വോട്ടർ പട്ടികയിലെ കൃത്രിമത്വത്തിലാണ് ബിജെപിയുടെ പ്രതീക്ഷ, പക്ഷെ തകർന്നടിയും | മഹുവ മൊയ്ത്ര അഭിമുഖം

തീപ്പൊരി പ്രസംഗങ്ങളിലൂടെ പാർലമെന്റിൽ പ്രതിപക്ഷ നിരയിലെ ഏറെ ശ്രദ്ധേയയായ അംഗമാണ് തൃണമൂൽ കോൺഗ്രസ് നേതാവ് മഹുവ മൊയ്ത്ര എം.പി കേന്ദ്ര സർക്കാരിന്റെയും ബിജെപിയുടെയും നിശിത വിമർശകയായ അവർ ബംഗാളിലെ കൃഷ്ണനഗർ മണ്ഡലത്തിൽനിന്നുള്ള ലോക്സഭാംഗമാണ്. ഇൻവെസ്റ്റ്മെന്റ് ബാങ്കറായിരുന്ന മഹുവ ജെപി മോർഗൻ ചേസിന്റെ വൈസ് പ്രസിഡന്റായി ലണ്ടനിൽ പ്രവർത്തിക്കവേയാണ് 2009-ൽ ആ മേഖല ഉപേക്ഷിച്ച് രാഷ്ടീയ രംഗത്തേക്ക് എത്തുന്നത്. ബംഗാളിലും കേരളത്തിലും നിയമസഭ തിരഞ്ഞെടുപ്പ് പടിവാതിൽക്കൽ എത്തിനിൽക്കേ അതേക്കുറിച്ച് മഹുവ മൊയ്ത്ര മാതൃഭൂമി ഡൽഹി ബ്യൂറോ പ്രത്യേക ലേഖകൻ പ്രവീൺ കൃഷ്ണനോട് സംസാരിക്കുന്നു

കേരളം എന്നപോലെ ബംഗാളിലും നിയമസസഭ തിരഞ്ഞെടുപ്പ് പടിവാതിൽക്കൽ എത്തിക്കഴിഞ്ഞു. ബി.ജെ.പി, പ്രത്യേകിച്ച് പ്രധാനമന്ത്രി മോദിയും ആഭ്യന്തര മന്ത്രി അമിത് ഷായും ഏത് വിധത്തിലും ഇത്തവണ ബംഗാൾ പിടിക്കാനുള്ള ശ്രമത്തിലാണ്. തിരഞ്ഞെടുപ്പ് കമ്മീഷനുമായി ബന്ധപ്പെട്ടും തർക്കങ്ങൾ രൂക്ഷമാണ്. അതി തീവ്രമായ ഒരു മോദി-മമത പോരാട്ടത്തിലേക്കാണോ ബംഗാൾ നീങ്ങുന്നത് ?