സ്വാമിയും ഇളയരാജയും ഒന്നിച്ചപ്പോൾ പിറന്ന പാട്ട്

രണ്ട് തലമുറകളുടെ മാത്രമല്ല രണ്ടു ഹൃദയങ്ങളുടെ കൂടി സംഗമവേദിയായിരുന്നു 'കാവേരി' ; സംഗീതത്തിന്റെ പൊൻനൂലിനാൽ കോർത്തിണക്കപ്പെട്ട രണ്ടു ഹൃദയങ്ങളുടെ സംഗമം. ചില്ലറക്കാരല്ല ആ ഹൃദയങ്ങളുടെ ഉടമകൾ; സംഗീത സവ്യസാചിയായ വി ദക്ഷിണാമൂർത്തിയും ഇശൈജ്ഞാനി ഇളയരാജയും. രാജീവ് നാഥിന്റെ സംവിധാനത്തിൽ നാല് പതിറ്റാണ്ടു മുൻപ് പുറത്തുവന്ന 'കാവേരി'യിൽ ഈ രണ്ടു മഹാപ്രതിഭകളായിരുന്നു 'സംയുക്ത' സംഗീത സംവിധായകർ. ഡോ എം ബാലമുരളീകൃഷ്ണ എന്ന ഇതിഹാസതുല്യനായ സംഗീതജ്ഞൻ കൂടി ചേർന്നതോടെ അതൊരു ത്രിവേണീ സംഗമമാകുന്നു. പകരം വെക്കാനില്ലാത്ത ഒന്ന്. അപൂർവമായ ആ പ്രതിഭാസംഗമത്തിന് നിമിത്തമാകാൻ കഴിഞ്ഞത് സിനിമാജീവിതം കനിഞ്ഞുനല്കിയ സൗഭാഗ്യങ്ങളിൽ ഒന്നായിരുന്നുവെന്ന് രാജീവ് നാഥ്.

ഏറെ പ്രിയപ്പെട്ട 'നീലലോഹിത ഹിതകാരിണി ഭവാനി ശക്തി ഭാമിനീ നിഖിലനിവേശിനി പ്രാണ ധാരിണീ' എന്ന ഗാനത്തിന് പിറകെയുള്ള യാത്രയാണ് 'കാവേരി'യിലും രാജീവ് നാഥിലും എത്തിച്ചേർന്നത്. ആദ്യകേൾവിയിലേ മനസ്സിനെ തൊട്ട പാട്ട്. കാവാലത്തിന്റെ രചന. പാടിയത് സാക്ഷാൽ ബാലമുരളീകൃഷ്ണ. അമൃതവർഷിണി രാഗസ്പർശമുള്ള ആ ഗാനത്തിന്റെ പിറവിയിൽ സ്വാമിയുടേയും ഇളയരാജയുടേയും റോളുകൾ എന്തായിരുന്നു എന്നറിയാൻ കൗതുകം തോന്നി. 'ആ ഗാനം മാത്രമല്ല കാവേരിയിലെ എല്ലാ പാട്ടുകളും സ്വരപ്പെടുത്തിയത് സ്വാമിയാണ്. അവയ്ക്ക് പൂർണ്ണമായി വാദ്യവിന്യാസം നിർവഹിച്ചത് ഇളയരാജയും.'പ്രസാദ് സ്റ്റുഡിയോയിൽ രണ്ടു മഹാരഥന്മാരുടേയും കരസ്പർശമേറ്റ് ആ ഗാന പുഷ്പങ്ങൾ വിടരുന്നതിന് സാക്ഷിയാകാൻ ഭാഗ്യമുണ്ടായ രാജീവ് നാഥിന്റെ ഓർമ്മ. സിനിമയുടെ പശ്ചാത്തല സംഗീത സംവിധാനം നിർവഹിച്ചതും ഇശൈജ്ഞാനി തന്നെ.

Content Highlights: Explores the unique musical collaboration between V. Dakshinamoorthy and Ilaiyaraaja for the film Kaveri., Highlights the involvement of legendary vocalist M. Balamuralikrishna in the film's soundtrack., Details the origin of the iconic song 'Neelalohitha Hitakarini' written by Kavalam Narayana Panicker., Discusses Rajeev Nath's directorial vision and the casting of Sithara., Provides insights into the creative process at Prasad Studios during the mid-80s.