സ്വീഡിഷ് പ്രധാനമന്ത്രിക്ക് മോദി നൽകിയ ലോക്തക് ലോട്ടസ് ടീ; പ്രത്യേകത അറിയാം

പ്രധാനമന്ത്രി നരേന്ദ്ര മോദിയുടെ യുഎഇ, നെതർലൻഡ്‌സ്, സ്വീഡൻ, നോർവേ, ഇറ്റലി എന്നീ അഞ്ച് രാജ്യങ്ങളിലെ ഔദ്യോഗിക സന്ദർശനം അടുത്തിടെയാണ് പൂർത്തിയായത്. നയതന്ത്ര ചർച്ചകൾക്കപ്പുറം ലോകനേതാക്കൾക്ക് അദ്ദേഹം നൽകിയ സവിശേഷമായ സമ്മാനങ്ങളും ഏറെ ശ്രദ്ധിക്കപ്പെട്ടിരുന്നു. ഇന്ത്യയുടെ പാരമ്പര്യവും തനത് സംസ്കാരവും വിളിച്ചോതുന്നതായിരുന്നു സമ്മാനങ്ങളെല്ലാം.

സ്വീഡൻ പ്രധാനമന്ത്രി ഉൾഫ് ക്രിസ്റ്റേഴ്സണുമായുള്ള കൂടിക്കാഴ്ചയിൽ പ്രധാനമന്ത്രി മോദി സമ്മാനിച്ച ഒരു പ്രത്യേക വിഭവം ഇപ്പോൾ മാധ്യമങ്ങളിൽ ഇടം പിടിക്കുകയാണ്. മണിപ്പൂരിൽ നിന്നുള്ള ലോക്തക് ലോട്ടസ് ടീ ആയിരുന്നു അത്.

എന്താണ് ലോക്തക് താമര ചായ?

വടക്കുകിഴക്കൻ ഇന്ത്യയിലെ ഏറ്റവും വലിയ ശുദ്ധജല തടാകമായ മണിപ്പൂരിലെ ലോക്തക് തടാകത്തിന്റെ പരിസര പ്രദേശങ്ങളിലാണ് ഈ തേയിലപ്പൊടി ഉത്പാദിപ്പിക്കുന്നത്. വെറുമൊരു ചായപ്പൊടി എന്നതിനപ്പുറം മണിപ്പൂരിലെ തങ്ക ഗ്രാമത്തിലെ ഒരു കൂട്ടം സ്ത്രീകളുടെ കഠിനാധ്വാനത്തിന്റെയും പ്രതീകമാണിത്. തടാകത്തിലെ സ്വാഭാവികമായ താമരയിലകൾ ഉപയോഗിച്ചാണ് ഇവയുടെ നിർമാണം. പൂർണ്ണമായും രാസവസ്തുക്കൾ ഒഴിവാക്കി, പരമ്പരാഗത കൃഷിരീതികൾ നിലനിർത്തിക്കൊണ്ട് കമ്മ്യൂണിറ്റികളുടെ നേതൃത്വത്തിലുള്ള തോട്ടങ്ങളിലാണ് ഇത് വളർത്തിയെടുക്കുന്നത്.

ലോക്തക് ചായയുടെ സവിശേഷതകൾ:

• ഫ്ലോട്ടിങ് ഫുംദിസ്: തടാകത്തിന് മുകളിൽ ഒഴുകിനടക്കുന്ന മണ്ണും ജൈവ അവശിഷ്ടങ്ങളും നിറഞ്ഞ ഫുംദിസ് എന്നറിയപ്പെടുന്ന സവിശേഷമായ ആവാസവ്യവസ്ഥയിലാണ് ഇവ ഉണ്ടാകുന്നത്. 

• വ്യത്യസ്തമായ രുചി: സാധാരണ ചായകളിൽ നിന്ന് വ്യത്യസ്തമായി താമരയിലകളിൽ നിന്ന് തയ്യാറാക്കുന്ന ഈ ചായയ്ക്ക് വളരെ മൃദുവായ സുഗന്ധവും ആകർഷകമായ രുചിയുമാണുള്ളത്. 

• ചെറിയ ബാച്ചുകളിലുള്ള നിർമ്മാണം: വൻതോതിൽ ഫാക്ടറികളിൽ നിർമ്മിക്കുന്നതിന് പകരം, ഗുണനിലവാരം ഉറപ്പാക്കാൻ ചെറിയ ബാച്ചുകളായി കൈകൊണ്ട് നിർമ്മിക്കുന്നവയാണിത്.

ചായപ്പൊടിയ്ക്കു പുറമെ രബീന്ദ്രനാഥ ടാഗോറിന്റെ കൃതികളുടെ സമാഹാരവും ലെതർ ബാഗും സ്വീഡിഷ് പ്രധാനമന്ത്രിക്ക് സമ്മാനിച്ചു.

Content Highlights: During his five-nation tour, Prime Minister Narendra Modi gifted Sweden's Prime Minister Ulf Kristersson unique, organic Loktak Lotus Tea hand-crafted by a women's community from Manipur's famous freshwater lake.