'വിലങ്ങുവെച്ച കൈകളുമായി അവന്‍ മുന്നില്‍, എന്നെ കാണാതിരിക്കാന്‍ ഞാന്‍ മാറിനിന്നു'
കിരീടം സിനിമ പണ്ടെന്നോ ടിവിയില്‍ കണ്ട ഓര്‍മയാണ്.പിന്നീട് ഒരിക്കലും ആ സിനിമ കാണാന്‍ തോന്നിയിട്ടില്ല. സബ് ഇന്‍സ്‌പെക്ടര്‍ ആകാന്‍ ദിവസങ്ങള്‍ മാത്രം ബാക്കിയിരിക്കെ കൊലപാതകിയായി മാറേണ്ടി വന്ന സേതുമാധവന്‍ എന്ന മോഹന്‍ലാല്‍ കഥാപാത്രം എന്നും നെഞ്ചില്‍ ഒരു വിങ്ങലാണ്. അച്ഛനെ റൗഡി തല്ലുന്ന ദിവസം, അല്ലെങ്കില്‍ ആ സമയം അവിടെ സേതുമാധവന്‍ ഉണ്ടായിരുന്നില്ലെങ്കില്‍ അയാളുടെ ഭാവി വേറൊരു തലത്തിലേക്ക് മാറുമായിരുന്നു. സിനിമയാണെങ്കിലും എന്തോ കിരീടം ടിവിയില്‍ വരുമ്പോഴൊന്നും ഒരിക്കല്‍കൂടി കാണാന്‍ തോന്നിയിട്ടില്ല.
കിരീടത്തിലെ പോലെ ഒരു സേതുമാധവന്‍ എന്റെ ജീവിതത്തിലും ഉണ്ടായി. എന്റെ ഏറ്റവും നല്ല ഒരു സുഹൃത്ത്. തൃശൂരില്‍ വന്നിട്ട് ഞാന്‍ ആദ്യം പരിചയപ്പെട്ട കൂട്ടുകാരന്. മനസ് നിറയെ നന്മ മാത്രമുള്ള ഒരു ചെറുപ്പക്കാരന്‍. അച്ഛന്റെയും അമ്മയുടെയും ഏക മകന്‍. ശപിക്കപ്പെട്ട നിമിഷത്തില്‍ അവന്‍ അവന്റെ ഒരു കൂട്ടുകാരന് ചെയ്ത നന്മ അവന്റെ തന്നെ ജീവിതം ഇല്ലാതാക്കി. നമ്മള്‍ പ്രതീക്ഷിക്കാതെ എന്തൊക്കെ നമ്മളിലേക്ക് വരുന്നു. ഭാവി അറിയാന്‍ പറ്റിയിരുന്നെങ്കില്‍ നമ്മളില്‍ പലരും ചിത്തരോഗികള്‍ ആയേനെ എന്ന് പറയുന്നത് എത്ര ശരിയാണ്.
Content Highlights: a friend like sethumadhavan in the movie kireedam