തിരുവനന്തപുരം പ്രസ് ഇൻഫർമേഷൻ ബ്യൂറോ സംഘം കൊണാർക്ക് സൂര്യക്ഷേത്രം സന്ദർശിച്ചു

കൊണാർക്ക് (ഒഡിഷ): കേരളം, പഞ്ചാബ്, രാജസ്ഥാൻ എന്നിവിടങ്ങളിൽ നിന്നുള്ള മാധ്യമപ്രവർത്തകരുടെയും പ്രസ് ഇൻഫർമേഷൻ ബ്യൂറോ (പി.ഐ.ബി.) ഉദ്യോഗസ്ഥരുടെയും സംയുക്ത സംഘം യുനെസ്കോ ലോക പൈതൃക കേന്ദ്രമായ കൊണാർക്ക് സൂര്യക്ഷേത്രം സന്ദർശിച്ചു. ആർക്കിയോളജിക്കൽ സർവേ ഓഫ് ഇന്ത്യയുടെ സംരക്ഷണയിലുള്ള സൂര്യക്ഷേത്രത്തിലെ ഈ സന്ദർശനം ഒഡിഷയുടെ സമ്പന്നമായ സാംസ്കാരിക, വാസ്തുവിദ്യാ പൈതൃകം അടുത്തറിയാൻ മാധ്യമപ്രവർത്തകർക്ക് അവസരംലഭിച്ചു.

കേന്ദ്ര വാർത്താവിതരണ പ്രക്ഷേപണ മന്ത്രാലയത്തിന് കീഴിലുള്ള പി.ഐ.ബി. സംഘടിപ്പിക്കുന്ന ആറ് ദിവസം നീണ്ടുനിൽക്കുന്ന ഒഡിഷ മാധ്യമ പര്യടനത്തിന്റെ ഭാഗമായാണ് ഈ സന്ദർശനം. പി.ഐ.ബി. ഡെപ്യൂട്ടി ഡയറക്ടർ ഡോ. ആതിര തമ്പി ഐ.ഐ.എസ്., ഇൻഫർമേഷൻ അസിസ്റ്റന്റ് ശ്രീമതി നിഖിത എ.എസ്. എന്നിവരാണ് കേരളത്തിൽനിന്നുള്ള മാധ്യമസംഘത്തെ അനുഗമിക്കുന്നത്.

ഒഡിഷയുടെ വികസന പദ്ധതികൾ, ചരിത്ര-സാംസ്കാരിക പൈതൃകം, ദുരന്തനിവാരണ രംഗത്തെ മികച്ച മാതൃകകൾ, പ്രമുഖ കേന്ദ്ര ഗവേഷണ സ്ഥാപനങ്ങളുടെ പ്രവർത്തനം എന്നിവ നേരിട്ടുകണ്ട് മനസ്സിലാക്കുകയാണ് ഈ സന്ദർശനത്തിന്റെ ലക്ഷ്യം. പര്യടനത്തിന്റെ ഭാഗമായി പുരി ശ്രീ ജഗന്നാഥ ക്ഷേത്രം, രഘുരാജ്പൂർ പൈതൃക കരകൗശല ഗ്രാമം, ലിംഗരാജ് ക്ഷേത്രം, ഖണ്ഡഗിരി-ഉദയഗിരി ഗുഹകൾ, വേൾഡ് സ്കിൽ സെന്റർ തുടങ്ങിയ കേന്ദ്രങ്ങളും സംഘം സന്ദർശിക്കും. കൂടാതെ ഒഡിഷ ഗവർണർ, മുഖ്യമന്ത്രി, സ്പീക്കർ എന്നിവരുമായും സംഘം കൂടിക്കാഴ്ച നടത്തും.

Content Highlights: Joint media delegation from Kerala, Punjab, and Rajasthan visited Konark Sun Temple., Tour is organized by PIB Thiruvananthapuram as part of a 6-day Odisha media tour., Aims to explore Odisha's heritage, development projects, and cultural landmarks., Delegation scheduled to meet the Governor, Chief Minister, and Speaker of Odisha.