മുന്തിരിക്കുല പോലെ കായ്‌കൾ, രുചിയിൽ ഹൃദ്യം; ‘ഡുക്കോങ്ങ്’ ഫിലിപ്പീൻസിലെ അത്ഭുത മധുരം

ഒരു നാടോടിക്കഥയിൽനിന്ന് തുടങ്ങാം; ഫിലിപ്പീൻസിൽ പ്രചാരത്തിലുള്ള ഒരു കഥയാണ്. ക്ഷീണിച്ചവശനായ ഒരു യാചകൻ തെരുവിലൂടെ അലഞ്ഞുതിരിഞ്ഞു നടക്കുമ്പോഴാണ് നിറയെ കായ്‌കളുമായി നിൽക്കുന്ന ഒരു ഫലവൃക്ഷം യാദൃശ്ചികമായി കാണുന്നത്. ദിവസങ്ങളായി എന്തെങ്കിലും കഴിച്ചിട്ടുണ്ടായിരുന്നില്ല. അയാൾ ആർത്തിയോടെ ആ മരത്തിനരികിലെത്തി. മുന്തിരിക്കുലകൾ പോലെ പിടിച്ചു കിടക്കുന്ന കായ്കൾ ആർത്തിയോടെ അടർത്തിയെടുത്തു കഴിച്ചു. പെട്ടെന്നാണ് അയാൾ മറിഞ്ഞുവീണത്. നിമിഷങ്ങൾക്കുള്ളിൽ ആ യാചകൻ മരിക്കുകയും ചെയ്തു. ഈ സംഭവം അറിഞ്ഞ ഗ്രാമവാസികൾ സത്യം എന്തെന്നറിയാതെ പിന്നീട് കുറേ നാൾ ആ പഴം കഴിക്കാൻ എടുത്തിരുന്നതേയില്ല.

കുറച്ചുനാൾ കഴിഞ്ഞപ്പോൾ അതിസുന്ദരിയായ ഒരു യുവതി ആ ഗ്രാമത്തിലെത്തി. കണ്ടാൽ ഒരു മാലാഖയെന്നോ, അന്യദേശത്തുനിന്നുള്ള ഒരു സ്ത്രീയെന്നോ തോന്നും. അതേ മരം നിറയെ പഴയതുപോലെ നിറയെ കായ്കൾ പിടിച്ചുകിടക്കുന്നതു കണ്ട് അവൾ അതിൽ നിന്ന് കുറേ പഴങ്ങൾ അടർത്തിയെടുത്തു കഴിച്ചു. വിളഞ്ഞ പഴങ്ങളുടെ പുറംതൊലി വിരലുകൾ കൊണ്ട് നുള്ളിനീക്കി അവ കഴിക്കാൻ തുടങ്ങി. പഴങ്ങൾ കഴിച്ച ആ യുവതി സന്തോഷത്തോടെ നൃത്തം വയ്ക്കുകയും ചെയ്‌തു. ഇത് കണ്ട് ഗ്രാമവാസികൾ ഒന്നടങ്കം ആ പഴങ്ങൾ ഇറുത്തെടുക്കാനും ആ യുവതിയോടൊപ്പം ചേർന്ന് പഴങ്ങൾ കൂട്ടത്തോടെ കഴിക്കാനും തുടങ്ങി.

Content Highlights: The Duku (Lanzones) fruit is a sweet tropical delicacy from Southeast Asia, celebrated annually through the vibrant Lanzones Festival in the Philippines, and is widely recognized for its high antioxidant content and versatile medicinal properties.