മൊബൈൽ അഡിക്ഷൻ എന്ന രാവണൻകോട്ട, പക്ഷേ, പുറത്തേക്ക് വഴികളുണ്ട് | പരമ്പര 06

പിതാവിനൊപ്പം കൂനിക്കൂടി ഇന്റർനെറ്റ് ഡി അഡിക്ഷൻ സെന്ററിന്റെ ഒരു മൂലയ്ക്ക് അവൻ ഇരിപ്പുണ്ട്. പാറിക്കളിക്കുന്ന മുടിയും വരണ്ട ചുണ്ടുകളും അലക്ഷ്യമായിട്ടെങ്ങോ നോക്കിക്കൊണ്ട്. ആളുകൾ വരുന്നതും പോകുന്നതും അവൻ ശ്രദ്ധിക്കുന്നതേയില്ല. കൈയും പിടിച്ച് തൊട്ടടുത്ത് തന്നെ ഊഴം കാത്ത് പിതാവും ഇരിപ്പുണ്ട്. 'എവിടെയോ നഷ്ടപ്പെട്ട അവന്റെ മുഖത്തെ പുഞ്ചിരി വീണ്ടെടുക്കാനുള്ള നെട്ടോട്ടത്തിലാണ് ആ പിതാവ്', ഡി അഡിക്ഷൻ സെന്ററിലെ മനഃശാസ്ത്രജ്ഞൻ പറഞ്ഞു.

ഒൻപതാം ക്ലാസ് മുതൽ മൊബൈലിന് അഡിക്ട് ആയതാണ് കുട്ടി. അതുൽ എന്ന് നമുക്കവനെ വിളിക്കാം. പിതാവിന്റെ ഫോണിലായിരുന്നു തുടക്കത്തിൽ അതുൽ വീഡിയോകൾ കണ്ടു തുടങ്ങിയതും ഗെയിമുകളും കളിച്ചു തുടങ്ങിയതും. സ്കൂൾ വിട്ടു വന്നാൽ മൊബൈലുമെടുത്ത് മുറിയിലേക്ക് പോകും. പിന്നീട് രാത്രി ഭക്ഷണത്തിനോ അല്ലെങ്കിൽ പിതാവിന്റെ മൊബൈലിലേക്ക് ആരുടെയെങ്കിലും കോൾ വന്നാലോ മാത്രമേ അവൻ പുറത്തുവരൂ. മൊബൈലുമായി സംബന്ധിച്ച എന്തു കാര്യങ്ങളും പെട്ടെന്ന് തന്നെ പ്രതിവിധി കണ്ടെത്തുന്ന മകനെ ഓർത്ത് ആ പിതാവ് ഇടയ്ക്ക് അഭിമാനം കൊള്ളുകയും ചെയ്തു. കോവിഡ് കാലമായതോടെ അതുൽ പൂർണമായും മുറിയിലേക്ക് ഒതുങ്ങി. ഓൺലൈനിലേക്ക് ക്ലാസുകൾ മാറിയതോടെ രക്ഷിതാക്കൾ മൊബൈലും വാങ്ങി നൽകിയിരുന്നു, അതോടെ അവനിൽ ഉണ്ടായിരുന്ന രക്ഷിതാക്കളുടെ നിയന്ത്രണം പൂർണ്ണമായും നഷ്ടപ്പെട്ടു.

Content Highlights: what is solution for internet addiction children specialist talk ingane mathiyo e bodham