ആർ.എം.പി. പ്രവർത്തകന്റെ കിണറിൽ മലം തള്ളി; സംഭവം തൂണേരിയിൽ

നാദാപുരം: തൂണേരിയിൽ ആർ.എം.പി. പ്രവർത്തകന്റെ വീട്ടിലെ കിണറിൽ മലം തള്ളിയതായി കണ്ടെത്തി. തൂണേരി ചെക്കായിപ്പീടികയ്ക്കു സമീപം തൂമ്പോളിപ്പൊയിൽ മനോജന്റെ വീട്ടിലെ കിണറിലാണ് മലം തള്ളിയത്. മനോജനും സഹോദരനും ഒന്നിച്ച് ഉപയോഗിക്കുന്ന കിണറാണിത്.

ഞായറാഴ്ച രാവിലെ കിണറ്റിൽനിന്ന്‌ സഹോദരൻ വെള്ളം കോരിയെടുത്തതോടെയാണ് മലം കലർന്നത്‌ ശ്രദ്ധയിൽപ്പെട്ടത്. തുടർന്ന് നടത്തിയ പരിശോധനയിൽ കിണറ്റിൽ മലം തള്ളിയതായി കണ്ടെത്തി. ആർ.എം.പി. രൂപവത്കരണംമുതൽ സംഘടനയുടെ സജീവപ്രവർത്തകനായിരുന്നു മനോജൻ. വ്യക്തിപരമായി ആരുമായും പ്രശ്നമൊന്നുമില്ലെന്ന് മനോജൻ പറഞ്ഞു. തിരഞ്ഞെടുപ്പുകാലത്ത് യു.ഡി.എഫിനുവേണ്ടി പ്രവർത്തിച്ചതിന്റെ പ്രതികാരമാണ് സംഭവത്തിനു പിന്നിലെന്ന് യു.ഡി.എഫ്. നേതാക്കൾ ആരോപിച്ചു.

കുറ്റക്കാരെ എത്രയുംപെട്ടെന്ന് നിയമത്തിനുമുൻപിൽ കൊണ്ടുവരണമെന്ന് യു.ഡി.എഫ്. ആവശ്യപ്പെട്ടു. തൂണേരി ബ്ലോക്ക് പഞ്ചായത്ത് സ്ഥിരംസമിതി ചെയർപേഴ്‌സൺ പി. ഷാഹിന, തൂണേരി ഗ്രാമപ്പഞ്ചായത്ത് പ്രസിഡന്റ് വളപ്പിൽ കുഞ്ഞമ്മദ്, സ്ഥിരംസമിതി ചെയർമാൻ കെ.എം. സമീർ, യു.ഡി.എഫ്. നേതാക്കളായ മോഹനൻ പാറക്കടവ്, രവീഷ് വളയം, സി.കെ. സുബൈർ, അശോകൻ തൂണേരി, സി. അബ്ദുൽ ഹമീദ്, എ.കെ.ടി. കുഞ്ഞമ്മദ്, മനോജൻ കുന്നത്ത്, ഹരീഷ് തുടങ്ങിയവർ വീട് സന്ദർശിച്ചു.

Content Highlights: An RMP activist's well in Thooneri was found contaminated with excrement.