കടുകിന്റെയും കറിവേപ്പിലയുടെയും ആ ക്ലൈമാക്സാണ് 'ചനാ ഘശി'യുടെ ഹൈലൈറ്റ്; പിന്നെ ഊണ് കുശാൽ
കൊങ്കണി കറികളുടെ രുചിയും വൈവിധ്യവും അടങ്ങിയിരിക്കുന്നത് കറിയുണ്ടാക്കുന്ന പ്രക്രിയയുടെ ക്ലൈമാക്സിലാണ്. അതായത് താളിപ്പ് ഒഴിച്ചു ചേര്‍ക്കുമ്പോള്‍. അതുവരെ മിക്ക കറികളുടെയും അടിസ്ഥാന ചേരുവകള്‍ ഒന്ന് തന്നെയായിരിക്കും. അളവിലെ ഏറ്റക്കുറച്ചില്‍ മാത്രം. താളിപ്പിലെ രൂപമാറ്റങ്ങള്‍ 'ഘശി'യിലെ കടുക് കറിവേപ്പിലയിലും 'കൊജ്ജല്‍' ലെ വെളുത്തുള്ളി വറവിലും, 'അമ്പട്ട്' ലെ ഉള്ളി മൂപ്പിക്കലിലും ഒക്കെ മാറി മാറി നില്‍ക്കുന്നു. ഓരോ താളിപ്പിന് അനുസരിച്ചു കറികള്‍ക്ക് ഓരോ പേരുകളും. ഉള്ളി വെളുത്തുള്ളി ഒഴിവാക്കുന്ന വിശേഷ ദിവസങ്ങളില്‍ ഉണ്ടാക്കുന്ന ചില കറികളില്‍ ചേര്‍ക്കുന്ന മുഖ്യ ചേരുവയാണ് കായവും മുള്ളിലവ് കായയും. രണ്ടിനും ഒപ്പം പച്ച വെളിച്ചെണ്ണയും ചേര്‍ക്കും. കായം ആണെങ്കില്‍ 'ഹിങ്കാ ബെന്തിട എന്നും മുള്ളിലവ് കായ എങ്കില്‍ 'തെപ്പളാ ഘശി' എന്നും വിളിക്കും.
ഇതില്‍ ഘശിക്കാണ് ഒരു പൊടിക്കെങ്കിലും പ്രാധാന്യം കൂടുതല്‍. ഉള്ളി, വെളുത്തുള്ളി എന്നിവ വര്‍ജ്ജിക്കുന്ന അവസരങ്ങളില്‍ ഘശിക്കാണ് മുന്‍ഗണന. അത്തരം വിശേഷ ദിവസങ്ങളില്‍ സദ്യകളില്‍ സ്ഥാനം പിടിക്കുന്ന പ്രധാനപെട്ട ഘശികളില്‍ ഒന്നാണ് 'ചനാ ഘശി' അല്ലെങ്കില്‍ കടല ഘശി. ഈ ഘശിയില്‍ മിക്കവാറും കടലയ്‌ക്കൊപ്പം ചേനയോ ഇടിച്ചക്കയോ കൂട്ട് കാണും. അവര് തമ്മിലുള്ള രുചിക്കൂട്ട് പറഞ്ഞറിയിക്കാന്‍ പറ്റാത്ത സ്വാദാണ്. എന്നാല്‍ സാധാരണ ഘശികളില്‍ നിന്നും ഒരൊറ്റ വ്യത്യാസം ചനാ ഘശിക്കുണ്ട്. അത് ആ താളിപ്പില്‍ ചേര്‍ക്കുന്ന മറ്റൊരു ചേരുവയാണ്- തേങ്ങ തിരുമ്മിയത്. അതെ, ഇതില്‍ മാത്രം അല്പം തേങ്ങ കൂടെ വറുത്ത് ചേര്‍ക്കും. ചോറിനൊപ്പം ഒഴിച്ചു കറിയായി വിളമ്പാമെങ്കിലും സദ്യകളില്‍ പരിപ്പിനും രസത്തിനും ആയിരിക്കും മുന്‍പന്തിയില്‍ സ്ഥാനം. അതുകൊണ്ട് ചന ഘശി ഇലയുടെ ഓരത്ത് ആണ് വിളമ്പുക. ഒരു പപ്പടം കൂടെ ഉണ്ടേല്‍ ഊണ് കുശാല്‍.
ആവശ്യമുള്ള സാധനങ്ങള്‍
- കടല ഒന്നര കപ്പ്
- ചേന 2 കപ്പ്
- തേങ്ങാ 2 കപ്പ്
- വറ്റല്‍മുളക് 6-10 എണ്ണം
- വാളന്‍ പുളി ഒരു കുഞ്ഞു കഷ്ണം
- കടുക്, കറിവേപ്പില, ഒരു ടേബിള്‍സ്പൂണ്‍ തേങ്ങാ, എണ്ണ താളിക്കാന്‍
തയ്യാറാക്കുന്ന വിധം
കടലയും ചേന കഷ്ണങ്ങളും ഉപ്പ് ചേര്‍ത്ത് വേവിയ്ക്കുക. വറ്റല്‍മുളക് അല്പം എണ്ണയില്‍ ചുവക്കെ വറുക്കുക. തേങ്ങയും മുളകും പുളിയും മഷി പോലരയ്ക്കുക. അരപ്പ് വെന്ത കടലയില്‍ ചേര്‍ത്തു നന്നായി തിളപ്പിക്കുക. കറിയുടെ അയവ് നിങ്ങളുടെ ഇഷ്ടാനുസരണം തീരുമാനിക്കാം. ഒഴിച്ചു കറിയായോ അല്ലെങ്കില്‍ അല്പം കട്ടി കൂട്ടി കൂട്ട് കറിയായോ വിളമ്പാം. തിളച്ച കറി വാങ്ങി വെച്ച് കടുകും കറിവേപ്പിലയും തേങ്ങയും വറുത്തു താളിക്കാം .
Content Highlights: chana khasi, konkani vasari, konkani food, recipe, food