പരസ്പരം പോരാടി താലിബാനും പാകിസ്താനും, ഇന്ത്യയോട് അടുത്ത് അഫ്ഗാൻ; പാകിസ്താന് തലവേദന

അഫ്ഗാനിസ്താനിൽ 1996-ൽ താലിബാൻ ആദ്യമായി അധികാരത്തിൽ എത്തുമ്പോൾ അവരെ ഔദ്യോഗികമായി അംഗീകരിച്ച മൂന്ന് രാജ്യങ്ങളിൽ ഒന്ന് പാകിസ്താനായിരുന്നു. സോവിയറ്റ്-അഫ്ഗാൻ യുദ്ധത്തിലും തുടർന്നുള്ള ആഭ്യന്തര സംഘർഷത്തിലും അവർ താലിബാനെ പിന്തുണച്ചു. നേതാക്കൾക്ക് അഭയവും പരിശീലനവും നൽകി. അവരെ ഇന്ത്യയ്‌ക്കെതിരായി ഉപയോഗിക്കാനും അഫ്ഗാനിൽ സ്വാധീനം വളർത്താനും ശ്രമിച്ചു. സെപ്റ്റംബർ 11 ആക്രമണത്തിന് ശേഷം യുഎസ് നേതൃത്വത്തിലുള്ള സഖ്യസേനയുമായി പരസ്യമായി സഹകരിച്ചെങ്കിലും പാകിസ്താൻ താലിബാൻ നേതാക്കൾക്ക്  ഗോത്രമേഖലകളിൽ സുരക്ഷിത താവളങ്ങൾ ഒരുക്കി. സമ്മർദ്ദമുണ്ടായിട്ടും താലിബാൻ നേതാക്കളെ രഹസ്യമായി  സംരക്ഷിച്ചു. അമേരിക്കൻ അധിനിവേശത്തിന് പിന്നാലെ അധികാരത്തിലെത്തിയ അഫ്ഗാൻ ഭരണകൂടവുമായി പാകിസ്താൻ ആ സൗഹൃദം തുടർന്നതുമില്ല.

2021-ൽ താലിബാൻ അധികാരത്തിൽ തിരിച്ചെത്തുമ്പോൾ ഇരുവരും വീണ്ടും അടുക്കുമെന്നാണ് കരുതപ്പെട്ടത്. അതുണ്ടായില്ല. താലിബാൻ-പാക് ബന്ധം വഷളാകുന്നതിന് ലോകം സാക്ഷിയായി. അഫ്ഗാൻ മണ്ണിൽ പാകിസ്താൻ ചെലുത്തുന്ന സൈനിക സമ്മർദ്ദവും വ്യോമാക്രമണങ്ങളും ഇരുവർക്കുമിടയിൽ അവിശ്വാസം വർധിപ്പിച്ചു. അടുത്ത കാലത്ത് അത് രൂക്ഷമായി. അഫ്ഗാനിസ്താൻ വിദേശകാര്യമന്ത്രി അമിർ ഖാൻ മുത്താഖിയുടെ ഇന്ത്യ സന്ദർശനവേളയിൽ ആരംഭിച്ച പാക്-അഫ്ഗാൻ അതിർത്തി സംഘർഷം അയവില്ലാതെ തുടരുകയാണ്.

Content Highlights: Explore the complex history of Pakistan-Afghanistan border disputes, the Taliban`s role, and the rising tensions involving the TTP