ഇരുട്ടില്‍, മള്‍ബറിയിലകളില്‍ (രണ്ട്) | മേതില്‍ | ആത്മകഥ ആവാതെ ഞാന്‍ 26
പട്ടുനൂല്‍പ്പുഴുക്കളെപ്പോലെ പ്രാചീന ചൈനയില്‍നിന്ന് പുറംലോകത്തേക്ക് വ്യാപിച്ചൊരു ദര്‍ശനമുണ്ട്. ഒരു 'ദ്വൈത' കല്പനയിലൂടെ എന്നെ ആകര്‍ഷിച്ച ഈ ദര്‍ശനം അതീന്ദ്രിയ വിഭാവനങ്ങളില്‍ പൊതുവേ പതിവില്ലാത്ത രീതിയില്‍ ഓരോ വ്യക്തിയിലും രണ്ട് വ്യത്യസ്ത ആത്മാവുകളെ സങ്കല്പിക്കുന്നു. ഒന്നാമാത്മാവ് നമ്മുടെ ഭൗതികതയെ പ്രതിനിധാനം ചെയ്യുന്നു; രണ്ടാമാത്മാവാകട്ടെ നമ്മിലെ ആത്മീയതയെ പ്രതിനിധാനം ചെയ്യുന്നു.
ലഭ്യമായ വ്യാഖ്യാനങ്ങള്‍ എങ്ങനെയായാലും, ഉറങ്ങിക്കിടക്കുന്നൊരു വ്യക്തിയുടെ നിദ്രാടനമാണ് രണ്ടാമാത്മാവിന്റെ ബഹിര്‍ഗ്ഗമന മാധ്യമമെന്ന് സങ്കല്പിക്കുന്നതില്‍ ദൃശ്യസൗകര്യമുണ്ട്. ശരീരം വിട്ട് പുറത്തിറങ്ങുന്ന ഈ ആത്മാവ് മൃതരുടെ ലോകം സന്ദര്‍ശിക്കുന്നു, പരേതരായ പൂര്‍വ്വികരെക്കുറിച്ചുള്ള 'അപ്‌ഡേറ്റുകള്‍' നമ്മില്‍ എത്തിക്കുന്നു. നിദ്രാശരീരം (അങ്ങനെ പറയട്ടെ) ഇതിന്നാവശ്യമായ സ്വാതന്ത്ര്യം അനുവദിക്കുന്നു, പക്ഷേ വിഹാരം അനിയന്ത്രിതമല്ല.
Content Highlights: maythil radhakrishnan column athmakadha avathe njan 26