കെ റെയിൽ കുഴിച്ചുമൂടുമ്പോൾ | വഴിപോക്കൻ

കെ റെയിൽ പഴങ്കഥയായിരിക്കുന്നു. ഇത്രയും ജനവിരുദ്ധമായ ഒരു പദ്ധതി ഒരു സർക്കാരും അടുത്ത കാലത്തെങ്ങും കേരളത്തിൽ ഇതുപോലെ അടിച്ചേൽപിക്കാൻ നോക്കിയിട്ടില്ല. അതുകൊണ്ടു തന്നെ കെ റെയിലിന്റെ പ്രതീകമായി മാറിയ മഞ്ഞക്കുറ്റികൾ ജനങ്ങൾ ആവേശപൂർവ്വം പിഴുതുമാറ്റുമ്പോൾ അത് കണ്ടറിഞ്ഞ് മാദ്ധ്യമങ്ങൾ ആഘോഷിച്ചു.

2022-ൽ തൃക്കാക്കരയിൽ നടന്ന ഉപതിരഞ്ഞെടുപ്പിൽ കെ റെയിലായിരുന്നു ഇടത് മുന്നണിയുടെ അജണ്ടകളിലൊന്ന്. കേരളത്തെ വികസനത്തിന്റെ പറുദീസയാക്കുന്ന പദ്ധതിയാണ് കെ റെയിൽ എന്നായിരുന്നു അന്ന് തൃക്കാക്കരയിൽ തമ്പടിച്ച് നടത്തിയ പ്രചാരണത്തിൽ പിണറായി വിജയനും സിപിഎമ്മും ഉദ്ഘോഷിച്ചത്. ജനം പക്ഷേ, ആ വായ്ത്താരികൾ തള്ളിക്കളഞ്ഞു. തൊട്ട് തലേവർഷം പി.ടി. തോമസ് 14,319 വോട്ടിന്റെ ഭൂരിപക്ഷത്തിലാണ് ജയിച്ചതെങ്കിൽ ഉമ തോമസിന്റെ ഭൂരിപക്ഷം 25,016 ആയി ഉയർന്നു. ഇക്കഴിഞ്ഞ മെയിൽ 50,211 വോട്ടുകളുടെ തകർപ്പൻ ഭൂരിപക്ഷത്തിലാണ് തൃക്കാക്കരക്കാർ ഉമയെ രണ്ടാം വട്ടം നിയമസഭയിലേക്ക് അയച്ചിരിക്കുന്നത്.

Content Highlights: The newly formed Kerala government led by V. D. Satheesan has officially cancelled the controversial, environmentally hazardous K-Rail Silverline project, marking a historic victory for public protests and sustainable development.