ചൈനയുടെ കണ്ണ് ബംഗ്ലാദേശിൽ! ഇന്ത്യയ്ക്ക് നിർണായകം; 30 വർഷത്തെ ഗംഗാ ജല കരാർ പുതുക്കുമോ?

ബംഗ്ലാദേശ് വിദേശകാര്യമന്ത്രി ഖലീലൂർ റഹ്‌മാൻ ഡൽഹിയിലെത്തുമ്പോൾ, ഇരുരാജ്യങ്ങളും തമ്മിലുള്ള നയതന്ത്ര ചർച്ചകളുടെ മുൻഗണനാ പട്ടികയിൽ ഏറ്റവും നിർണായകമാവുക നദീജലവുമായി ബന്ധപ്പെട്ട വിഷയങ്ങളായിരിക്കും. അതിൽതന്നെ, ദക്ഷിണേഷ്യയുടെ ജീവനാഡിയായ ഗംഗയിലെ ജലം പങ്കുവെയ്ക്കുന്നതിനെ ചൊല്ലിയുള്ള ചർച്ചകൾക്കായിരിക്കും ഇരുപക്ഷവും പ്രാധാന്യം നൽകുക. ഇന്ത്യയും ബംഗ്ലാദേശും തമ്മിലുള്ള ഉഭയകക്ഷി ബന്ധത്തിന്റെ ആണിക്കല്ലായി നിലകൊള്ളുന്നത് മൂന്ന് പതിറ്റാണ്ട് മുമ്പ് ഒപ്പുവെച്ച ഗംഗാ ജല കരാറാണ്. ഗംഗയിലെ വെള്ളം ഇരുരാജ്യങ്ങളും  എങ്ങനെ പങ്കിടണമെന്ന് നിർവചിക്കുന്ന ഈ ഉടമ്പടി, അയൽപക്ക സഹകരണത്തിന്റെ മികച്ച മാതൃകയായാണ് വിലയിരുത്തപ്പെടുന്നത്. പക്ഷേ, തർക്കങ്ങൾക്കും അവകാശവാദങ്ങൾക്കും കുറവില്ല താനും.

1996-ൽ ഒപ്പുവെച്ച ഗംഗാജലകരാറിന്റെ കാലാവധി ഈ വർഷം ഡിസംബറോടെ അവസാനിക്കുകയാണ്. കരാർ പുതുക്കേണ്ടത് ഇരുരാജ്യങ്ങളുടെയും നിലനിൽപ്പിനും താത്പര്യങ്ങൾക്കും അനിവാര്യമാണ്. ഇതിനായുള്ള പ്രാഥമിക ചർച്ചകൾക്ക് ഇരുപക്ഷവും ഇതിനകംതന്നെ തുടക്കമിട്ടുകഴിഞ്ഞു. ബംഗ്ലാദേശിലെ ഭരണമാറ്റവും ഇന്ത്യയോടുള്ള മനോഭാവത്തിലെ മാറ്റവും അതിരൂക്ഷമായ കാലാവസ്ഥാ വ്യതിയാനം നദീതടത്തിലുണ്ടാക്കുന്ന കടുത്ത പ്രതിസന്ധികളും കണക്കിലെടുക്കുമ്പോൾ കരാർ പുതുക്കലിന് രാഷ്ട്രീയമായും വലിയ പ്രാധാന്യമുണ്ട്. കേവലമൊരു ഉടമ്പടിക്കപ്പുറം മാറുന്ന കാലാവസ്ഥാ വ്യതിയാനങ്ങളെ അതിജീവിക്കാൻ ശേഷിയുള്ളതും കൂടുതൽ സുതാര്യവുമായ ഒരു പുതിയ ജലപങ്കാളിത്ത വ്യവസ്ഥ രൂപപ്പെടുത്തുക എന്ന വലിയ ഉത്തരവാദിത്തമാണ് ഇരുരാജ്യങ്ങൾക്കും മുന്നിലുള്ളത്.

Content Highlights: Content Highlight: The historic 1996 Ganga Water Sharing Treaty between India and Bangladesh is set to expire in December 2026, making the upcoming diplomatic review crucial amidst regional political shifts and severe climate change challenges.