മുഖ്യമന്ത്രി അറിയാൻ, വെള്ളരിക്കാപ്പട്ടണമല്ല കേരളം | വഴിപോക്കൻ

താൻ ഒരു നെഹ്രുവിയൻ സോഷ്യലിസ്റ്റാണെന്ന് മുഖ്യമന്ത്രി വി.ഡി. സതീശൻ ഇടയ്ക്കിടക്ക് പറയാറുണ്ട്. നല്ലൊരു വായനക്കാരനാണ് താനെന്നും വി.ഡി.എസ്. അഭിമാനപൂർവ്വം പറയാറുണ്ട്. ടാറ്റ ഗ്രൂപ്പ് മേധാവിയായിരുന്ന ജെ.ആർ.ഡി. ടാറ്റയുമായി ഇന്ത്യ ടുഡെയ്ക്ക് വേണ്ടി 1986-ൽ പത്രപ്രവർത്തകൻ ടി.എൻ. നൈനാൻ നടത്തിയ അഭിമുഖം വായിച്ചിട്ടില്ലെങ്കിൽ വി.ഡി.എസ്. ഒന്ന് വായിക്കുന്നത് നന്നായിരിക്കും. പ്രധാനമന്ത്രിയായിരിക്കെ ജവഹർലാൽ നെഹ്രുവുമായി സാമ്പത്തിക നയങ്ങൾ ചർച്ച ചെയ്യാൻ പലപ്പോഴും ശ്രമിച്ചിട്ടുണ്ടെന്നും എന്നാൽ നെഹ്രുവിന് അതിലൊട്ടും താൽപര്യമുണ്ടായിരുന്നില്ലെന്നും നൈനാനോട് ജെ.ആർ.ഡി. ടാറ്റ പറയുന്നുണ്ട്. സാമ്പത്തിക നയങ്ങളെക്കുറിച്ച് സംസാരിക്കാൻ തുടങ്ങിയാൽ നെഹ്രു ജനലിലൂടെ പുറത്തേക്ക് നോക്കിയിരിക്കുമെന്നാണ് ടാറ്റ വെളിപ്പെടുത്തിയത്. കോൺസ്ര് സർക്കാരിന്റെ സാമ്പത്തിക നയങ്ങളെക്കുറിച്ച് നെഹ്രുവിന് സുവ്യക്തമായ കാഴ്ചപ്പാടുകളുണ്ടായിരുന്നു. അത് പക്ഷേ, ടാറ്റയുമായോ ബിർളയുമായോ ചർച്ച ചെയ്ത് തീരുമാനിക്കേണ്ട വിഷയങ്ങളല്ല എന്നായിരുന്നു നെഹ്രുവിന്റെ കാഴ്ചപ്പാട്.

ടാറ്റയുമായി മാത്രമല്ല, ബിർളയുമായും നെഹ്രുവിന് വലിയ ബന്ധമുണ്ടായിരുന്നില്ല. ബ്രിട്ടീഷ് ഭരണകൂടം സ്വത്തുക്കൾ കണ്ടുകെട്ടിയപ്പോൾ നെഹ്രു കുറച്ച് സാമ്പത്തിക പ്രതിസന്ധി നേരിട്ടിരുന്നു. ഇത് ഗാന്ധിജിയിലൂടെ അറിഞ്ഞ ജി.ഡി. ബിർള അലഹബാദിലെ ആനന്ദഭവനിൽ നെഹ്രുവിനെ കാണാനെത്തി. എന്നാൽ, ബിർളയുടെ സഹായവാഗ്ദാനം സ്നേഹപൂർവ്വം നിരസിക്കുകയാണ് നെഹ്രു ചെയ്തത്. നെഹ്രുവിന് നിരാകരിക്കാൻ പറ്റാത്ത ഒരോഫറും ഇന്ത്യൻ വ്യവസായികളുടെ കയ്യിലുണ്ടായിരുന്നില്ല. ടാറ്റയുടെയും ബിർളയുടെയും നേതൃത്വത്തിൽ രൂപം നൽകിയ ബോംബെ പ്ലാനിന് അടിസ്ഥാനപരമായി നെഹ്രുവിയൻ സാമ്പത്തിക ദർശനത്തോട് അടുപ്പമുണ്ടായിരുന്നെങ്കിലും ഒരു ഘട്ടത്തിലും പഞ്ചവത്സര പദ്ധതിയുടെ ആവിഷ്‌കാരത്തിൽ നെഹ്രു ഈ പദ്ധതിയെക്കുറിച്ച് പരാമർശിക്കുക പോലുമുണ്ടായില്ല. അതുകൊണ്ടു തന്നെ സ്വതന്ത്ര വിപണി എന്ന ആശയമുയർത്തിപ്പിടിച്ച് രാജാജി സ്വതന്ത്ര പാർട്ടി തുടങ്ങിയപ്പോൾ ആ സംരംഭവുമായി സഹകരിക്കാൻ ടാറ്റയ്ക്കും ബിർളയ്ക്കും സന്തോഷമേ ഉണ്ടായിരുന്നുള്ളു. ടാറ്റ ബിർള ഡാൽമിയ പാർട്ടി എന്നാണ് കോൺഗ്രസുകാർ രാജാജിയുടെ പാർട്ടിയെ പരിഹസിച്ചിരുന്നത്.

Content Highlights: Nehru's economic policies were distinct and not influenced by industrialists like Tata and Birla, despite their attempts to engage with him; Gandhi, however, maintained transparent relationships with industrialists. Political leaders in India have historically maintained secretive relationships with industrialists, fearing public backlash, but Narendra Modi's open association with industrialists like Gautam Adani marks a departure from this norm. Kerala's Chief Minister V.D. Satheesan faces criticism for accepting sponsored travel and accommodations, raising concerns about transparency and ethical governance, echoing broader issues of crony capitalism in Indian politics.