ണ യില്‍ ചുവക്കെ വറുക്കുക. ഇത് കറിയുടെ മീതെ താളിച്ചൊഴിക്കുക. ഭജ്ജി അംശേ തയ്യാര്‍.
ശ്രദ്ധിക്കുക, കടുകോ കറിവേപ്പിലയോ ഒന്നും തന്നേ ഇതില്‍ ചേര്‍ക്കില്ല.
Content Highlights: konkani vasari, konakani food, konkani style food with spinach bajji amse, food