മനസ്സിനെ തൊട്ട മൂന്ന് പുസ്തകങ്ങൾ; നിരാശപ്പെടുത്തിയ ഒരു സിനിമയും | വഴിപോക്കൻ

രാജ്യം എന്നു പറയുന്നതു കാലിനടിയിലെ മണ്ണല്ല, അവിടത്തെ ജനങ്ങളാണ് എന്നു പറഞ്ഞത് രവീന്ദ്രനാഥ ടാഗോർ ആണ്. ആ അർത്ഥത്തിൽ ഇന്ത്യയ്ക്കെന്താണു സംഭവിക്കുന്നതെന്ന ചോദ്യം ഇന്ത്യൻ ജനതയ്ക്കെന്താണു സംഭവിക്കുന്നതെന്ന ചോദ്യമായി മാറുന്നു. ഇക്കഴിഞ്ഞ വർഷം ഈ ചോദ്യമുയർത്തിയ മൂന്നു പുസ്തകങ്ങളെക്കുറിച്ചാണ് ഈ കുറിപ്പിൽ പ്രധാനമായും പരാമർശിക്കുന്നത്. കൂട്ടത്തിൽ ഏറെ നിരാശപ്പെടുത്തിയ ഒരു സിനിമയെക്കുറിച്ചും.

ദ ഹിന്ദുവിൽ ഫീച്ചേഴ്സ് എഡിറ്ററായ സിയ ഉസ് സലാം എഴുതിയ 'Being Muslim In Hindu India' (ഹിന്ദു ഇന്ത്യയിലെ മുസ്ലിം ജീവിതം) എന്ന പുസ്തകം കൈയ്യിൽ കിട്ടിയത് ഡിസംബർ ആദ്യവാരമാണ്. ഈ വർഷം ജൂൺ 30-ന് സിയ ദ ഹിന്ദുവിന്റെ എഡിറ്റോറിയൽ പേജിൽ ഇതേ വിഷയവുമായി ബന്ധപ്പെട്ട് ഒരു ലേഖനമെഴുതിയിരുന്നു. ''To be a Muslim in India is to be voiceless'' എന്ന വാക്യത്തോടെയാണ് സിയ ലേഖനം തുടങ്ങിയത്. സമകാലിക ഇന്ത്യയിൽ മുസ്ലിങ്ങൾ നേരിടുന്ന പ്രതിസന്ധിയുടെ ആഴവും പരപ്പും ഇത്രയും ഹൃദയസ്പർശിയായും വസ്തുനിഷ്ഠമായും എഴുതിയ മറ്റൊരു കുറിപ്പ് അതുവരെ വായിച്ചിരുന്നില്ല. കുറച്ചു ദിവസം കഴിഞ്ഞപ്പോൾ പത്രപ്രവർത്തകൻ കരൺ ഥാപ്പർ സിയയുമായി നടത്തിയ അഭിമുഖം ദ വയറിന്റെ യുട്യൂബ് ചാനലിൽ വന്നു. ഗംഭീരം എന്നു മാത്രമേ ആ അഭിമുഖത്തെ വിശേഷിപ്പിക്കാനാവൂ! ഒരു ലേഖനത്തിലും അഭിമുഖത്തിലും അവസാനിക്കേണ്ടതായിരുന്നില്ല സിയ ഉയർത്തിയ ചോദ്യങ്ങൾ. അതുകൊണ്ടുതന്നെ സിയയുടെ പുസ്തകം സമകാലിക ഇന്ത്യയ്ക്കായി 2023 ബാക്കിവെയ്ക്കുന്ന ഏറ്റവും പ്രധാനപ്പെട്ട രേഖകളിലൊന്നാവുന്നു. ഉൾക്കിടിലത്തോടെയും രോഷത്തോടെയും സങ്കടത്തോടെയും അല്ലാതെ ഈ പുസ്തകം വായിച്ചുതീർക്കാനാവില്ല.

Content Highlights: Three booka, Ziya Us Salam, Dr. Parakkala Prabhakar, Prabhir Purkayastha, Vazhipokkan