അന്നാദ്യമായി ഈണത്തിനനുസരിച്ച് വയലാർ പാട്ടുകളെഴുതി, അനശ്വരതയിലേക്ക് ചിറകടിച്ചുയർന്ന പാട്ട്

ഈണത്തിനനുസരിച്ചാണ് പാട്ടെഴുതേണ്ടതെന്നറിഞ്ഞപ്പോൾ പരിഭവിച്ചു നാട്ടിലേക്ക് തിരിച്ചുപോകാനൊരുങ്ങിയ വയലാർ രാമവർമ്മയെ കുറിച്ച് സംഗീത സംവിധായകൻ ശ്യാം പറഞ്ഞുകേട്ടിട്ടുണ്ട്. വയലാറിനെ അനുനയിപ്പിക്കുക എന്ന ദൗത്യം സംവിധായകൻ രാമു കാര്യാട്ടും സംഗീതസംവിധായകൻ സലിൽ ചൗധരിയും ചേർന്ന് ഏൽപ്പിച്ചത് "ചെമ്മീനി"ന്റെ (1966) റീറെക്കോർഡിംഗിൽ വയലിൻ വായിക്കാനെത്തിയ ശ്യാമിനെ. "കവിയുമായി അതിനകം സൗഹൃദം സ്ഥാപിച്ചിരുന്നു ഞാൻ. എന്നാൽ വയലാറുണ്ടോ വഴങ്ങുന്നു. ആ രീതി മുൻപ് പരീക്ഷിച്ചിട്ടില്ലായിരുന്നു അദ്ദേഹം. ചെരുപ്പിനൊത്ത് കാൽ മുറിക്കുന്ന വിദ്യയോട് യോജിക്കാനാവില്ല എന്നായിരുന്നു വയലാറിന്റെ നിലപാട്. ഒരു ദിവസം മുഴുവൻ വേണ്ടിവന്നു അദ്ദേഹത്തെ ഒന്ന് സമ്മതിപ്പിച്ചെടുക്കാൻ. ശ്രമിച്ചുനോക്കാം എന്നേ പറഞ്ഞുള്ളൂ വയലാർ." - ശ്യാമിന്റെ ഓർമ്മ. ബാക്കിയുള്ളത് ചരിത്രമാണ്.

ആദ്യ ഗാനത്തിന്റെ ഈണം കേൾക്കേണ്ട താമസം പാട്ടിന്റെ പല്ലവി എഴുതി വയലാർ: "മാനസ മൈനേ വരൂ, മധുരം നുള്ളിത്തരൂ." കൃത്യമായി ഈണത്തിന്റെ സ്കെയിലിൽ ഒതുങ്ങിനിൽക്കുന്ന വരികൾ... ചരണങ്ങളിലുമുണ്ടായിരുന്നു കവിതയുടെ പരാഗരേണുക്കൾ : "നിലാവിന്റെ നാട്ടില് നിശാഗന്ധി പൂത്തല്ലോ കളിക്കൂട്ടുകാരനെ നീ മറന്നുപോയോ.." കൂടുതൽ ഹൃദ്യവും ആകർഷകവുമായി തോന്നിയത് അടുത്ത വരികളാണ് : "കടലിലെ ഓളവും കരളിലെ മോഹവും അടങ്ങുകില്ലോമനേ അടങ്ങുകില്ലാ." മന്നാഡേയുടെ വികാരാർദ്രമായ ശബ്ദത്തിൽ 'മാനസമൈന' അനശ്വരതയിലേക്ക് ചിറകടിച്ചുയർന്നത് പിൽക്കാല ചരിത്രം.

Content Highlights: Vayalar Ramavarma,initially resisted writing lyrics to pre-composed tunes, as recounted by music director Shyam. Vayalar, known for his poetic prowess, was persuaded by director Ramu Kariat and music director Salil Chowdhury during the re-recording of "Chemmeen" (1966). Shyam recalls the effort it took to convince Vayalar, who eventually agreed to try. The result was the iconic song "Manasa Maine Varu," which perfectly matched the tune and became timeless with Manna Dey's emotive voice.