റണ്വേയില്നിന്ന് തെന്നിമാറി, വിമാനം തകര്ന്നുവീണത് പറന്നുയരുന്നതിനിടെ | VIDEO
നേപ്പാളില് 18 പേരുടെ മരണത്തിനിടയാക്കിയ വിമാനാപകടത്തില് വിമാനം തകര്ന്നുവീണത് പറന്നുയരാന് ശ്രമിക്കുന്നതിനിടെ. കാഠ്മണ്ഡുവിലെ ത്രിഭുവന് അന്താരാഷ്ട്ര വിമാനത്താവളത്തില്നിന്ന് പറന്നുയരുന്നതിനിടെ റണ്വേയില്നിന്ന് തെന്നിമാറിയ വിമാനം താഴ്ചയിലേക്ക് പതിച്ച് കത്തുകയായിരുന്നു. 19 പേരാണ് വിമാനത്തിലുണ്ടായിരുന്നത്. ഗുരുതരമായി പരിക്കേറ്റ പൈലറ്റ് ചികിത്സയിലാണ്.
ബുധനാഴ്ച രാവിലെ 11 മണിയോടെയാണ് അപകടമുണ്ടായത്. പൊഖ്റയിലേക്ക് പുറപ്പെട്ട ശൗര്യ എയര്ലൈന്സിന്റെ വിമാനമാണ് തകര്ന്നത്. കത്തിയമര്ന്ന വിമാനത്തിന്റെ അവശിഷ്ടങ്ങള് ചിതറിക്കിടക്കുന്ന ചിത്രങ്ങളും വീഡിയോകളും മാധ്യങ്ങള് പുറത്തുവിട്ടിട്ടുണ്ട്. റണ്വേയില്നിന്ന് വിമാനം എങ്ങനെ തെന്നിമാറി എന്നകാര്യം വ്യക്തമല്ല. നേപ്പാളിലെ അന്താരാഷ്ട്ര- ആഭ്യന്തര സര്വ്വീസുകള് നടത്തുന്ന പ്രധാന വിമാനത്താവളമാണ് ത്രിഭുവന്.