പൂക്കോട്ടെ കൊല അഥവാ കേരളത്തിലെ ബനാന റിപ്പബ്ളിക്കുകൾ | വഴിപോക്കൻ

പൂക്കോട് വെറ്ററിനറി കോളേജ് ഒരു ബനാന റിപ്പബ്ലിക്ക് ആണെന്നു വേണം കരുതാൻ. മദ്ധ്യ അമേരിക്കയിലെ ഗ്വാട്ടിമാലയിലും ഹോണ്ടുറാസിലുമൊക്കെ വാഴ കൃഷിക്കിറങ്ങി ഭരണകൂടങ്ങളെ വരെ കളിപ്പാവകളാക്കി മാറ്റിയ അമേരിക്കൻ കുത്തക കമ്പനികളാണ് ബനാന റിപ്പബ്ളിക്കുകൾ ആദ്യം സൃഷ്ടിച്ചത്. ഈ കമ്പനികൾ അവിടെ അവരുടെ സ്വന്തം സാമ്രാജ്യങ്ങൾ തീർത്തു. ഭരണകൂടങ്ങളെ നോക്കുകുത്തികളാക്കി നിർത്തിക്കൊണ്ട് ഭരണവും നിയമവും കമ്പനികൾ ഏറ്റെടുത്തു. ഇത്തരമൊരു ബനാന റിപ്പബ്ലിക്കാണ് പൂക്കോട്ട് എസ്.എഫ്.ഐ. തീർത്തത്. 

ഒരു ദിവസം കൊണ്ടുണ്ടാവുന്നതല്ല ബനാന റിപ്പബ്ലിക്കുകൾ. കേരളത്തിലെ ഏക ബനാന റിപ്പബ്ളിക്കുമല്ല പൂക്കോട്ടെ വെറ്ററിനറി കോളേജ്. ഒരു പാർട്ടിക്ക് മാത്രം മേധാവിത്വമുള്ള എല്ലാ കലാലയങ്ങളും എല്ലാ ഗ്രാമങ്ങളും ബനാന റിപ്പബ്ലിക്കുകളാണ്. അതിപ്പോൾ എ.ബി.വി.പി. ആയാലും എം.എസ്.എഫ്. ആയാലും കെ.എസ്.യു. ആയാലും ബനാനാ റിപ്പബ്ളിക്കുകൾ ഉറപ്പാണ്. അക്രമങ്ങൾക്കും നിഷ്ഠൂരതകൾക്കും ഏറ്റക്കുറച്ചിലുണ്ടായേക്കാം. പക്ഷേ, ഒരവസരം കിട്ടിയാൽ ഇവരെല്ലാവരും തന്നെ നിയമം കൈയ്യിലെടുക്കും, ഏതിർശബ്ദങ്ങൾ ഉയരുന്ന തൊണ്ടക്കുഴിയിൽ ബെൽറ്റിട്ടു മുറുക്കും. നാഭിയും നെഞ്ചിൻകൂടും ചവിട്ടി ഞെരിക്കും. എന്നിട്ട്, സ്വയം വിപ്ലവകാരികളെന്നും പുരോഗമനവാദികളെന്നും നാടിന്റെയും നാട്ടുകാരുടെയും സംരക്ഷകരെന്നും അട്ടഹസിക്കും.

Content Highlights: SFI Created a Banana Republic in Pookode Kerala Veterinary and Animal Sciences University