കേരള സ്റ്റോറി: തീക്കൊള്ളിക്ക് വിറക് നൽകുന്നവർ | വഴിപോക്കൻ

കഴിഞ്ഞ വർഷം മെയിൽ മമത ബാനർജിയുടെ ബംഗാൾ സർക്കാർ കേരള സ്റ്റോറി എന്ന സിനിമ നിരോധിച്ചു. സമുദായ സൗഹാർദ്ദം തകർക്കുന്ന സിനിമയാണെന്ന് പറഞ്ഞായിരുന്നു നിരോധനം. ബംഗാൾ സർക്കാരിന്റെ 'കിരാത' നടപടിയിൽ പ്രകോപിതനായ ബി.ജെ.പി. നേതാവ് ദശരഥ് ടിർക്കി വെറുതെയിരുന്നില്ല. ബംഗാളിലെ അലിപുർദ്വാർ ഗ്രാമത്തിൽനിന്ന്  പെൺകുട്ടികളും മുതിർന്ന വനിതകളും അടങ്ങുന്ന 140 അംഗ സംഘത്തെ ടിർക്കി രണ്ട് ബസ്സുകളിലായി 120 കിലോ മീറ്റർ അപ്പുറത്ത് അസമിലുള്ള ഒരു തിയേറ്ററിലേക്ക് കൊണ്ടുപോയി കേരള സ്റ്റോറി കാണിച്ചുകൊടുത്തു. ഒരു വെക്കേഷൻ ട്രിപ് പോലെയുണ്ടായിരുന്നെന്നും ഒരു സിനിമ കാണാൻ ജീവിതത്തിലിന്നു വരെ ഇത്രയും ദൂരം സഞ്ചരിച്ചിട്ടില്ലെന്നും സംഘത്തിലുണ്ടായിരുന്ന സുഷമ ഗാരിയ എന്ന സ്ത്രീ കൊൽക്കെത്തയിൽനിന്ന് ഇറങ്ങുന്ന ടെലിഗ്രാഫ് പത്രത്തിന്റെ റിപ്പോർട്ടറോട് പറഞ്ഞു. കേരള സ്റ്റോറിയുമായി ബന്ധപ്പെട്ട് ഇപ്പോൾ കേരളത്തിൽ ഉയർന്നിട്ടുള്ള വിവാദം ഈ വനിതകൾ അറിഞ്ഞിട്ടുണ്ടാവുമോ എന്നറിയില്ല. വാസ്തവത്തിൽ ഒരാഴ്ചകൂടി ടിർക്കി കാത്തിരുന്നെങ്കിൽ ഇത്രയും സാഹസം വേണ്ടിവരുമായിരുന്നില്ല. കാരണം സുപ്രീം കോടതി ഇടപെട്ടതോടെ കേരള സ്റ്റോറി മെയ് അവസാനവാരം ബംഗാളിൽ പ്രദർശിപ്പിച്ചു.

സിനിമയായാലും പുസ്തകമായാലും മറ്റേത് കലാരൂപമായാലും നിരോധനം ഒരു തല്ലിപ്പൊളി ഇടപാടാണ്. തമിഴ് എഴുത്തുകാരൻ പെരുമാൾ മുരുകന്റെ നോവൽ 'മാതൊരുഭാഗൻ' (ഒരു ഭാഗം സ്ത്രീ) എന്ന നോവലിന്റെ നിരോധനം റദ്ദാക്കിക്കൊണ്ട് മദ്രാസ് ഹൈക്കോടതി പറഞ്ഞത് ഇഷ്ടമില്ലാത്ത പുസ്തകമാണെങ്കിൽ അത് വായിക്കാതെ മടക്കി വെക്കാം എന്നാണ്. നിങ്ങൾക്ക് ഇഷ്ടമില്ലെന്ന് കരുതി നോവൽ രചയിതാവിന്റെ മെക്കിട്ട് കയറരുതെന്നും ഈ കേസിൽ വിധി എഴുതിയ അന്നത്തെ മദ്രാസ് ഹൈക്കോടതി ചീഫ് ജസ്റ്റിസ് സഞ്ജയ് കിഷൻ കൗൾ പറഞ്ഞു. 

Content Highlights: Idukki Diocese of the Syro Malabar Church has come forward with the show of the cinema