പ്രിയ സാല്‍ഗോക്കര്‍.... ഇത് ഗോവയുടെ മാത്രം നഷ്ടമല്ല...

1956-ലെ സാല്‍ഗോക്കര്‍ ഫുട്‌ബോള്‍ ടീം. വിംസണ്‍ എന്നായിരുന്നു ക്ലബ്ബിന്റെ അന്നത്തെ പേര്‌ | Photo: twitter.com
1956-ലെ സാല്‍ഗോക്കര്‍ ഫുട്‌ബോള്‍ ടീം. വിംസണ്‍ എന്നായിരുന്നു ക്ലബ്ബിന്റെ അന്നത്തെ പേര്‌ | Photo: twitter.com

മനസിലേയ്ക്ക് ആദ്യം ഓടിക്കയറിയ ഫുട്ബോള്‍ വിഗ്രഹം ഡീഗോ മാറഡോണയല്ല. അതൊരു ഗോവക്കാരനാണ്. ആദ്യമായി മനസില്‍ കസേര വലിച്ചിട്ട് ഇരിപ്പുറപ്പിച്ച ടീം ഡീഗോയുടെ അര്‍ജന്റീനയുമല്ല. അത് നീണ്ടുമെലിഞ്ഞ ആ ഗോള്‍കീപ്പര്‍ ഉരുക്കുകോട്ട പോലെ ഗോള്‍ വല കാത്ത ക്ലബാണ്. കളിക്കളത്തിലെ ആദ്യ പ്രണയമെന്ന് വേണമെങ്കില്‍ പറയാം.

ആറിലോ ഏഴിലോ പഠിക്കുമ്പോഴാണ് കോഴിക്കോട് കോര്‍പറേഷന്‍ സ്റ്റേഡിയത്തിന്റെ നിറഞ്ഞുകവിഞ്ഞ അകം ആദ്യമായി കാണുന്നത്. നാഗ്ജി ട്രോഫിയുടെ പ്രതാപകാലമാണ്. ഫ്‌ളഡ്‌ലിറ്റില്‍ കുളിച്ചുനില്‍ക്കുന്ന മൈതാനത്ത് ആദ്യ കണ്ണിലുടക്കിയത് ബാറിന് കീഴില്‍ കൈകള്‍ വിടര്‍ത്തിനില്‍ക്കുന്ന പച്ചക്കുപ്പായക്കാരനാണ്. വെടിയുണ്ട കണക്ക് വരുന്ന പന്തുകളെ ഇടത്തോട്ടും വലത്തോട്ടും പറന്ന് അയാള്‍ കുത്തിയകറ്റി. ഉയര്‍ന്നുചാടി കൈക്കുള്ളിലാക്കി. അയാളുടെ കൈകളെ ഭേദിച്ച് അന്ന് സാല്‍ഗോക്കറിന്റെ വല കുലുക്കാന്‍ കരുത്തരായ മുഹമ്മദന്‍സിന് കഴിഞ്ഞതേയില്ല. കളി കഴിഞ്ഞ് അവസാന വണ്ടിക്ക് വീട്ടിലേയ്ക്ക് മടങ്ങുമ്പോള്‍ അങ്ങനെ ബ്രഹ്‌മാനന്ദ് ശംഖ്വാള്‍ക്കര്‍ എന്ന ആ ഗോള്‍കീപ്പറും സാല്‍ഗോക്കര്‍ എന്ന അയാളുടെ ക്ലബും കൂടെ കയറിപ്പോന്നു. പിന്നീട് വല കുലുക്കിയ പലരും, ഗ്ലാമറുള്ള ക്ലബുകള്‍ പലതും ഇഷ്ടക്കാരായി മനസിലേയ്ക്ക് വന്നു കയറി. എന്നിട്ടും വല കാത്ത ബ്രഹ്‌മാനന്ദും സാല്‍ഗോക്കറും മാത്രം ഇറങ്ങിപ്പോയില്ല. കീപ്പര്‍മാരുടെ വീരസാഹസങ്ങള്‍ പലതും കണ്ടു. എന്നിട്ടും ബ്രഹ്‌മാനന്ദിനോടുള്ള ഇഷ്ടം ഒരു പണത്തൂക്കം കുറഞ്ഞില്ല. അയാള്‍ നടത്തിയ അസംഖ്യം സേവുകള്‍ മനസിലങ്ങനെ ഒളിമങ്ങാതെ കിടന്നു.

Content Highlights: story of Legendary Salgaocar FC which shut down senior team operations

Continue reading