അന്നവസ്ത്രാദി മുട്ടാതെ തന്നു രക്ഷിച്ചു ഞങ്ങളെ | ദൈവദശകത്തിലെ ഗീതാസാരം 04
നാനൃഷി കവി എന്ന വാക്യത്തിന്റെ പരമമായ സൗന്ദര്യം അപ്പാടെ ഒപ്പിയെടുക്കുന്ന വരികളിലേക്ക് കടക്കുകയാണ് ദൈവദശകം. അതിഗഹനമായ ആശയപ്രപഞ്ചത്തിലേക്കുള്ള അനായാസപ്രവേശനം. ഒറ്റനോട്ടത്തില്‍ യാതൊരു വ്യാഖ്യാനവും ആവശ്യമില്ലാത്ത അതീവലളിതമായ വരികള്‍. അന്നവും വസ്ത്രവും നല്‍കി ഞങ്ങളെ രക്ഷിക്കുന്ന, ഞങ്ങളെ തൃപ്തരാക്കുന്ന നീ തന്നെയാണ് ഞങ്ങളുടെ തമ്പുരാന്‍.
ഒരിക്കല്‍ കൂടി ദൈവമേ എന്ന വിളിയിലേക്ക് ഗുരു ശിഷ്യരെ സന്നിവേശിപ്പിക്കുകയാണ്. നീ ഒന്നുതന്നെ ഞങ്ങള്‍ക്ക് തമ്പുരാന്‍ എന്നതാണത്. നീയും ഞങ്ങളുമായി ദ്വൈതഭാവം തുടരുകയാണ്. കര്‍മയോഗത്തിന്റെ തുടക്കത്തില്‍ എനിക്ക് ഭാവിയില്‍ യശസ്സാര്‍ജ്ജിക്കാന്‍ വേണ്ടതു മാത്രം ഉപദേശിക്കുക എന്ന് പറയുന്നുണ്ട് അര്‍ജ്ജുനന്‍. ഹേ അനഘാ, എന്ന് വിശേഷിപ്പിച്ചാണ് ഇവിടെ ഭഗവാന്‍ മറുപടി പറയുന്നത്.