വലിയ സെറ്റില്ല, വില കൂടിയ വസ്ത്രങ്ങളില്ല; ഇത് സാമന്ത സ്റ്റൈൽ മറ്റേണിറ്റി ഫോട്ടോഷൂട്ട്
മറ്റേണിറ്റി ഫോട്ടോഷൂട്ടുകളെ മാറ്റിയെഴുതി ചലച്ചിത്രതാരം സാമന്ത റൂത്ത് പ്രഭു. ഗർഭകാലത്തിന്റെ മനോഹരമായ നിമിഷങ്ങൾ പകർത്തുന്ന മറ്റേണിറ്റി ഫോട്ടോഷൂട്ട് ട്രെൻഡിന് സാമന്ത സ്റ്റൈൽ സമ്മാനിച്ചിരിക്കുകയാണ് താരം. വൻകിട സെറ്റുകളോ ആഡംബര വസ്ത്രങ്ങളോ ഇല്ലാതെ തികച്ചും സ്വാഭാവികവും ലളിതവുമായി സോഫയിൽ ശാന്തമായി വിശ്രമിക്കുന്ന ചിത്രമാണ് സാമന്ത ആരാധകർക്കായി പങ്കുവച്ചിരിക്കുന്നത്.
ഇൻസ്റ്റാഗ്രാമിൽ പങ്കുവെച്ച ചിത്രത്തിൽ, സോഫയിലെ കുഷ്യനുകളിൽ തലചായ്ച്ച് തികച്ചും അയഞ്ഞ മട്ടിൽ വിശ്രമിക്കുന്ന സാമന്തയെയാണ് കാണാൻ സാധിക്കുന്നത്. ചുവന്ന പ്രിന്റഡ് കുർത്തയും വെള്ള ട്രൗസറും ധരിച്ച താരം കറുത്ത സൺഗ്ലാസും അണിഞ്ഞിട്ടുണ്ട്. സോഫയിൽ കാലുകൾ നീട്ടിവെച്ച്, ഇരുകൈകളും വയറിന് മുകളിൽ അമർത്തിപ്പിടിച്ചിരിക്കുന്ന ചിത്രത്തിന് നൽകിയ അടിക്കുറിപ്പാണ് ഏറെ ശ്രദ്ധേയം.'ഇതിനെ എന്റെ ഔദ്യോഗിക മാതൃത്വ ഫോട്ടോഷൂട്ടായി കണക്കാക്കുക.'
സിനിമാ ലോകത്ത് മറ്റേണിറ്റി ഫോട്ടോഷൂട്ടുകൾ വൻതുക ചെലവഴിച്ച് ആഡംബരത്തോടെ നടത്തുന്ന തരംഗം നിലനിൽക്കെയാണ് സാമന്തയുടെ ഈ രസകരമായ നിലപാട്. താരത്തിന്റെ ലളിതമായ ഈ സമീപനത്തെ പ്രശംസിച്ച് നിരവധി ആരാധകരും ചലച്ചിത്ര രംഗത്തെ സഹപ്രവർത്തകരും രംഗത്തെത്തിയിട്ടുണ്ട്.
Read Also: ഗർഭിണിയായിരിക്കേ വ്യായാമം: സാമന്തയുടെ പോസ്റ്റിന് പിന്നാലെ ചർച്ച ശക്തമാകുന്നു
പ്രശസ്ത സംവിധായകനും നിർമാതാവുമായ രാജ് നിധിമോരുവും സാമന്തയും തങ്ങളുടെ ആദ്യ കൺമണിയെ വരവേൽക്കാനുള്ള ഒരുക്കങ്ങളിലാണ്. മാതൃത്വത്തിന്റെ ദിനങ്ങളെ തികച്ചും ആനന്ദകരമാക്കുന്ന വീഡിയോകളും ചിത്രങ്ങളും സാമന്ത പങ്കുവെച്ചിരുന്നു. അടുത്തിടെ പങ്കുവെച്ച മറ്റൊരു വീഡിയോയിൽ, കുഞ്ഞിനായുള്ള 'ബേബി മോണിറ്റർ ഫ്‌ലോർ സ്റ്റാൻഡ്' രാജ് നിധിമോരു നേരിട്ട് ഘടിപ്പിക്കുന്ന രംഗങ്ങൾ സാമന്ത പങ്കുവെച്ചിരുന്നു. പിതാവ് എന്ന നിലയിലുള്ള തന്റെ പുതിയ ഉത്തരവാദിത്തങ്ങൾ ഏറ്റെടുക്കാൻ രാജ് തയ്യാറെടുക്കുന്നതിന്റെ കാഴ്ചയായിരുന്നു അത്.
അതിനൊപ്പംതന്നെ, ഗർഭകാലത്തും താൻ തുടരുന്ന കഠിനമായ ഫിറ്റ്നസ് ട്രെയിനിങ്ങിന്റെ ദൃശ്യങ്ങളും സാമന്ത ഇൻസ്റ്റാഗ്രാമിലൂടെ പുറത്തുവിട്ടിട്ടുണ്ട്. ഗർഭധാരണത്തിന്റെ ആദ്യമാസങ്ങളിൽ സ്‌ക്വാറ്റുകൾ ചെയ്യുന്നതും ഒൻപതാം മാസത്തിൽ അതേ വ്യായാമം തുടരുന്നതിന്റെ ദൃശ്യങ്ങളും കോർത്തിണക്കിയ വീഡിയോ താരം പങ്കുവെച്ചിരുന്നു. '9. ദ ഫൈനൽ ലാപ്' എന്ന അടിക്കുറിപ്പോടെയാണ് താരം ഈ ഫിറ്റ്നസ് വീഡിയോ പങ്കുവെച്ചത്. ഗർഭകാലത്തും സ്വന്തം ആരോഗ്യവും ഫിറ്റ്നസും നിലനിർത്താൻ താരം കാണിക്കുന്ന ശ്രദ്ധ പ്രചോദനാത്മകമാണ്.
മാ ഇന്റി ബംഗാരം എന്ന സിനിമയിലെ ഗാനചിത്രീകരണ വേളയിലാണ് ഗർഭിണിയാണെന്ന വിവരം സാമന്ത മനസ്സിലാക്കുന്നത്. ഗാനരംഗത്തിൽ ഡാൻസ് ചെയ്യേണ്ടതുണ്ടായിരുന്നു. ഒപ്പം ഗർഭകാലത്തിന്റെ ആദ്യ ദിനങ്ങളിലുണ്ടാകുന്ന ശാരീരിക അസ്വസ്ഥതകളും ആ സമയത്ത് അവർക്കുണ്ടായിരുന്നു. പക്ഷെ, മനോഹരമായാണ് ആ സമയത്തെ സാമന്ത കൈകാര്യം ചെയ്തത്. 'ഒരു കുഞ്ഞ് ജീവിതത്തിലേക്ക് എത്തുന്നത് ഒരാളുടെ ജീവിതത്തെ ആകെ മാറ്റിമറിക്കുമെന്നാണ് എല്ലാവരും പറയുന്നത്, ഞാനത് വിശ്വസിക്കുന്നു. ആ വലിയ മാറ്റത്തിന് ഞാൻ പൂർണ്ണമായും തയ്യാറായിക്കഴിഞ്ഞു.' സാമന്ത പറയുന്നു.
ബന്ധുക്കളുടെയും അടുത്ത സുഹൃത്തുക്കളുടെയും സാന്നിധ്യത്തിൽ തികച്ചും ലളിതമായിട്ടായിരുന്നു കോയമ്പത്തൂരിൽവെച്ച് ഇവരുടെ വിവാഹച്ചടങ്ങുകൾ നടന്നത്. 2026-ൽ പുറത്തിറങ്ങിയ തെലുങ്ക് ചിത്രമായ മാ ഇന്റി ബംഗാരം ആണ് സാമന്തയുടേതായി ഒടുവിൽ തിയേറ്ററുകളിലെത്തിയ ചിത്രം. അഭിനയത്തിന് പുറമേ ഈ ചിത്രത്തിന്റെ നിർമാണ പങ്കാളി കൂടിയായിരുന്നു സാമന്ത.
Content Highlights: Samantha Ruth Prabhu shares intimate moments of her pregnancy on Instagram, showcasing her unique approach to maternity photoshoots and fitness.