കാര്ഗിലിൽ ഇന്ത്യയെ ജയിപ്പിച്ച, രാഷ്ട്രീയത്തിൽ രാജീവിനെ തോൽപിച്ച വിദേശി; ബോഫോഴ്സ് കളംവിടുമ്പോള്
1989 ലെ പൊതുതിരഞ്ഞെടുപ്പ് കാലം. രാജ്യത്തെ തെരുവോരങ്ങളിലെങ്ങും പ്രചാരണ പ്രവര്ത്തനങ്ങള് ചൂടുപിടിക്കുന്നു. അതില് ഏറ്റവും വ്യത്യസ്തമായതായിരുന്നു രണ്ട് ടയറുകളും ഒരു കുഴലും ഘടിപ്പിച്ച കുഞ്ഞു വണ്ടികള്, ബോഫോഴ്സ് എന്ന് പേരിട്ട് രാജീവ് ഗാന്ധിയുടെ ചിത്രം വെച്ച് ആള്ക്കൂട്ടത്തിന്റെ അകമ്പടിയോടെ, ഉരുണ്ടുനീങ്ങുന്ന ദൃശ്യം. സോഷ്യല് മീഡിയയയും ദൃശ്യ മാധ്യമങ്ങളുമൊന്നുമില്ലാതിരുന്ന കാലമായിട്ടും ഈ പ്രചാരണ വണ്ടികള് കോണ്ഗ്രസിനെതിരേയുള്ള പ്രധാന ആയുധമായി അക്കാലത്ത് ഉപയോഗിക്കപ്പെട്ടു. ജനങ്ങളില് വലിയ രീതിയില് സ്വാധീനം ചെലുത്തി. കാരണം അത്രമാത്രമായിരുന്നു അന്നത്തെ രാഷ്ട്രീയ കാലാവസ്ഥയില് ബോഫോഴ്സ് പീരങ്കിയിടപാടും തുടര്ന്നുണ്ടായ വിവാദങ്ങളുമെല്ലാം സ്ഥാനം പിടിച്ചിരുന്നത്.
രാഷ്ട്രീയ വിവാദങ്ങള് മാറ്റിവെച്ചാൽ, ഇന്ത്യന് സൈന്യത്തിന്റെ നെടുംതൂണായതാണ് ബോഫോഴ്സ് പീരങ്കികളുടെ ചരിത്രം. കാര്ഗില് ഹീറോയും സൈന്യത്തിന്റെ തുറുപ്പുചീട്ടുമായിരുന്നു നാളിതുവരെ ഈ പീരങ്കികൾ. അന്ന് വാങ്ങിയ ബോഫോഴ്സ് പീരങ്കികള്ക്ക്, പക്ഷേ, ഇന്ന് വയസ്സായി. 200 എണ്ണം മാത്രം ബാക്കിയായി. കാലഹരണപ്പെട്ട സാങ്കേതികവിദ്യയായി. ഒടുവില് 2030 മുതല് ഇവയെ പൂര്ണമായും ഒഴിവാക്കാനൊരുങ്ങുകയാണ് സൈന്യം. പകരം തദ്ദേശീയമായി നിര്മിച്ച പീരങ്കികള് വരും.
Content Highlights: The Bofors scandal, involving Rajiv Gandhi`s government and a controversial arms deal