ആണവയുദ്ധം നേരിടൽ ഇനി ലോകത്തിന് എളുപ്പമല്ല, ലോകം മുഴുവന് പട്ടിണിയിലാകുമെന്ന് പഠനം
ആണവസംഘര്ഷം ഉണ്ടായാല് അത് മനുഷ്യരാശിയുടെ നിലനില്പ്പിന് തന്നെ ഭീഷണിയാകുമെന്ന് പെന്സില്വാനിയ സ്റ്റേറ്റ് യൂണിവേഴ്സിറ്റിയിലെ ശാസ്ത്രജ്ഞര് നടത്തിയ പഠനം മുന്നറിയിപ്പ് നല്കുന്നു. ആണവസ്ഫോടനങ്ങളുടെ ഫലമായുണ്ടാകുന്ന പുകയും പൊടിപടലങ്ങളും അന്തരീക്ഷത്തില് സൂര്യപ്രകാശത്തെ തടയുകയും, ഇത് ആഗോളതലത്തില് വിളനാശത്തിന് കാരണമാകുകയും ചെയ്യും. ഇതിന്റെ ഫലമായി ഭക്ഷ്യവിതരണം ഗുരുതരമായി തടസ്സപ്പെടുമെന്നും ഗവേഷകര് ചൂണ്ടിക്കാട്ടുന്നു. 'എന്വയോണ്മെന്റ് റിസര്ച്ച് ലെറ്റേഴ്സ്' എന്ന ശാസ്ത്രജേണലില് പ്രസിദ്ധീകരിച്ച ഈ പഠനം, ആണവയുദ്ധത്തിന്റെ ദൂരവ്യാപകമായ പ്രത്യാഘാതങ്ങള് വ്യക്തമാക്കുന്നതാണ്.
വിളകളിലെ ആഘാതം: ചോളത്തെ മാതൃകയാക്കി പഠനം
ആണവസ്ഫോടനങ്ങളുടെ ഫലങ്ങള് വിളകളില് എങ്ങനെ പ്രതിഫലിക്കുമെന്ന് മനസ്സിലാക്കാന്, ലോകമെമ്പാടും ഏറ്റവും കൂടുതല് കൃഷിചെയ്യപ്പെടുന്ന വിളയായ ചോളത്തെ ഗവേഷകര് പഠനത്തിനായി തെരഞ്ഞെടുത്തു. ആണവസ്ഫോടനങ്ങളില്നിന്നുള്ള തീഗോളവും പുകയും അന്തരീക്ഷത്തിലെ സ്ട്രാറ്റോസ്ഫിയറില് നൈട്രജന് ഓക്സൈഡുകള് ഉല്പാദിപ്പിക്കും. ഇവ ഓസോണ് പാളിയെ നശിപ്പിക്കുകയും, സൂര്യനില്നിന്നുള്ള അള്ട്രാവയലറ്റ്-ബി (UV-B) വികിരണങ്ങള് കൂടുതലായി ഭൂമിയിലെത്താന് അനുവദിക്കുകയും ചെയ്യും. ഈ വികിരണങ്ങള് സസ്യകോശങ്ങളെ നശിപ്പിക്കുകയും, വിളകളുടെ വളര്ച്ചയെ തടസ്സപ്പെടുത്തുകയും, ഭക്ഷ്യോല്പാദനത്തെ ഗുരുതരമായി ബാധിക്കുകയും ചെയ്യും.
ആണവയുദ്ധത്തിന്റെ ആഘാതം 6 മുതല് 8 വര്ഷം വരെ മൂര്ധന്യത്തില് തുടരുമെന്ന് സസ്യശാസ്ത്രജ്ഞനും കാലാവസ്ഥാ വിദഗ്ധനുമായ യൂനിങ് ഷി വ്യക്തമാക്കി. ''ആണവസ്ഫോടനങ്ങള്ക്ക് ശേഷം വിളകളില് യുവി-ബി വികിരണം ഉണ്ടാക്കുന്ന ആഘാതം കണക്കാക്കുന്ന ആദ്യത്തെ സമഗ്ര പഠനമാണ് ഇത്,'' അദ്ദേഹം പറഞ്ഞു. ഓസോണ് പാളിയുടെ നാശം മൂലം യുവി-ബി വികിരണങ്ങള് വര്ധിക്കുന്നത്, കാര്ഷികോല്പാദനത്തെ വര്ഷങ്ങളോളം പ്രതികൂലമായി ബാധിക്കും.
ആഗോള ഭക്ഷ്യക്ഷാമത്തിന്റെ മുന്നറിയിപ്പ്
ആണവസംഘര്ഷത്തിന്റെ ഫലമായുണ്ടാകുന്ന അന്തരീക്ഷ മലിനീകരണവും പ്രകാശക്കുറവും ഭക്ഷ്യോല്പാദനത്തില് കനത്ത ആഘാതമുണ്ടാക്കും. ലോകമെമ്പാടുമുള്ള ജനങ്ങള്ക്ക് ഭക്ഷ്യലഭ്യത കുറയുന്നത് ഗുരുതരമായ പ്രത്യാഘാതങ്ങള്ക്ക് കാരണമാകും. ''ആണവയുദ്ധം ഒരു പ്രദേശത്തെ മാത്രമല്ല, ആഗോള ജനതയെ മുഴുവന് ബാധിക്കുന്ന ദുരന്തമായിരിക്കും,'' എന്നാണ് ഗവേഷകര് ഈ പഠനത്തിലൂടെ മുന്നറിയിപ്പ് നല്കുന്നത്.
Content Highlights: Study reveals devastating effects of nuclear war on global food production,highlighting crop failure