പുതിയ ബില്‍ അമേരിക്കയില്‍ വിദ്യാഭ്യാസം സ്വപ്‌നം കാണുന്നവര്‍ക്ക് വിനയാകുമോ?
ലോകത്തെതന്നെ മികച്ച നിലവാരമുള്ള വിദ്യാഭ്യാസവും സമാനതകളില്ലാത്ത അവസരങ്ങളുമുള്ള ഒരു രാജ്യമാണ് അമേരിക്ക. പത്തു ലക്ഷത്തിലധികം വിദേശവിദ്യാർഥികളാണ് അവിടെ പഠിക്കുന്നത്. ഇതിൽ ഏറ്റവും കൂടുതൽ പേർ ഇന്ത്യയിൽ നിന്നാണ്. 2024 ലെ കണക്കനുസരിച്ച് പതിനൊന്നു ലക്ഷം വിദേശവിദ്യാർഥികളാണ് അവിടെ പഠിക്കുന്നത്. സാധാരണഗതിയിൽ വിദേശവിദ്യാർഥികളിൽ ബഹുഭൂരിപക്ഷവും പഠനത്തോടൊപ്പവും പഠനത്തിന് ശേഷവും അവിടെ തൊഴിൽ ചെയ്യുകയും ഏറെപ്പേർ സ്ഥിരതാമസമാക്കുകയും പൗരത്വം നേടുകയും ചെയ്യാറുണ്ട്. ഇതെല്ലാം തികച്ചും നിയമവിധേയമായ കാര്യവുമാണ്. അമേരിക്കൻ വിദ്യാഭ്യാസത്തിന്റെ സാങ്കേതിക മികവിനോടൊപ്പം അവിടെ തൊഴിൽ ചെയ്യാനുള്ള സാഹചര്യവും അവസരങ്ങളും കൂടിയാണ് അമേരിക്കയെ വിദേശ വിദ്യാർഥികളുടെ, പ്രത്യേകിച്ചും ഇന്ത്യൻ വിദ്യാർഥികളുടെ പ്രിയപ്പെട്ട ഡെസ്റ്റിനേഷൻ ആക്കിയത്.
അമേരിക്കൻ കോൺഗ്രസിൽ ഇക്കഴിഞ്ഞ മാർച്ച് 25 ന് അവതരിപ്പിച്ച ഒരു ബിൽ അമേരിക്കയിലുള്ള വിദേശവിദ്യാർഥികളിൽ വലിയ ഉത്കണ്ഠ ഉണ്ടാക്കിയിരിക്കുന്നു. വിദ്യാർഥികൾക്ക് പഠനകാലത്തും അതിന് ശേഷവും യൂണിവേഴ്‌സിറ്റിക്ക് പുറത്ത് തൊഴിൽചെയ്യാനുള്ള അവസരം ഇല്ലാതാക്കുകയാണ് ഈ ബില്ലിന്റെ ലക്ഷ്യം. ഇപ്പോൾ അമേരിക്കയിലെത്തുന്ന വിദേശവിദ്യാർഥികളിൽ ഭൂരിഭാഗവും ഇന്ത്യക്കാരാണ്. ഇന്ത്യൻ മാധ്യമങ്ങളാണ് ഈ വാർത്ത വലിയ പ്രാധാന്യത്തോടെ റിപ്പോർട്ട് ചെയ്തത്. ഈ ബില്ലിന്റെ പശ്ചാത്തലം, പ്രത്യാഘാതങ്ങൾ, ബിൽ പാസ്സാകാനുള്ള സാധ്യത, അമേരിക്കയിലെ മാറിയ രാഷ്ട്രീയസാഹചര്യങ്ങളിൽ വിദേശരാജ്യങ്ങളിൽനിന്നുള്ള വിദ്യാർഥികൾ ശ്രദ്ധിക്കേണ്ട കാര്യങ്ങൾ എന്നിവയാണ് ഈ ലേഖനത്തിലെ ഉള്ളടക്കം.
Content Highlights: US Bill Threatens OPT: Impact on Indian Students