നേർക്കുനേർ പറയുന്ന രാഷ്ട്രീയക്കാരൻ; അജിത് പവാറിനെ കുറിച്ച് വികാരാധീനനായി രാജ് താക്കറെ

പുണെ: അജിത് പവാറിന്റെ വേർപാട് ഭരണസംവിധാനങ്ങൾ ഭരണാധികാരികൾക്കും മുകളിൽ ഉയരേണ്ട ഒരു സമയത്ത് മഹാരാഷ്ട്രയ്ക്ക് നികത്താനാവാത്ത ആഘാതമാണെന്ന് മഹാരാഷ്ട്ര നവനിർമ്മാൺ സേന അധ്യക്ഷൻ രാജ് താക്കറെ. പവാർ അത്യന്തം നേർവഴിക്ക് ചിന്തിക്കുന്ന നേതാവാണെന്നും വാഗ്ദാനങ്ങൾ നൽകി ജനങ്ങളെ വഞ്ചിക്കുന്ന ശൈലി അദ്ദേഹത്തിനില്ലായിരുന്നുവെന്നും താക്കറെ അനുസ്മരിച്ചു.

പവാറിന്റെ വിയോഗത്തിന് തൊട്ടുപിന്നാലെ എക്‌സിൽ (X) പങ്കുവെച്ച കുറിപ്പിലൂടെയാണ് രാജ് താക്കറെ തന്റെ സുഹൃത്തിന് അന്ത്യോപചാരമർപ്പിച്ചത്. ഒരേ കാലഘട്ടത്തിൽ രാഷ്ട്രീയത്തിൽ ഇറങ്ങിയവരാണെങ്കിലും ഇരുവരും തമ്മിലുള്ള സൗഹൃദം വൈകിയാണ് ഉടലെടുത്തതെന്ന് താക്കറെ ഓർമ്മിച്ചു. ശരദ് പവാറിന്റെ പാത പിന്തുടർന്നാണ് രാഷ്ട്രീയത്തിൽ വന്നതെങ്കിലും, തന്റെ രാഷ്ട്രീയത്തോടുള്ള അദമ്യമായ അഭിനിവേശം കൊണ്ട് മഹാരാഷ്ട്രയുടെ ഓരോ കോണിലും സ്വന്തമായ ഒരടയാളം പതിപ്പിക്കാൻ അജിത് പവാറിന് കഴിഞ്ഞു.

തൊണ്ണൂറുകളിൽ ഗ്രാമീണ മേഖലകൾ അർദ്ധനഗരങ്ങളായി മാറിയപ്പോൾ, ആ രാഷ്ട്രീയ മാറ്റത്തെ കൃത്യമായി മനസ്സിലാക്കാനും കൈകാര്യം ചെയ്യാനും അജിത് പവാറിന് സാധിച്ചിരുന്നു. ബാരാമതിയെയും പിംപ്രി ചിഞ്ച്‌വാഡിനെയും അദ്ദേഹം വികസിപ്പിച്ച രീതി രാഷ്ട്രീയ എതിരാളികൾ പോലും അംഗീകരിക്കുന്നതാണെന്ന് താക്കറെ ചൂണ്ടിക്കാട്ടി. ഭരണപരമായ കാര്യങ്ങളിൽ കൃത്യമായ കാഴ്ചപ്പാടുള്ള അദ്ദേഹം കുരുക്കുകളിൽപ്പെട്ട ഫയലുകൾ എങ്ങനെ വേഗത്തിൽ തീർപ്പാക്കണമെന്ന് നന്നായി അറിയാവുന്ന ഒരു മികച്ച ഭരണാധികാരിയായിരുന്നു.

കാര്യങ്ങൾ വളച്ചൊടിക്കാതെ നേർക്കുനേർ പറയുന്ന അദ്ദേഹത്തിന്റെ രീതി ശ്രദ്ധേയമായിരുന്നു. അസാധ്യമായ കാര്യങ്ങൾ കഴിയില്ലെന്ന് മുഖത്തുനോക്കി പറയുന്നതിനും സാധ്യമായവയ്ക്കായി സർവ്വ കരുത്തും ഉപയോഗിക്കുന്നതിനും അദ്ദേഹം മടിച്ചില്ല. രാഷ്ട്രീയത്തിൽ ഇത്തരം തുറന്നുപറച്ചിലുകൾക്കും സത്യസന്ധതയ്ക്കും വലിയ വില നൽകേണ്ടി വരുമെന്ന് സ്വന്തം അനുഭവം മുൻനിർത്തി താക്കറെ കുറിച്ചു. അത്തരത്തിൽ എത്രമാത്രം വലിയ വില അജിത് പവാർ നൽകിയിട്ടുണ്ടാകുമെന്ന് തനിക്ക് ഊഹിക്കാമെന്നും അദ്ദേഹം കൂട്ടിച്ചേർത്തു.

ജാതി രാഷ്ട്രീയത്തിന് പവാറിന്റെ പ്രവർത്തനങ്ങളിൽ ഒരു സ്ഥാനവുമില്ലായിരുന്നു എന്ന ഗുണത്തെ താക്കറെ പ്രത്യേകം പ്രശംസിച്ചു. ഇന്നത്തെ കാലത്ത് ജാതിരഹിതമായി രാഷ്ട്രീയം കൈകാര്യം ചെയ്യാൻ ധൈര്യമുള്ള നേതാക്കൾ കുറഞ്ഞുവരികയാണെന്നും ആ നിരയിൽ അജിത് പവാർ മുൻപന്തിയിലാണെന്നും അദ്ദേഹം പറഞ്ഞു. രാഷ്ട്രീയ എതിർപ്പുകൾ എന്നത് രാഷ്ട്രീയപരമായ ഒന്നാണെന്നും അത് ഒരിക്കലും വ്യക്തിപരമാകരുതെന്ന് വിശ്വസിച്ചിരുന്ന ചുരുക്കം നേതാക്കളിൽ ഒരാളായിരുന്നു അദ്ദേഹം. മാന്യരായ രാഷ്ട്രീയ എതിരാളികളുടെ വിയോഗം മഹാരാഷ്ട്രയുടെ മികച്ച രാഷ്ട്രീയ പാരമ്പര്യത്തിന് വലിയ നഷ്ടമാണ് വരുത്തിയിരിക്കുന്നത്. അജിത് പവാറിന്റെ കുടുംബത്തിന്റെ ദുഃഖത്തിൽ താനും തന്റെ കുടുംബവും മഹാരാഷ്ട്ര നവനിർമ്മാൺ സേനയും പങ്കുചേരുന്നതായി അറിയിച്ചുകൊണ്ടാണ് രാജ് താക്കറെ തന്റെ ഹൃദയസ്പർശിയായ കുറിപ്പ് അവസാനിപ്പിച്ചത്.

Content Highlights: Raj Thackeray remembers Ajit Pawar`s straightforwardness, administrative skill, and leadership. A tribute to Maharashtra`s political stalwart.