എട്ടാം ക്ലാസിനപ്പുറം പഠിപ്പില്ല, ട്വീറ്റുകൾ എഴുതുന്നത് ചാറ്റ് ജിപിടി ഉപയോഗിച്ച്; വിമര്ശനങ്ങളോട് പ്രതികരിച്ച് നടി ഖുശ്ബു
സാമൂഹ്യ മാധ്യമങ്ങളില് സജീവമായ സിനിമാ താരവും രാഷ്ട്രീയനേതാവുമാണ് ഖുശ്ബു സുന്ദര്. അടുത്തിടെ ശരീരഭാരം കുറച്ചുകൊണ്ടുള്ള പുതിയ ചിത്രം പങ്കുവെച്ചുകൊണ്ട് ഖുശ്ബു ആരാധകരെ ഞെട്ടിച്ചിരുന്നു. സാമൂഹ്യമാധ്യമമായ എക്സിലാണ് ഖുശ്ബു കൂടുതല് സജീവമായുള്ളത്. അവിടെ വരുന്ന പല ട്വീറ്റുകള്ക്കും അവര് മറുപടി നല്കാറുമുണ്ട്.
അതിനിടെയാണ് ഖുശ്ബുവിനെതിരെ ചില വിമര്ശനങ്ങള് ഉയര്ന്നത്. ഖുശ്ബുവിന്റെ വിദ്യാഭ്യാസത്തെ കുറിച്ച് ഉള്പ്പെടെ പരാമര്ശിച്ചുകൊണ്ടായികരുന്നു ഇത്. ഖുശ്ബു എട്ടാം ക്ലാസ് പാസായിട്ടില്ല എന്നും എക്സിലെ സര്ക്കാസ്റ്റിക് ട്വീറ്റുകള്ക്കായി ഖുശ്ബു എഐ ടൂളായ ചാറ്റ്ജിപിടിയെ ആശ്രയിക്കുന്നുവെന്നുമെല്ലാമാണ് ഒരാള് എക്സില് ആരോപിച്ചത്.
Also Read: 20 കിലോ കുറച്ച് ഖുശ്ബുവിന്റെ കിടിലൻ മേക്കോവർ, പ്രമേഹമരുന്ന് കുത്തിവെച്ചെന്ന് കമന്റ്; ചുട്ട മറുപടി
ഇതിന് ചുട്ടമറുപടിയുമായി രംഗത്തെത്തിയിരിക്കുകയാണ് ഖുശ്ബു. വിമര്ശന ട്വീറ്റ് റീട്വീറ്റ് ചെയ്തുകൊണ്ടാണ് ഖുശ്ബു ഇതിന് മറുപടി നല്കിയത്. ബുദ്ധിശക്തിയെന്നത് റിപ്പോര്ട്ട് കാര്ഡിലെ ഫലവുമായി ബന്ധപ്പെട്ടതല്ലെന്ന് താരം പറഞ്ഞു. ജനകീയ രാഷ്ട്രീയനേതാവായിരുന്ന കാമരാജ് നാലാം ക്ലാസിനപ്പുറം പഠിച്ചിരുന്നില്ലെന്നും ഖുശ്ബു ഓര്മിപ്പിച്ചു.
'ബുദ്ധിശക്തിയെന്നത് നിങ്ങളുടെ അക്കാദമിക് റിപ്പോര്ട്ട് കാര്ഡിലെ ഫലവുമായി ബന്ധപ്പെട്ടതല്ല, മറിച്ച് ജീവിതം നിങ്ങളെ പഠിപ്പിക്കുന്നതെന്താണോ അതാണ്. മഹാനായ നേതാവ് കാമരാജിന് പോലും നാലാം ക്ലാസിനപ്പുറം വിദ്യാഭ്യാസം തുടരാന് കഴിഞ്ഞിട്ടില്ല. അതുകൊണ്ട് സമാധാനമായിരിക്കൂ, എന്റെ ചിന്തകള്ക്ക് ശബ്ദം നല്കാന് എനിക്ക് ഒരു ചാറ്റ്ജിപിടിയും വേണ്ട.' -ഇതാണ് ഖുശ്ബു പറഞ്ഞത്.
Don’t Miss: സ്ത്രീവിരുദ്ധ പരാമർശം: ആൾദൈവം 'പൂക്കിബാബ'യ്ക്കെതിരെ രൂക്ഷവിമർശനവുമായി ദിഷ പഠാണിയുടെ സഹോദരി | വീഡിയോ
മുംബൈയിലെ സ്വാമി മുക്താനന്ദ ഹൈസ്കൂളിലാണ് ഖുശ്ബു പഠിച്ചിരുന്നത്. അഭിനയത്തിലേക്ക് ശ്രദ്ധ കേന്ദ്രീകരിക്കേണ്ടിവന്നതിനാല് അവര്ക്ക് വിദ്യാഭ്യാസം പൂര്ത്തിയാക്കാന് കഴിഞ്ഞില്ല. 1980-ല് പത്താം വയസിലാണ് ഖുശ്ബു ആദ്യമായി ക്യാമറയ്ക്ക് മുന്നിലെത്തുന്നത്. ബേണിങ് ട്രെയിന് എന്ന ചിത്രമായിരുന്നു അത്.
Content Highlights: Khushbu Sundar hits back at troll pointing out she didn't study beyond 8th grade, accusing her of using ChatGPT