മാമ്പഴം, പപ്പായ, തണ്ണിമത്തൻ എന്നിവയുടെ സമ്മിശ്രസ്വാദ്; ആമസോണിൽ നിന്നെത്തിയ വൈറൽ ‘ചുപ്പാ ചുപ്പാ’

ഫിലിപ്പീൻസിലെ കോഗോൺ പബ്ലിക്ക് മാർക്കെറ്റിൽ അന്ന് സാധനങ്ങൾ വാങ്ങാനെത്തിയവർ അതുകണ്ട് അത്ഭുതപ്പെട്ടു; പൊതുവെ ഫിലിപ്പീൻസിലെ വളരെ തിരക്കുപിടിച്ച വിപണിയാണ് കോഗോൺ. പഴങ്ങൾ, പച്ചക്കറികൾ, പൂക്കൾ, വീട്ടാവശ്യത്തിനുള്ള സാധനങ്ങൾ, മത്സ്യം, മാംസം എന്ന് വേണ്ട എന്തും ഏതും കോഗോൺ മാർക്കെറ്റിൽ കിട്ടും. അവിടുത്തെ ഏറ്റവും വലിയ പ്രാദേശിക വിപണി എന്നുതന്നെ പറയാം. ഈയടുത്ത കാലത്താണ്-കൃത്യമായി പറഞ്ഞാൽ-2025 ഓഗസ്റ്റ് മാസം ഒരു പ്രത്യേക തരം പഴം മാർക്കെറ്റിൽ കൈവണ്ടികളിൽ കച്ചവടക്കാർ വില്പനയ്ക്ക് നിരത്തിവച്ചിരിക്കുന്നു. അതിൽ തന്നെ ആളുകളെ ആകർഷിക്കാൻ വേണ്ടി കുറച്ചു പഴങ്ങൾ നന്നായി മുറിച്ച് ഉൾഭാഗം തുറന്നും വച്ചിട്ടുണ്ട്; നല്ല ഓറഞ്ച് നിറം കലർന്ന മഞ്ഞനിറമുള്ള അകക്കാമ്പ്. പഴത്തിന്റെ പുറംതോലിന് നല്ല കട്ടിയുണ്ട്, ബ്രൗൺ കലർന്ന പച്ചനിറവുമാണ്.

സ്വാഭാവികമായും പുതിയ ഒരതിഥിയെ മാർക്കറ്റിൽ അങ്ങോളമിങ്ങോളം കണ്ടപ്പോൾ ആളുകൾ അവയ്ക്കു ചുറ്റും കൂടി; ചോദ്യങ്ങളായി, അന്വേഷണങ്ങളായി. ചിലർ അത് തൊട്ടും തലോടിയും നോക്കി. മറ്റു ചിലർ രുചിച്ചു നോക്കി. വിളഞ്ഞുപഴുത്ത മാമ്പഴത്തിന്റെയും പപ്പായയുടെയും തണ്ണിമത്തന്റെയും സമ്മിശ്രസ്വാദുള്ള അകക്കാമ്പ്. കണ്ടാൽ ഒരു ചെറിയ നാളികേരമോ സപ്പോട്ടയോ പോലിരിക്കും. ഉള്ളിൽ നാലഞ്ചു വിത്തുകളും. എന്തായാലും അടുത്ത ഒരു മണിക്കൂർ കൊണ്ട് അന്ന് മാർക്കറ്റിൽ എത്തിയ ആ സവിശേഷ ഫലം മുഴുവൻ തീർന്നു എന്ന് പറഞ്ഞാൽ മതിയല്ലോ. ഇതാണ് വന്നു, കണ്ടു, കീഴടക്കി എന്ന് പറയുന്നതുപോലെ ഒരു മധുരഫലത്തിന്റെ മനംമയക്കാനുള്ള സവിശേഷസിദ്ധി. ഇതാണ് "ചുപ്പാ ചുപ്പാ" എന്ന് പേരായ മധുരഫലത്തിന്റെ നാടകീയമായ രംഗപ്രവേശം.

Content Highlights: The Amazon-native exotic fruit 'Chupa Chupa' is becoming viral on social media and gaining huge popularity among farmers and nurseries in Kerala due to its unique mixed flavor, ease of cultivation, and rich nutritional value.