മൈക്രോസോഫ്റ്റിന് റെക്കോർഡ് വരുമാനം; എഐ 'സൂപ്പർ ആപ്പ്' ഉടൻ പുറത്തിറക്കുമെന്ന് സത്യ നാദെല്ല

ന്യൂഡൽഹി: സാമ്പത്തിക വർഷത്തിൽ റെക്കോർഡ് വരുമാനം നേടി മൈക്രോസോഫ്റ്റ്. കമ്പനിയുടെ വാർഷിക വരുമാനം 33,100 കോടി ഡോളർ കടന്നതായി മൈക്രോസോഫ്റ്റ് സിഇഒ സത്യ നാദെല്ല പറഞ്ഞു. ഇതിനു പിന്നാലെ, ഓപ്പൺഎഐ, ആന്ത്രോപിക് തുടങ്ങിയ കമ്പനികൾക്ക് വെല്ലുവിളിയുയർത്തിക്കൊണ്ട് എഐ 'സൂപ്പർ ആപ്പ്' ഉടൻ പുറത്തിറക്കുമെന്നും അദ്ദേഹം പ്രഖ്യാപിച്ചു.

കമ്പനിയുടെ മൊത്തം ക്ലൗഡ് ബിസിനസ് 21,400 കോടി ഡോളർ വരുമാനം നേടി. മൈക്രോസോഫ്റ്റിന്റെ പ്രധാന ക്ലൗഡ് സേവനമായ 'അഷ്വർ' (Azure) ചരിത്രത്തിലാദ്യമായി 10,000 കോടി ഡോളർ വരുമാനം തികച്ചു. കൂടാതെ, കമ്പനിയുടെ സൗജന്യ പണലഭ്യത (Free cash flow) സാമ്പത്തിക വിദഗ്ധരുടെ കണക്കുകൂട്ടലുകൾക്കും മുകളിൽ 1,960 കോടി ഡോളറായി ഉയർന്നു.

എന്താണ് എഐ സൂപ്പർ ആപ്പ്?

മൈക്രോസോഫ്റ്റിന്റെ എഐ ചാറ്റ്‌ബോട്ടായ 'കോപൈലറ്റ്' (Copilot) വെറുമൊരു ചാറ്റ്‌ബോട്ട് എന്നതിലുപരി ഒരു സൂപ്പർ ആപ്പായി അതിവേഗം മാറിക്കൊണ്ടിരിക്കുകയാണെന്ന് നാദെല്ല പറഞ്ഞു. കോപൈലറ്റ് ചാറ്റ്‌ബോട്ട്, കോഡിങ് അസിസ്റ്റന്റായ ഗിറ്റ്‌ഹബ് കോപൈലറ്റ്, കോപൈലറ്റ് കൊവർക്ക് , ഓട്ടോപൈലറ്റ് സിസ്റ്റം എന്നിവയെല്ലാം ഒരൊറ്റ പ്ലാറ്റ്‌ഫോമിൽ അണിനിരത്തുന്നതായിരിക്കും ഈ സൂപ്പർ ആപ്പ്.

സ്വന്തം എഐ മോഡലുകളും ചിപ്പുകളും

എഐ മോഡലുകൾക്കും സ്വന്തം ചിപ്പുകൾക്കുമായി മൈക്രോസോഫ്റ്റ് കൂടുതൽ സ്വയംപര്യാപ്തത കൈവരിക്കുകയാണെന്നും നാദെല്ല പറഞ്ഞു. മുൻപ് കോപൈലറ്റ് ഉത്പന്നങ്ങൾക്കായി ഓപ്പൺഎഐയെയായിരുന്നു കമ്പനി പ്രധാനമായും ആശ്രയിച്ചിരുന്നത്. മൈക്രോസോഫ്റ്റിന്റെ എം365 കോപൈലറ്റിന്റെ (M365 Copilot) പണമടച്ചുള്ള വരിസംഖ്യാക്കാരുടെ എണ്ണം മുൻ പാദത്തിലെ രണ്ടു കോടിയിൽനിന്ന് മൂന്നു കോടിയായി ഉയർന്നിട്ടുണ്ട്.

Content Highlights: Microsoft achieved a historic $331 billion in annual revenue, largely driven by its cloud business, and announced plans to transform its Copilot ecosystem into an AI 'Super App' to reduce reliance on OpenAI and challenge competitors.