വിഷാദവും ഉത്കണ്ഠയും കുറയ്ക്കും, മാനസികാരോഗ്യം മെച്ചപ്പെടുത്താൻ സൈക്ലിങ് ഫലപ്രദമെന്ന് പഠനം

മസ്തിഷ്കാരോഗ്യം കാത്തുസൂക്ഷിക്കുന്നതിൽ സൈക്ലിങ്ങിന്റെ പങ്ക് വ്യക്തമാക്കി പഠനം. അമേരിക്ക, കാനഡ തുടങ്ങി പത്തൊമ്പത് രാജ്യങ്ങളിൽ നിന്നുള്ള 90 പഠനങ്ങളെ ആസ്പദമാക്കി നടത്തിയ പഠനത്തിനൊടുവിലാണ് ഗവേഷകർ ഈ വിലയിരുത്തലിലെത്തിയത്. 

മസ്തിഷ്കത്തിന്റെ മൊത്തത്തിലുള്ള ആരോഗ്യം കാക്കുന്നതിനും വിഷാദരോഗത്തിന്റെയും ഉത്കണ്ഠയുടെയും ലക്ഷണങ്ങൾ കുറയ്ക്കുന്നതിനും മാനസികാവസ്ഥ മെച്ചപ്പെടുത്തുന്നതിനുമൊക്കെ സൈക്ലിങ് മികച്ചതാണെന്ന് പഠനം പറയുന്നു. ഒക്ലഹോമ സർവകലാശാല, ലോമ ലിൻഡ സർവകലാശാല എന്നിവിടങ്ങളിൽ നിന്നുള്ള ഗവേഷകരാണ് പഠനത്തിനു പിന്നിൽ.

മാനസികാരോഗ്യ പ്രശ്നങ്ങൾ വർധിക്കുകയും ശാരീരിക പ്രവർത്തനങ്ങൾ കുറയുകയും ചെയ്യുന്ന സാഹചര്യത്തിൽ മസ്തിഷ്കാരോഗ്യം മെച്ചപ്പെടുത്താൻ ചെലവുകുറഞ്ഞ സൈക്ലിങ് പോലുള്ള വഴികൾ കണ്ടെത്തേണ്ടത് പ്രധാനമാണെന്നും ഗവേഷകർ പറയുന്നു.

ഫ്രോണ്ടിയേഴ്സ് ജേണലിൽ പഠനം പ്രസിദ്ധീകരിച്ചിട്ടുണ്ട്. ഏകാഗ്രത ലഭിക്കാനും മസ്തിഷ്കാരോഗ്യം മെച്ചപ്പെടാനും സമ്മർദം കുറയ്ക്കാനുമൊക്കെ സൈക്ലിങ് സഹായിക്കുമെന്ന് പഠനം പറയുന്നു. മാനസികാരോഗ്യം സംരക്ഷിക്കുന്നതിനൊപ്പം ഹൃദയാരോഗ്യം കാക്കാനും ഫിറ്റ്നസ്, ശരീരഘടന, മെറ്റബോളിക് ആരോഗ്യം എന്നിവ മെച്ചപ്പെടുത്തുന്നതിനും സൈക്ലിങ് സഹായിക്കുമെന്നും പഠനത്തിലുണ്ട്.

Content Highlights: Global study of 90 research papers across 19 countries confirms cycling improves brain health., Cycling is proven to alleviate symptoms of depression and anxiety.