പട്ടുക്കോട്ടൈയിലെ അഡല്‍റ്റ്സ് ഒണ്‍ലി മലയാള ചിത്രങ്ങളില്‍ മാത്രം കണ്ട കേരളം കണ്‍മുന്നില്‍
ഇളങ്കോ ഓടൈ. തഞ്ചാവൂരിലെ കല്യാണ ഓടൈ എന്ന ഗ്രാമത്തില്‍ നിന്നും തന്റെ പതിനഞ്ചാം വയസ്സില്‍ കേരളത്തിലേക്ക് തീവണ്ടി കയറിയ ബാലന്‍. ഒരു ഉറക്കമുണര്‍ന്ന് എഴുന്നേറ്റപ്പോള്‍ വണ്ടി മലപ്പുറത്തെത്തിയിരിക്കുന്നു. നാട്ടിലെ തലമുതിര്‍ന്നവര്‍ പറഞ്ഞുകേട്ട കേരളത്തെ ഇളങ്കോ നേരിട്ടുകണ്ടു. പത്താം ക്ലാസ് തികച്ച ആ തമിഴ് ബാലന്‍ ജീവിതം ഇവിടെ നിന്നും പഠിച്ചുതുടങ്ങുകയാണ്. പതിനഞ്ചുകാരന്‍ ഉറങ്ങാത്ത തിണ്ണകളില്ല, കഴുകാത്ത ഹോട്ടല്‍ പാത്രങ്ങളില്ല, വാരാത്ത എച്ചിലുകളില്ല. പക്ഷേ, പതിനാറാം വയസ്സുമുതല്‍ മലയാളം ഇളങ്കോയെ മറ്റൊരു തൊഴില്‍ കൂടി പഠിപ്പിച്ചു- പുസ്തകവില്‍പന. മൂന്നര പതിറ്റാണ്ടുകാലമായി ആ പഠിത്തം തുടര്‍ന്നുകൊണ്ടേയിരിക്കുന്നു. അതിനിടയില്‍ ഇളങ്കോ കഥകളെഴുതി, തിരക്കഥയെഴുതി, പ്രമുഖരും അപ്രമുഖരുമായ ധാരാളം മലയാളികളുടെ പ്രിയപ്പെട്ട പുസ്തക വില്‍പനക്കാരനുമായി. ജീവിതം കൂട്ടിവായിക്കാന്‍ പഠിക്കുംമുമ്പേ മുമ്പില്‍ മത്സരിച്ചു നിരന്നുനിന്ന അനുഭവങ്ങളിലൂടെ മലയാളം ഇളങ്കോയെ എഴുത്തിനിരുത്തുകയാണ്- ആത്മകഥയിലൂടെ. ഇളങ്കോ ഓടൈ എഴുതുന്ന ആത്മകഥ 'മലയാളത്തമിഴന്‍' ആരംഭിക്കുന്നു.
1990 ഓഗസ്റ്റ് 16-ാം തിയ്യതി പുലര്‍ന്നപ്പോള്‍ മലപ്പുറം ജില്ലയില്‍ കുറ്റിപ്പുറം റെയില്‍വേ സ്റ്റേഷനില്‍ ഞാന്‍ തീവണ്ടിയിറങ്ങി. കര്‍ക്കിടക മാസത്തിലെ അവസാനത്തെ മഴ പെയ്യുന്നുണ്ടായിരുന്നു. മഴ നനയാതിരിക്കാന്‍ ഞാന്‍ വെയിറ്റിംഗ് ഷെഡ്ഡിലേക്ക് ഓടി. കോയമ്പത്തൂരില്‍ നിന്നേ ഞാന്‍ പിന്തുടര്‍ന്നിരുന്ന മൂന്നു അണ്ണന്‍മാരും ഈ ചാറ്റല്‍ മഴ ഞങ്ങളെ ഒന്നും ചെയ്യില്ല എന്ന അലക്ഷ്യഭാവത്തില്‍ പുറത്തേക്കുള്ള വഴിയിലൂടെ ഓടിപ്പോകുന്നത് മിഴിച്ചുനോക്കി നിന്നു.
Content Highlights: elenko odai book seller autobiography malayathamizhan begins