ടി.ജി. നന്ദകുമാർ പ്രസിഡന്റായ ക്ഷേത്രംവക 75 ലക്ഷത്തിന്റെ സ്പോൺസർഷിപ്പ്; AMMA-യിലെ വിവാദ കരാർ പുറത്ത്
കൊച്ചി: അഭിനേതാക്കളുടെ സംഘടനയായ അമ്മയിലെ വിവാദ സ്പോൺസർഷിപ്പ് കരാർ പുറത്ത്. കുടുംബസംഗമത്തിന്റെ ടൈറ്റിൽ സ്പോൺസർഷിപ്പ് 75 ലക്ഷം രൂപയ്ക്ക് വെണ്ണല തൈക്കാട്ട് മഹാദേവ ക്ഷേത്രമാണ് ഏറ്റെടുത്തത്. ക്ഷേത്രം പ്രസിഡന്റ് ടി.ജി. നന്ദകുമാറും അമ്മ ജനറൽ സെക്രട്ടറി കുക്കു പരമേശ്വരനും തമ്മിലാണ് കരാറുണ്ടാക്കിയത്. മതേതരമൂല്യം ഉയർത്തിപ്പിടിക്കണമെന്നുകാട്ടി ഈ കരാറിനെയാണ് അൻസിബ ഹസൻ എതിർത്തത്.
താരസംഘടനയായ ‘അമ്മ’യിൽ ഉടലെടുത്തിരിക്കുന്ന വിവാദങ്ങളുടെ കാരണങ്ങളിൽ ഒന്നാണ് വെണ്ണലയിലെ ക്ഷേത്രവുമായി ബന്ധപ്പെട്ട സ്പോൺസർഷിപ്പ് കരാർ. ഇതുമായി ബന്ധപ്പെട്ട് സംഘടനയിലെ അംഗങ്ങൾക്കിടയിൽ വോട്ടെടുപ്പ് നടന്നിരുന്നുവെന്ന് റിപ്പോർട്ടുണ്ട്. ഒരു ക്ഷേത്രം താരസംഘടനയുടെ കുടുംബസംഗമത്തിന് സ്പോൺസറായിരുന്നതിനെ എതിർത്ത ഒരാൾ ജോയിന്റ് സെക്രട്ടറിയായ നടി അൻസിബ ഹസനാണ്. മതസ്ഥാപനങ്ങളിൽനിന്ന് പണം വാങ്ങരുതെന്ന നിലപാടാണ് അവർ സ്വീകരിച്ചത്.
എന്നാൽ ഇക്കാര്യം പ്രസിഡന്റ് ശ്വേതാ മേനോൻ തള്ളിക്കളഞ്ഞിരുന്നു. ചാരിറ്റബിൾ ഇൻസ്റ്റിറ്റ്യൂഷൻ ആക്ട് പ്രകാരം പ്രവർത്തിക്കുന്ന സംഘടനയാണ് അമ്മ എന്നതിനാൽ ആരിൽനിന്നും സംഭാവന സ്വീകരിക്കുന്നതിന് തടസമില്ലെന്ന് രണ്ടുദിവസം മുൻപ് ശ്വേതാ മേനോൻ മാധ്യമങ്ങളോട് പറഞ്ഞിരുന്നു.
കഴിഞ്ഞ ഫെബ്രുവരി 14-നാണ് അമ്മയുടെ കുടുംബസംഗമം നടന്നത്. കൊച്ചി രാജീവ് ഗാന്ധി ഇൻഡോർ സ്റ്റേഡിയത്തിലാണ് പരിപാടി നടന്നത്. വെണ്ണല തൈക്കാട്ട് മഹാദേവ ക്ഷേത്രമായിരുന്നു ഇതിന്റെ ടൈറ്റിൽ സ്പോൺസർ. 75 ലക്ഷം രൂപ നൽകാമെന്നാണ് സ്പോൺസർഷിപ്പ് കരാറിലുള്ളത്. ഇതിൽ 30 ലക്ഷം ആദ്യഗഡുവായി നൽകുകയും ചെയ്തിരുന്നു. 45 ലക്ഷമാണ് കരാർ പ്രകാരം അമ്മയ്ക്ക് ലഭിക്കാനുള്ളത്. ഇതിനിടയിൽ പ്രസിഡന്റ് ടി.ജി. നന്ദകുമാർ ഉൾപ്പെടെയുള്ള ക്ഷേത്രം ഭാരവാഹികൾ ഒരു എതിർപ്പ് താരസംഘടനയെ അറിയിച്ചു. അവരുടെ പരസ്യം കുടുംബസംഗമ വേദിയിൽ വേണ്ട രീതിയിൽ പ്രദർശിപ്പിച്ചില്ല എന്നതാണ് ഇതിനു കാരണം. ഈ പരാതി ഇപ്പോഴും നിലനിൽക്കുന്നുണ്ട്.
നൽകാനുള്ള ബാക്കി തുക സംഘടനയ്ക്ക് നൽകുമെന്നാണ് ടി.ജി. നന്ദകുമാർ പറഞ്ഞിരിക്കുന്നത്. ഇതുമായി ബന്ധപ്പെട്ട ചർച്ച നടക്കാനിരിക്കുന്നതേയുള്ളൂ. അതിനിടയിലാണ് സ്പോൺസർഷിപ്പ് കരാർ പുറത്തുവന്നത്.
Content Highlights: Bringing a massive twist to the internal friction rocking the actors' association AMMA, the controversial official title sponsorship document has been leaked to the media. The contract proves that the mega family get-together held on February 14 at the Rajiv Gandhi Indoor Stadium in Kochi was sponsored by the Vennala Thaikattu Mahadeva Temple for a total deal value of ₹75 lakhs.