നീറി നീറിയാ കത്തിയത്, തലയോട്ടി പൊട്ടുന്ന ഒച്ച പതിവിലും വൈകിയാണ് കേട്ടത്

"ഇന്നലെ ചുടലക്കാട്ടിൽ ശവദാഹമുണ്ടായിരുന്നു.''
അമ്പലത്തിൽ ദീപാരാധനയുണ്ടായിരുന്നു എന്നു പറയുമ്പോലെ സിമ്പിളായി ജീജ പറഞ്ഞു.
"നായ്ക്കളുടെ കുര കാരണം രാത്രി ഇടയ്ക്കിടെ ഉണർന്നു പോയി. അപ്പൊഴെല്ലാം ചിതയിൽ തീ കത്തുന്നുണ്ട്..
കത്തിക്കലെല്ലാം കണക്കാ. എല്ലാരും പോയിക്കഴിഞ്ഞാൽ പിന്നെ ശവം മാത്രമല്ലേയുള്ളൂ. നീറി നീറിയാ കത്തിയത്. തലയോട്ടി പൊട്ടുന്ന ഒച്ച പതിവിലും വൈകിയാണു കേട്ടത്."
തോളിൽ നിന്നൂർന്നു പോയ ഷാൾ ശരിയാക്കി ഒരു പിന്നു കുത്തിക്കൊണ്ട് അവൾ തുടർന്നു.

കട്ടിലിൽ അലസമായിച്ചാരിയിരുന്ന് മധുരസേവ തിന്നുകൊണ്ടിരുന്ന ഞാൻ ആ പാക്കറ്റ് താഴെവെച്ച് അവളെ അന്തംവിട്ടുനോക്കി. നിലത്തിരുന്ന് കാൽനഖങ്ങളിൽ നെയ്ൽപോളിഷിട്ടു കൊണ്ടിരുന്ന രാജിച്ചേച്ചിയും തലപൊക്കി നോക്കി. ഹോസ്റ്റലിൽ ഉച്ചഭക്ഷണത്തിനുശേഷമുള്ള വിശ്രമവേളയാണ്. പലതും പറയുന്ന കൂട്ടത്തിലാണ് ഈ മാരകസംഭാഷണമുണ്ടായിരിക്കുന്നത്.

Content Highlights: A college student`s friendship with a bold girl living alone near a cremation ground