'അതെ, റൊണാൾഡോയ്ക്ക് കൊമ്പുണ്ട്, ഇത്തിരി വലിയൊരു കൊമ്പ്'

അനന്തകാലത്തേക്ക് ആകാശങ്ങളെ താങ്ങിനിർത്താൻ വിധിക്കപ്പെട്ട ഗ്രീക്ക് പുരാണകഥാപാത്രം അറ്റ്ലസിനെ പോലെ രണ്ടു ദശാബ്ദത്തോളം പോർച്ചുഗലിനെ ഏതാണ്ട് ഒറ്റയ്ക്ക് അന്താരാഷ്ട്ര ഫുട്ബോൾ ഭൂപടത്തിൽ നിലനിർത്തിയ അതികായനായ ഗോൾവേട്ടക്കാരൻ ദേശീയടീമിന്റെ പരിശീലനക്യാമ്പിൽ നിന്നും നിശ്ശബ്ദനായി ഇറങ്ങിപ്പോയിരിക്കുന്നു. സെപ്തംബർ 27-ന് ഓസ്ലോയിൽ നോർവേയ്ക്കെതിരായി നടന്ന യുവേഫ നേഷൻസ് മത്സരത്തിൽ (പോർച്ചുഗൽ 2-1-ന് ജയിച്ചു) മുഴുനേരം ബെഞ്ചിലിരുത്തപ്പെട്ട സൂപ്പർതാരത്തെ ഒക്ടോബർ ഒന്നിന് നടക്കുന്ന ഡെൻമാർക്കിനെതിരായ കളിയിലും ഇറക്കില്ലെന്ന് പരിശീലകൻ ഷൊർജ് ഷിസൂസ് (Jorge Jesus) പറഞ്ഞു, മണിക്കൂറുകൾക്കകം റൊണാൾഡോ ക്യാമ്പ് വിട്ടു. ടീം വിടാനുള്ള യഥാർത്ഥ കാരണം 'ഉചിതമായ സമയത്ത്' വെളിപ്പെടുത്തുമെന്ന് ഇൻസ്റ്റാഗ്രാമിൽ കുറിച്ച അദ്ദേഹം ആരെയും മാറ്റിനിർത്താതെ, എല്ലാ സഹതാരങ്ങൾക്കും ആശംസകൾ നേർന്നു.

കോപ്പൻഹേഗനിലെ പരിശീലന ക്യാമ്പിൽ യഥാർത്ഥത്തിൽ എന്താണ് സംഭവിച്ചത്, എന്താണ് റൊണാൾഡോയുടെ പൊട്ടിത്തെറിക്ക് വഴിവെച്ചത്? നോർവേയ്ക്കെതിരായ മത്സരത്തിൽ റൊണാൾഡോ സബ്സ്റ്റിറ്റിയൂട്ട് ബെഞ്ചിലായിരുന്നു. വാംഅപ്പ് ചെയ്യാൻ പരിശീലകൻ ആവശ്യപ്പെട്ടതനുസരിച്ച് സൈഡ്ലൈനിനു പുറത്ത് ഏറെനേരം അദ്ദേഹം ഓടിയെങ്കിലും കളിയിൽ ഇറക്കിയില്ല. ഈ മത്സരത്തിൽ കളിപ്പിക്കാമെന്ന് കോച്ച് വാഗ്ദാനം നൽകിയിരുന്നതായി റിപ്പോർട്ടുണ്ട്. വാംഅപ്പ് ചെയ്യിച്ചിട്ടും ഇറക്കാതിരുന്നത് തന്റെ പിഴവാണെന്നു പറഞ്ഞ കോച്ച് ആരെ കളിപ്പിക്കണമെന്ന് തീരുമാനിക്കുന്നത് താനാണെന്ന് ആവർത്തിച്ചു.

Content Highlights: Cristiano Ronaldo left the Portugal training camp following a dispute with head coach Jorge Jesus., Ronaldo was left on the bench against Norway and told he would not start against Denmark., The incident mirrors past controversies with Manchester United and Fernando Santos during the 2022 World Cup., A crucial meeting is scheduled to determine if Ronaldo faces a ban or will return to the squad.