'കുറ്റബോധമില്ലാതെ ജോലിയിലേക്ക് എങ്ങനെ മടങ്ങുമെന്ന് ഞാൻ ആലിയയോട് ചോദിച്ചു'; പ്രസവശേഷമുള്ള വെല്ലുവിളികളെക്കുറിച്ച് കിയാര അദ്വാനി

അമ്മയായതിന് ശേഷം തിരികെ സിനിമാ തിരക്കുകളിലേക്ക് മടങ്ങുമ്പോഴുണ്ടാകുന്ന മാനസിക സംഘർഷങ്ങളെയും 'മോം ഗിൽറ്റിനെയും' കുറിച്ച് മനസ്സുതുറന്ന് ബോളിവുഡ് താരം കിയാര അദ്വാനി. കരൺ ജോഹറിന്റെ 'കോഫി വിത്ത് കരൺ' ഒൻപതാം സീസണിൽ അതിഥിയായി എത്തിയപ്പോഴാണ്, പ്രസവശേഷമുള്ള തന്റെ സംശയങ്ങൾ ദൂരീകരിക്കാൻ സഹതാരം ആലിയ ഭട്ടിനെ വിളിച്ച അനുഭവം കിയാര പങ്കുവെച്ചത്.
'എങ്ങനെയാണ് വീണ്ടും ഷൂട്ടിങ്ങുകളിലേക്ക് മടങ്ങാൻ തയ്യാറെടുക്കുന്നത് എന്ന് ചോദിക്കാൻ ഞാൻ ആലിയയെ വിളിച്ചത് ഓർക്കുന്നു. കാരണം, നമുക്ക് കുടുംബത്തിനാണ് ഏറ്റവും കൂടുതൽ മുൻഗണന നൽകേണ്ടത്. എന്നാൽ ജോലിസ്ഥലത്ത് നമ്മൾ പ്രൊഫഷണലുകളായിരിക്കുകയും വേണം. എപ്പോഴും കുറ്റബോധം തോന്നാതെ ഈ രണ്ട് ലോകങ്ങളെയും എങ്ങനെ ഒരുമിച്ച് കൊണ്ടുപോകാൻ സാധിക്കും എന്നറിയാനാണ് ഞാൻ അവരോട് സംസാരിച്ചത്. എല്ലാ അമ്മമാരും അനുഭവിക്കുന്ന ഒന്നാണ് ഈ 'മോം ഗിൽറ്റ്',' കിയാര വ്യക്തമാക്കി. നടൻ സിദ്ധാർത്ഥ് മൽഹോത്രയും കിയാരയും തങ്ങളുടെ രണ്ടാമത്തെ കുഞ്ഞിനായുള്ള കാത്തിരിപ്പിലാണ് ഇപ്പോൾ.
മാതൃത്വം മനോഹരമായ ഒരു മാറ്റമാണെങ്കിലും, അത് സ്ത്രീകളിൽ വലിയ ശാരീരികവും വൈകാരികവുമായ മാറ്റങ്ങൾ കൊണ്ടുവരുമെന്ന് ആദിത്യ ബിർള എജ്യുക്കേഷൻ ട്രസ്റ്റിലെ സൈക്കോളജിസ്റ്റ് ഋതുജ വരദെ ചൂണ്ടിക്കാട്ടുന്നു. പ്രസവശേഷമുള്ള ഘട്ടം കേവലം ശാരീരികമായ സുഖപ്പെടൽ മാത്രമല്ല, മറിച്ച് പുതിയ ഉത്തരവാദിത്തങ്ങളോടും ജീവിതരീതികളോടും പൊരുത്തപ്പെടുന്ന വൈകാരികമായ ഒരു കാലയളവ് കൂടിയാണ്.
സമാനമായ സാഹചര്യങ്ങളിലൂടെ കടന്നുപോയ മറ്റ് അമ്മമാരോട് സംസാരിക്കുന്നത് പുതിയ അമ്മമാർക്ക് വലിയ ആത്മവിശ്വാസവും ആശ്വാസവും നൽകും. താൻ അനുഭവിക്കുന്ന ക്ഷീണവും വൈകാരികമായ അസ്വസ്ഥതകളും സ്വാഭാവികമാണെന്ന് തിരിച്ചറിയാൻ ഇത് സഹായിക്കും. കുഞ്ഞിനെ പിരിഞ്ഞിരിക്കുന്നതിന്റെ വിഷമം, ഉറക്കമില്ലായ്മ, ശാരീരിക ക്ഷീണം എന്നിവയ്ക്കിടയിലാണ് ഒരു സ്ത്രീ ജോലിയിലേക്ക് മടങ്ങുന്നത്. ഈ ഘട്ടത്തിൽ കുടുംബാംഗങ്ങളുടെയും ജോലിസ്ഥലത്തെ സഹപ്രവർത്തകരുടെയും ക്ഷമയും പിന്തുണയും അത്യന്താപേക്ഷിതമാണ്.
വീട്ടിലെ ഉത്തരവാദിത്തങ്ങൾ പങ്കുവെക്കുന്ന പങ്കാളിയും, അമ്മമാരുടെ ആവശ്യങ്ങൾ മനസ്സിലാക്കുന്ന തൊഴിലിടങ്ങളും ഉണ്ടെങ്കിൽ മാത്രമേ പ്രസവശേഷമുള്ള തിരിച്ചുവരവ് സ്ത്രീകൾക്ക് എളുപ്പമാകൂ എന്നും വിദഗ്ധർ ഓർമ്മിപ്പിക്കുന്നു.
Content Highlights: Kiara Advani and Alia Bhatt discuss balancing family and professional life, addressing mom guilt and emotional challenges faced by new mothers in Bollywood.