ഉറക്കത്തിനായി മെലാടോണിൻ കഴിക്കുന്നവരാണോ? പാർശ്വഫലങ്ങളെക്കുറിച്ച് മുന്നറിയിപ്പുനൽകി ന്യൂറോസയന്റിസ്റ്റ്

സുഖനിദ്ര വലിയൊരു വെല്ലുവിളിയായി മാറിയതോടെ, വിപണിയിൽ ലഭ്യമാകുന്ന മെലാടോണിൻ സപ്ലിമെന്റുകൾ വാങ്ങി ഉപയോഗിക്കുന്നവരുടെ എണ്ണം ക്രമാതീതമായി വർധിച്ചിരിക്കുകയാണ്. എന്നാൽ, കേവലം ഒരു ഹെർബൽ അല്ലെങ്കിൽ പ്രകൃതിദത്ത ഭക്ഷണ സപ്ലിമെന്റ് എന്ന നിലയിൽ വിപണിയിൽ നിന്ന് വാങ്ങി കഴിക്കുന്ന ഈ മെലാടോണിൻ ഗുളികകൾ യഥാർത്ഥത്തിൽ ഒരു ഹോർമോൺ തെറാപ്പിക്ക് തുല്യമാണെന്നും, ഇവയുടെ അമിതോപയോഗം മസ്തിഷ്‌കത്തിന്റെ സ്വാഭാവിക പ്രവർത്തനങ്ങളെ എന്നെന്നേക്കുമായി തടസ്സപ്പെടുത്തിയേക്കാമെന്നും മുന്നറിയിപ്പ് നൽകുകയാണ് ന്യൂറോ സയന്റിസ്റ്റായ കുമാർ ബഗ്രോഡിയ. ഹെൽത്ത് വെൽത്ത് സമ്മിറ്റിൽ സംസാരിക്കുകയായിരുന്നു അദ്ദേഹം. ഉറക്കമില്ലായ്മ അനുഭവപ്പെടുമ്പോൾ അതിന് കാരണമാകുന്ന യഥാർത്ഥ ശാരീരിക-മാനസിക പ്രശ്‌നങ്ങളെ കണ്ടെത്താൻ ശ്രമിക്കാതെ, അതിവേഗ ആശ്വാസത്തിനായി ഗുളികകളെ ആശ്രയിക്കുന്നത് ഭാവിയിൽ വലിയ പ്രത്യാഘാതങ്ങൾ സൃഷ്ടിക്കുമെന്ന് അദ്ദേഹം ചൂണ്ടിക്കാട്ടി.

സമൂഹത്തിൽ ഭൂരിഭാഗം ആളുകളും കരുതുന്നത് മെലാടോണിൻ എന്നത് വിറ്റാമിനുകളെപ്പോലെയോ ധാതുക്കളെപ്പോലെയോ ശരീരത്തിന് പുറത്തുനിന്ന് കഴിക്കാവുന്ന ഒരു പ്രകൃതിദത്ത സപ്ലിമെന്റ് മാത്രമാണെന്നാണ്. എന്നാൽ ഈ ധാരണ തികച്ചും തെറ്റാണെന്ന് കുമാർ ബഗ്രോഡിയ ഓർമിപ്പിക്കുന്നു. എത്രപേരാണ് മേലാടോണിൻ എന്നത് ഒരു പ്രകൃതിദത്ത സപ്ലിമെന്റാണെന്ന് വിചാരിക്കുന്നത്? സത്യത്തിൽ അത് മനുഷ്യ മസ്തിഷ്‌കം സ്വയം ഉത്പാദിപ്പിക്കുന്ന ഒരു ഹോർമോണാണ്. അതുകൊണ്ട് തന്നെ, ഒരു മെലാടോണിൻ ഗുളിക കഴിക്കുമ്പോൾ നിങ്ങൾ നിങ്ങളുടെ ശരീരത്തിലേക്ക് നേരിട്ട് ഒരു ഹോർമോൺ കടത്തിവിടുകയാണ് ചെയ്യുന്നതെന്ന് ഓർക്കുക. അതായത് നിങ്ങൾ സ്വന്തം ഇഷ്ടപ്രകാരം ഒരു ഹോർമോൺ തെറാപ്പിക്ക് വിധേയനാകുന്നു എന്നർത്ഥം, ബഗ്രോഡിയ വ്യക്തമാക്കി.

മനുഷ്യ മസ്തിഷ്‌കം സ്വാഭാവികമായി ഉത്പാദിപ്പിക്കുന്ന മെലാടോണിന്റെ അളവും വിപണിയിൽ ലഭിക്കുന്ന ഗുളികകളിലെ അടക്കവും തമ്മിൽ വലിയ അന്തരം നിലനിൽക്കുന്നുണ്ടെന്ന് അദ്ദേഹം ശാസ്ത്രീയമായി വിശദീകരിച്ചു. ഒരു വ്യക്തിക്ക് സുഖകരമായ ഉറക്കം ലഭിക്കുന്നതിനായി മസ്തിഷ്‌കം ഉത്പാദിപ്പിക്കുന്നത് കേവലം 0.3 മില്ലിഗ്രാം മുതൽ 0.5 മില്ലിഗ്രാം വരെ മെലാടോണിൻ മാത്രമാണ്.

എന്നാൽ മെഡിക്കൽ സ്റ്റോറുകളിൽ നിന്നും ഓൺലൈൻ പ്ലാറ്റ്ഫോമുകളിൽ നിന്നും എളുപ്പത്തിൽ ലഭിക്കുന്ന മെലാടോണിൻ ഗുളികകളിൽ 5 മില്ലിഗ്രാം മുതൽ 10 മില്ലിഗ്രാം വരെ ഹോർമോൺ അടങ്ങിയിട്ടുണ്ട്. അതായത്, നമ്മുടെ മസ്തിഷ്‌കത്തിന് ആവശ്യമായതിന്റെ 10 മുതൽ 15 ഇരട്ടി വരെ ഉയർന്ന അളവിലുള്ള ഹോർമോണാണ് ഒരൊറ്റ ഗുളികയിലൂടെ നാം ശരീരത്തിനുള്ളിലേക്ക് കടത്തിവിടുന്നത്.

ശരീരത്തിന് ആവശ്യമായതിൽ കൂടുതൽ അളവിൽ പുറത്തുനിന്ന് ഒരു ഹോർമോൺ തുടർച്ചയായി ലഭിച്ചു തുടങ്ങുമ്പോൾ, മനുഷ്യശരീരം അതിന്റെ സ്വാഭാവിക ഉത്പാദന പ്രക്രിയ നിർത്തിവെക്കും. ഇതാണ് മേലാടോണിൻ അമിതമായി ഉപയോഗിക്കുന്നവരിൽ സംഭവിക്കുന്നതെന്ന് ന്യൂറോ സയന്റിസ്റ്റ് വ്യക്തമാക്കുന്നു.'നിങ്ങൾ 5 മില്ലിഗ്രാം വരുന്ന ഒരു ഗുളിക കഴിക്കുന്ന ദിവസം, മസ്തിഷ്‌കം അതിന്റെ സ്വാഭാവിക മെലാടോണിൻ ഉത്പാദനം പൂർണ്ണമായും നിർത്തുന്നു. കാരണം പുറത്തുനിന്നുള്ള ഹോർമോണിന്റെ പ്രവാഹത്താൽ മസ്തിഷ്‌കം നിശ്ചലമാകുകയാണ്. ഇതിന്റെ ഫലമായി കുറച്ചു ദിവസത്തെ ഉപയോഗത്തിന് ശേഷം ഈ ഗുളികകളില്ലാതെ വ്യക്തിക്ക് ഉറങ്ങാൻ സാധിക്കാത്ത അവസ്ഥ ഉണ്ടാകുന്നു. സ്വന്തമായി ഹോർമോൺ ഉത്പാദിപ്പിക്കാനുള്ള മസ്തിഷ്‌കത്തിന്റെ ശേഷി താത്കാലികമായോ സ്ഥിരമായോ നഷ്ടപ്പെടുന്നതാണ് ഈ അവസ്ഥയിലേക്ക് നയിക്കുന്നത്,' ബഗ്രോഡിയ കൂട്ടിച്ചേർത്തു.

ഉറക്കം പെട്ടെന്ന് ലഭിക്കാൻ വിപണിയിൽ ലഭിക്കുന്ന ഒരു ഗുളികയ്ക്കും കഴിയില്ലെന്ന് ബഗ്രോഡിയ തുറന്നടിച്ചു. ആളുകൾ എപ്പോഴും ലളിതമായ പരിഹാരങ്ങൾ തിരയുകയാണെന്നും, ഉറക്കമില്ലായ്മയുടെ ആഴത്തിലുള്ള കാരണങ്ങൾ മനസ്സിലാക്കാൻ തയ്യാറാകുന്നില്ലെന്നും അദ്ദേഹം പറഞ്ഞു.'ഉറക്കമില്ലായ്മ എന്നത് സ്വയം ഒരു രോഗമല്ല. മറിച്ച്, നിങ്ങളുടെ ശരീരത്തിലോ മാനസികാരോഗ്യത്തിലോ ഉള്ള ഏതോ ഒരു വലിയ പ്രശ്‌നത്തിന്റെ ബാഹ്യമായ ലക്ഷണം മാത്രമാണ് ഉറക്കമില്ലായ്മ,' അദ്ദേഹം നിരീക്ഷിച്ചു.

അമിതമായ ചിന്തകൾ, മാനസിക സമ്മർദ്ദം, ആകുലതകൾ തുടങ്ങിയ ഘടകങ്ങളാണ് രാത്രിയിൽ മനസ്സിനെ അസ്വസ്ഥമാക്കുന്നത്. അതിനാൽ, ഉറക്ക ഗുളിക കഴിച്ചു താൽക്കാലികമായി ഉറങ്ങാൻ ശ്രമിക്കുന്നതിന് പകരം, ഉറക്കം തടസ്സപ്പെടുത്തുന്ന മാനസികവും നാഡീപരവുമായ കാരണങ്ങൾ കണ്ടെത്തുകയാണ് രോഗികൾ ചെയ്യേണ്ടത്.

ഗുളികകളെ ആശ്രയിക്കാതെ സ്വാഭാവികമായി മികച്ച ഉറക്കം ലഭിക്കുന്നതിനായി ലളിതവും പ്രായോഗികവുമായ ചില ശീലങ്ങൾ കുമാർ ബഗ്രോഡിയ നിർദ്ദേശിക്കുന്നുണ്ട്. ഉറങ്ങുന്ന മണിക്കൂറുകളുടെ എണ്ണം മാത്രമല്ല, ഏത് സമയത്ത് ഉറങ്ങാൻ കിടക്കുന്നു എന്നതും ഏറെ പ്രധാനമാണ്.

സൂര്യാസ്തമയത്തിന് ശേഷം മൂന്നോ നാലോ മണിക്കൂറുകൾ കഴിഞ്ഞു ഉറങ്ങാൻ കിടക്കുന്നതാണ് മസ്തിഷ്‌കത്തിന് ഏറ്റവും അനുയോജ്യം. രാത്രി 10:00 നും 10:30 നും ഇടയിൽ ഉറങ്ങാൻ ശ്രമിക്കണം. രാത്രി വൈകി ജോലി ചെയ്യേണ്ടി വരുന്നവർ, രാവിലെ ഉണരുമ്പോൾ തന്നെ സൂര്യപ്രകാശം കൊള്ളുന്നത് ശരീരത്തിന്റെ ജൈവഘടികാരം പുനഃക്രമീകരിക്കാൻ സഹായിക്കും.പകൽ സമയം മുഴുവൻ ഓഫീസിൽ ഇരുന്നു ജോലി ചെയ്യുന്നവർക്ക് രാത്രിയിൽ ഉറക്കം ലഭിക്കാൻ പ്രയാസമായിരിക്കും. ശരീരത്തിനും മസ്തിഷ്‌കത്തിനും ആവശ്യത്തിന് ശാരീരിക അധ്വാനം ലഭിച്ചാൽ മാത്രമേ രാത്രിയിൽ എളുപ്പത്തിൽ ഉറക്കം വരികയുള്ളൂ.

ഉറക്കമില്ലായ്മയോ അസ്വസ്ഥതയോ ഉള്ളവർ കഫീൻ അടങ്ങിയ പാനീയങ്ങൾ (കാപ്പി, ചായ എന്നിവ) പൂർണ്ണമായും ഒഴിവാക്കണം. മദ്യം കഴിക്കുന്നത് താൽക്കാലികമായി മയക്കം നൽകുമെങ്കിലും, അത് ഉറക്കത്തിന്റെ ആഴത്തെയും ഗുണനിലവാരത്തെയും പൂർണ്ണമായി നശിപ്പിക്കും. ഉറങ്ങാൻ കിടക്കുന്നതിന് 15 മിനിറ്റ് മുൻപെങ്കിലും മുറിയിലെ വെളിച്ചം കുറയ്ക്കുക. മൊബൈൽ ഫോണുകൾ, ലാപ്‌ടോപ്പുകൾ എന്നിവ മാറ്റിവെക്കുക. തണുപ്പുള്ളതും, നിശബ്ദവും, ഇരുണ്ടതുമായ മുറിയാണ് സുഖനിദ്രയ്ക്ക് ഏറ്റവും അനുയോജ്യം. അടുത്ത ദിവസത്തെ പ്ലാനുകളെക്കുറിച്ചും ജോലിഭാരത്തെക്കുറിച്ചും ഓർത്ത് രാത്രിയിൽ അമിതമായി ചിന്തിക്കുന്നവർ, ഉറങ്ങാൻ കിടക്കുന്നതിന് മുൻപ് ചെയ്യേണ്ട കാര്യങ്ങൾ ഒരു ഡയറിയിൽ കുറിച്ചുവെക്കുക. ഇത് മനസ്സിനെ ഭാരരഹിതമാക്കാൻ സഹായിക്കും. കിടക്കയിൽ കിടന്നുകൊണ്ട് 5 സെക്കൻഡ് എടുത്ത് ശ്വാസമെടുക്കുക, തുടർന്ന് 10 സെക്കൻഡ് കൊണ്ട് സാവധാനം ശ്വാസം പുറത്തുവിടുക. ഇരുണ്ട, ശാന്തമായ മുറിയിൽ 5 മിനിറ്റ് നേരം ഈ വ്യായാമം ചെയ്യുന്നത് മസ്തിഷ്‌കത്തെ ഉറക്കത്തിനായി സജ്ജമാക്കും.

Content Highlights: Excessive melatonin intake can halt natural hormone production, leading to dependency and sleep issues, explains neuroscientist Kumar Bagrodia at Health Wealth Summit.