എല്ലാവരും മത്തങ്ങയെക്കുറിച്ചു മാത്രം സംസാരിക്കുന്ന കാലം വരുന്നോ ? ഷോലെ സിനിമയുടെ 50ാം വാർഷികചിന്തകൾ

ഇന്ത്യക്കാർ കണ്ട, പേർത്തും പേർത്തും കണ്ട, പിന്നെയും പിന്നെയും കണ്ടുകൊണ്ടിരിക്കുന്ന  ഒരു സിനിമയുടെ അൻപതാം വാർഷികമാണ് 2025. 'ഷോലെ' എന്നാൽ കനൽ എന്നർത്ഥം. എരിഞ്ഞുതീർന്നിട്ടും കെടാത്ത കനൽ. അണുബിന്ദുവിലെ സൂര്യപിണ്ഡം പോലെയാണ് കനൽ. ചിത കത്തിത്തീർന്ന് പിറ്റേന്നുചെല്ലുമ്പോൾ കാണാം ജീവന്റെ കണികപോലെ ഒരു തിളക്കം.

1975 ജൂണിലാണ് ഇന്ത്യയിൽ ദേശീയാടിയന്തരാവസ്ഥ പ്രഖ്യാപിക്കപ്പെട്ടത്.  ഇന്ത്യയിലെ ഇന്നത്തെ ജനസംഖ്യയിൽ എൺപതുകോടിയാളുകൾ 1975 നുശേഷം ജനിച്ചവരാണ്. അവരെ സംബന്ധിച്ചിടത്തോളം അടിയന്തരാവസ്ഥ ചരിത്രത്തിലെ കേട്ടറിവാണ്. 1975 ജൂൺ 25 നാണ് അടിയന്തരാവസ്ഥ പ്രഖ്യാപിക്കപ്പെട്ടതെങ്കിൽ 'ഷോലെ' എന്ന സിനിമ റിലീസ് ചെയ്തത് അതേ വർഷത്തിലെ സ്വാതന്ത്ര്യദിനത്തിലായിരുന്നു. ഷോലെ ജനങ്ങൾ വീണ്ടും വീണ്ടും കാണുമ്പോൾ  ജയപ്രകാശ് നാരായണനും എ .കെ . ഗോപാലനും  അടൽ ബിഹാരി വാജ്‌പേയിയും സ്നേഹലത റെഡ്ഢിയും പ്രമീള ദണ്ഡവതെയും  ജയിലായിരുന്നു. 2025 ലെ സ്വാതന്ത്ര്യദിനത്തിൽ ആ ചിത്രത്തിൻറെ അൻപതാമാണ്ട് ഓർമ്മിക്കപ്പെടുമ്പോൾ ചിലർ ഇതിനെ അപ്രഖ്യാപിത അടിയന്ത‌രാവസ്ഥക്കാലം എന്നു പറയുന്നു. എന്നാൽ ഇത് സുവ്യക്തമായ ഒരടിയന്തരാവസ്ഥയാണ്. അടിയന്തരപ്രാധാന്യം ജനങ്ങളിൽ നിന്നും ആവശ്യപ്പെടുന്ന അവസ്ഥ എന്നർത്ഥം.

Content Highlights: Exploring Sholay`s legacy 50 years after its release, amidst India`s changing political landscape.