ചതിയനായ വയോവൃദ്ധന്‍ വെച്ചു നീട്ടിയ സ്‌നേഹലാളനകളുടെ സ്മരണകള്‍ ഇപ്പോഴും ചേച്ചിയെ അലട്ടുന്നുണ്ടോ?

"സാറേ ഒരു കാര്യമുണ്ട്. "തങ്കച്ചേച്ചി മുന്നിൽ വന്നു നിന്നു.ഞാൻ അറ്റൻഡൻസ് റെജിസ്റ്ററിൽ നിന്ന് തലപൊക്കി. എന്താണീ കാണുന്നത്? പുൽമേട്ടിലൊരു പവിഴമല്ലിമരം കുലുങ്ങിയതു പോലെ..ഓറഞ്ചുഞെട്ടും വെള്ളയിതളുമുള്ള പൂക്കളാണ് സാരി മുഴുവൻ ചിതറിക്കിടക്കുന്നത്!സ്ഥിരം വേഷമായ കോട്ടൺസാരികളുടെ നരച്ച പരുപരുപ്പിനെത്തള്ളി മാറ്റി ഒഴുകുകയാണ് ഒരു പുതിയ ഷിഫോൺപുഴ, ഈ പ്രഭാതത്തിൽ, എന്റെ മുന്നിൽ..

ആകെ ഒന്നൊരുങ്ങിയിട്ടുണ്ട്. സാരിയുടെ ഞൊറികൾ കൃത്യമായെടുത്ത് പിന്നു കുത്തിയിരിക്കുന്നു. പതിവില്ലാത്ത ഒരു ചുവന്ന സ്റ്റിക്കർപ്പൊട്ട് നെറ്റിയിൽ. എല്ലാം പോട്ടെ, ഇന്നുവരെ ആ മുഖത്ത് പോയിട്ട് ഏരിയയിൽ പോലും കണ്ടിട്ടില്ലാത്ത ഒരപൂർവ്വഭാവം ആപാദചൂഡം.! നാണം!
ഞാനമ്പരന്നു പോയി. 
ഒപ്പിടാൻ ഓങ്ങിയ പേന വിരലുകളിൽത്തങ്ങി.
"എന്താണ്?"
 അതീവകൗതുകത്തോടെ ഞാൻ ചോദിച്ചു. എന്തോ പറയാൻ ശ്രമിക്കുന്നുണ്ട്. ശബ്ദം പുറത്തു വരുന്നില്ല. ഒറ്റ അലർച്ചയിൽ ക്യൂ തെറ്റിച്ച് ചിതറി നിൽക്കുന്ന രോഗികളെ കൃത്യവരിയാക്കുന്ന ആ മാരകശബ്ദത്തിനെന്തു സംഭവിച്ചു?

Content Highlights: A woman`s dream of love and companionship turns into a nightmare after being deceived by an elderly