60-ാം വയസിലും അവിവാഹിതൻ, നഷ്ടബോധമില്ല; ഒരു കുഞ്ഞുവേണമെന്ന് ആഗ്രഹമുണ്ട്-സൽമാൻ ഖാൻ

വിവാഹം കഴിക്കാത്തതിൽ തനിക്ക് യാതൊരു ഖേദവുമില്ലെന്നും എന്നാൽ ഒരുനാൾ അച്ഛനാകാൻ ആഗ്രഹിക്കുന്നുണ്ടെന്നും ബോളിവുഡ് താരം സൽമാൻ ഖാൻ. കരൺ ജോഹറിന്റെ 'കോഫി വിത്ത് കരൺ' എന്ന പരിപാടിയിലാണ് താരം തന്റെ വിവാഹത്തെക്കുറിച്ചും കുടുംബത്തെക്കുറിച്ചും ഏകാന്തതയെക്കുറിച്ചും തുറന്നുസംസാരിച്ചത്. ബോളിവുഡിലെ ഏറ്റവും പ്രശസ്തനായ അവിവാഹിതൻ ആരാണെന്ന ചോദ്യത്തിന് പലരുടെയും ഉത്തരം സൽമാൻ ഖാൻ എന്നായിരിക്കും. സിനിമയിലെ പ്രണയനായകനായും ആരാധകരുടെ പ്രിയപ്പെട്ട 'ഭായ്ജാൻ' ആയും പതിറ്റാണ്ടുകളായി നിറഞ്ഞുനിൽക്കുന്ന സൽമാന്റെ സ്വകാര്യജീവിതം എന്നും വാർത്തകളിൽ ഇടംനേടാറുണ്ട്. അറുപതാം വയസ്സിലും അവിവാഹിതനായി തുടരുന്ന സൽമാൻ ഇനി വിവാഹം കഴിക്കുമോ എന്ന ചോദ്യത്തിന് വ്യക്തമായ മറുപടി നൽകിയിട്ടില്ലെങ്കിലും അച്ഛനാകാനുള്ള തന്റെ ആഗ്രഹത്തെക്കുറിച്ച് അദ്ദേഹം ഇപ്പോൾ തുറന്നുപറഞ്ഞിരിക്കുകയാണ്.

'ഒരുനാൾ എന്റെ ജീവിതത്തിലും കുഞ്ഞുങ്ങളുണ്ടാകും'

പരിപാടിക്കിടെ കരൺ ജോഹർ സൽമാനോട് ചോദിച്ച ഒരു ചോദ്യമാണ് അച്ഛനാകാനുള്ള ആഗ്രഹത്തെക്കുറിച്ചുള്ള തുറന്നുപറച്ചിലിന് വഴിയൊരുക്കിയത്. സ്വന്തമായി കുഞ്ഞുങ്ങളില്ലാത്തതിന്റെ കുറവ് അനുഭവപ്പെടാറുണ്ടോ എന്നായിരുന്നു കരണിന്റെ ചോദ്യം. അതിനുള്ള സൽമാന്റെ മറുപടി ഇങ്ങനെയായിരുന്നു:'തീർച്ചയായും, ഒരുനാൾ എനിക്കും കുഞ്ഞുങ്ങളുണ്ടാകും. കരൺ, നിങ്ങൾക്ക് കുഞ്ഞുങ്ങളുണ്ടായപ്പോൾ എനിക്ക് ഏറെ സന്തോഷം തോന്നിയിരുന്നു. എന്റെ ജീവിതത്തിലും കുഞ്ഞുങ്ങൾ വരും.'വിവാഹത്തെക്കുറിച്ച് വർഷങ്ങളായി ചോദ്യങ്ങൾ നേരിടുന്ന താരം അച്ഛനാകാനുള്ള ആഗ്രഹത്തെക്കുറിച്ച് ഇത്ര തുറന്നുപറഞ്ഞത് ആരാധകർക്കിടയിലും ശ്രദ്ധ നേടി.

അതേസമയം, എപ്പോൾ അച്ഛനാകുമെന്നോ അതിനായി എന്തെങ്കിലും തീരുമാനമെടുത്തിട്ടുണ്ടെന്നോ സൽമാൻ വ്യക്തമാക്കിയിട്ടില്ല.

'വിവാഹം കഴിക്കാത്തത് എന്റെ സ്വന്തം തീരുമാനം'

സൽമാൻ ഖാന്റെ വിവാഹത്തെക്കുറിച്ച് ബോളിവുഡിൽ വർഷങ്ങളായി ചർച്ചകൾ നടക്കുന്നുണ്ട്. പല പ്രമുഖ നടിമാരുമായുള്ള പ്രണയബന്ധങ്ങളുടെ പേരിലും താരം വാർത്തകളിൽ നിറഞ്ഞിട്ടുണ്ട്. എന്നാൽ വിവാഹം കഴിക്കാതിരുന്നത് തന്റെ സ്വന്തം തീരുമാനമാണെന്നും അതിൽ നഷ്ടബോധമില്ലെന്നുമാണ് സൽമാൻ പറയുന്നത്. ജീവിതപങ്കാളിയെ കണ്ടെത്തുന്നതിൽനിന്ന് തന്നെ ആരും തടഞ്ഞിട്ടില്ലെന്നും നിലവിലെ ജീവിതത്തിൽ സന്തോഷവാനാണെന്നും താരം വ്യക്തമാക്കി.വിവാഹം കഴിക്കാത്തതിനെ ഒരു പരാജയമായോ നഷ്ടമായോ കാണുന്നില്ലെന്ന നിലപാടാണ് സൽമാൻ പങ്കുവച്ചത്.

'ആരും കൂടെയുണ്ടാകാൻ ആഗ്രഹിക്കാത്തപ്പോഴാണ് യഥാർഥ ഏകാന്തത'

പരിപാടിയിൽ ഏകാന്തതയെക്കുറിച്ചും കരൺ ജോഹറും സൽമാൻ ഖാനും സംസാരിച്ചിരുന്നു.ജീവിതത്തിൽ ഒരു പങ്കാളിയില്ലാത്തതിനാൽ ചിലപ്പോൾ തനിക്ക് ഏകാന്തത അനുഭവപ്പെടാറുണ്ടെന്ന് കരൺ പറഞ്ഞു. എന്നാൽ സൽമാൻ അതിനെ മറ്റൊരു കാഴ്ചപ്പാടിലൂടെയാണ് സമീപിച്ചത്. ഒരു വ്യക്തിക്ക് ചുറ്റും ആരുമില്ലാത്തതോ ജീവിതപങ്കാളിയില്ലാത്തതോ മാത്രമല്ല യഥാർഥ ഏകാന്തതയെന്ന് സൽമാൻ അഭിപ്രായപ്പെട്ടു. നമ്മുടെ കൂടെയുണ്ടാകാൻ ആരും ആഗ്രഹിക്കാത്ത അവസ്ഥയിലാണ് ഏറ്റവും വലിയ ഏകാന്തത അനുഭവപ്പെടുന്നതെന്നാണ് താരത്തിന്റെ നിലപാട്. കരണിന് അമ്മയും മക്കളുമുണ്ടെന്നും അതുകൊണ്ടുതന്നെ ജീവിതത്തിൽ സ്‌നേഹിക്കാനും ഒപ്പം നിൽക്കാനും ആളുകളുണ്ടെന്നത് വലിയ ഭാഗ്യമാണെന്നും സൽമാൻ പറഞ്ഞു.തന്റെ ജീവിതത്തിൽ ഏറ്റവും പ്രാധാന്യമുള്ളത് കുടുംബമാണെന്നും താരം വ്യക്തമാക്കി.

'ഞങ്ങൾക്ക് ഒരു ചെറിയ സൽമാനെ തരൂ'; സഞ്ജയ് ദത്തിന്റെ ആവശ്യം

സൽമാൻ ഖാന്റെ സുഹൃത്തുക്കളുടെ വീഡിയോ സന്ദേശങ്ങളും പരിപാടിയുടെ പ്രത്യേകതയായിരുന്നു.സഞ്ജയ് ദത്ത്, ബോബി ഡിയോൾ, വരുൺ ധവാൻ എന്നിവർ സൽമാനുവേണ്ടി പ്രത്യേക സന്ദേശങ്ങൾ പങ്കുവച്ചു.

ഇതിനിടെ സഞ്ജയ് ദത്ത് തമാശയായി നടത്തിയ ഒരു അഭ്യർഥനയും ശ്രദ്ധ നേടി.ഇനിയെങ്കിലും ഒരു 'ഛോട്ടാ സൽമാൻ' വേണമെന്നായിരുന്നു സഞ്ജയ് ദത്തിന്റെ ആവശ്യം. സൽമാന്റെ ജീവിതത്തിൽ ഒരു കുഞ്ഞ് എത്തണമെന്ന ആഗ്രഹമാണ് സുഹൃത്ത് രസകരമായി പങ്കുവച്ചത്.സൽമാൻ അച്ഛനാകാനുള്ള തന്റെ ആഗ്രഹം വെളിപ്പെടുത്തിയതോടെ സഞ്ജയ് ദത്തിന്റെ ഈ വാക്കുകളും ചർച്ചയായി.

സ്വകാര്യജീവിതം സ്വകാര്യമായി തന്നെ തുടരട്ടെ

സിനിമാലോകത്തെ ഏറ്റവും കൂടുതൽ ചർച്ച ചെയ്യപ്പെടുന്ന വ്യക്തികളിലൊരാളാണെങ്കിലും സ്വകാര്യജീവിതത്തെക്കുറിച്ച് പൊതുവേദികളിൽ സംസാരിക്കുന്നതിൽ സൽമാൻ പലപ്പോഴും നിയന്ത്രണം പാലിക്കാറുണ്ട്.വ്യക്തിപരമായ കാര്യങ്ങൾ പരസ്യചർച്ചയാക്കേണ്ടതില്ലെന്ന നിലപാടിന് പിന്നിൽ പിതാവ് സലിം ഖാന്റെ സ്വാധീനമുണ്ടെന്നും താരം പരിപാടിയിൽ വിശദീകരിച്ചു.മുൻപ് 'കോഫി വിത്ത് കരൺ' പരിപാടിയിൽ താൻ പറഞ്ഞ കാര്യങ്ങൾ വലിയ വാർത്തയായതിനെക്കുറിച്ചും സൽമാൻ സംസാരിച്ചു. തന്റെ സ്വകാര്യജീവിതത്തിലെ എല്ലാ കാര്യങ്ങളും മറ്റുള്ളവരുമായി പങ്കുവയ്‌ക്കേണ്ടതില്ലെന്നായിരുന്നു താരത്തിന്റെ വിശദീകരണം

Content Highlights: Salman Khan has no regrets about remaining unmarried at 60., The actor expressed a strong desire to become a father someday., He discussed his perspective on true loneliness during Koffee with Karan., Sanjay Dutt playfully requested Salman to have a child during a special video message.