അന്ധത മുതൽ ഹൃദയാഘാതം വരെ; അമിത രക്തസമ്മർദ്ദമെന്ന 'നിശബ്ദ കൊലയാളി'

സമൂഹത്തിൽ ഇന്ന് വ്യാപകമായി കാണപ്പെടുന്ന ആരോഗ്യാവവസ്ഥയാണ് അമിത രക്തസമ്മര്‍ദ്ദം അഥവാ ഹൈപ്പര്‍ടെന്‍ഷന്‍. 'നിശബ്ദ കൊലയാളി' എന്ന് വിളിക്കാവുന്ന അമിത രക്തസമ്മര്‍ദ്ദം ഹൃദയാഘാതം, പക്ഷാഘാതം, വൃക്ക തകരാറ്, കാഴ്ച നഷ്ടം തുടങ്ങിയ ഗുരുതരവും ജീവന് ഭീഷണിയുമായ അവസ്ഥകള്‍ക്ക് കാരണമാകുന്നതുവരെ പലപ്പോഴും ശ്രദ്ധിക്കപ്പെടാതെ പോകുന്നു എന്നതാണ് പ്രത്യേകത.

 അമിത രക്തസമ്മര്‍ദ്ദം ഇന്ത്യയില്‍

നമ്മുടെ രാജ്യത്ത്, എല്ലാ മരണങ്ങളും നോക്കിയാല്‍ ഏകദേശം 28 ശതമാനം ഹൃദയ സംബന്ധമായ അസുഖങ്ങള്‍ മൂലമാണ്. ഇതില്‍ ഏറ്റവും പ്രധാനപ്പെട്ട  അപകട ഘടകങ്ങളിലൊന്ന് അമിത രക്തസമ്മര്‍ദ്ദമാണ്. ദേശീയ കുടുംബാരോഗ്യ സര്‍വേ (NFHS-5, 2019-21) പ്രകാരം:

• 15 വയസ്സിനു മുകളിലുള്ള പുരുഷന്മാരില്‍ 24 ശതമാനം പേര്‍ക്കും 21 ശതമാനം സ്ത്രീകളിലും ഉയര്‍ന്ന രക്തസമ്മര്‍ദ്ദ നിലയുണ്ട്.
• ഐസിഎംആർ-ഇന്ത്യ ബി പ്രോജക്റ്റില്‍ നിന്നുള്ള പഠനങ്ങള്‍ കണക്കാക്കുന്നത് നഗരപ്രദേശങ്ങളിലെ മുതിര്‍ന്നവരില്‍ 30 മുതൽ 40 ശതമാനം പേരും ഗ്രാമപ്രദേശങ്ങളില്‍ 15 മുതൽ 25 ശതമാനം പേരും ഹൈപ്പര്‍ടെന്‍ഷന്‍  അനുഭവിക്കുന്നു. 

കേരളം: ഉയര്‍ന്ന അപകടസാധ്യതയുള്ള മേഖല

വിപുലമായ ആരോഗ്യ സംരക്ഷണ സൂചകങ്ങള്‍ക്ക് പേരുകേട്ട നമ്മുടെ സംസ്ഥാനം, അമിത രക്തസമ്മര്‍ദ്ദ വ്യാപന നിരക്കിന്റെ കാര്യത്തില്‍ ഇന്ത്യയിലെ ഏറ്റവും ഉയര്‍ന്ന  സ്ഥാനത്താണ് ഉള്ളതെന്നത് വിരോധാഭാസമായി കാണാം. 2023-ല്‍ കേരള ആരോഗ്യ വകുപ്പ് നടത്തിയ ഒരു പഠനത്തില്‍ പ്രധാനമായി കണ്ടെത്തിയത് ഇക്കാര്യങ്ങളാണ്:

• സംസ്ഥാനത്തെ മുതിര്‍ന്നവരില്‍ 33 ശതമാനത്തിലധികം പേര്‍ക്ക് അമിത രക്തസമ്മര്‍ദ്ദം  ഉണ്ട്. 
• കേരളത്തിലെ മൊത്തം ജനസംഖ്യയുടെ 12.6 ശതമാനം വരുന്ന 60 വയസ്സിനു മുകളില്‍ പ്രായമുള്ളവരില്‍ ഇത് സര്‍വ്വസാധാരണമാണ്.  
• നഗരവത്കരണം, ഫാസ്റ്റ് ഫുഡ് സംസ്‌കാരത്തിന്റെ വ്യാപനം, ഉദാസീനമായ ജീവിതശൈലി എന്നിവയാണ് ഈ കുതിച്ചുചാട്ടത്തിന് ആക്കം കൂട്ടിയത്.

ആശങ്കയാകുന്നത് എന്തുകൊണ്ട്?

ലക്ഷണമില്ലാത്ത സ്വഭാവം അമിത രക്തസമ്മർദ്ദത്തിനുള്ളത്. സങ്കീര്‍ണതകള്‍ ഉണ്ടാകുന്നതുവരെ മിക്ക വ്യക്തികളും ഈ രോഗത്തെക്കുറിച്ച് അജ്ഞരാണ്. അമിത രക്തസമ്മര്‍ദ്ദവുമായി ബന്ധപ്പെട്ട ആരോഗ്യ സംരക്ഷണ ചെലവുകള്‍ക്കായി നമ്മുടെ രാജ്യത്തിന് വന്‍ തുക ചെലവഴിക്കേണ്ടി വരുന്നു. ഉത്പാദനക്ഷമത നഷ്ടപ്പെടുന്നതിനും ഇത് കാരണമാകുന്നു.

രോഗനിര്‍ണയത്തിനുള്ള ഐസിഎംആര്‍ മാര്‍ഗ്ഗനിര്‍ദ്ദേശങ്ങള്‍

• സാധാരണ രക്തസമ്മര്‍ദ്ദം: 120/80 mmHg-ന് താഴെ
• പ്രീ-ഹൈപ്പര്‍ടെന്‍ഷന്‍: 120-139/80-89 mmHg
• രക്തസമ്മര്‍ദ്ദം (ഘട്ടം ഒന്നും അതിനുമുകളിലും): 140/90 mmHg-ഉം അതിനുമുകളിലും

എങ്ങനെ കൈകാര്യം ചെയ്യാം?

• ആരോഗ്യകരമായ ഭക്ഷണക്രമം
• ഉപ്പ് കഴിക്കുന്നത് പ്രതിദിനം 5 ഗ്രാമായി പരിമിതപ്പെടുത്തുക (WHO ശുപാര്‍ശ)
• ട്രാന്‍സ്ഫാറ്റുകളും അള്‍ട്രാ-പ്രോസസ് ചെയ്ത ഭക്ഷണങ്ങളും ഒഴിവാക്കുക
• പൊട്ടാസ്യം അടങ്ങിയ പഴങ്ങളും പച്ചക്കറികളും കഴിക്കുക.
• നടത്തം, യോഗ, സൈക്ലിംഗ് തുടങ്ങിയ മിതമായ വ്യായാമം ഒരു ദിവസം കുറഞ്ഞത് 30 മിനിറ്റ് എങ്കിലും പതിവാക്കുക.
• പതിവ് ആരോഗ്യ പരിശോധനകള്‍ നടത്തുക.
• നിങ്ങള്‍ക്ക് അപകടസാധ്യതയുണ്ടെങ്കില്‍, 6-12 മാസത്തിലൊരിക്കലെങ്കിലും ബിപി പരിശോധിക്കുക
• ഡോക്ടര്‍ നിര്‍ദ്ദേശിച്ച മരുന്നുകള്‍ മുടങ്ങാതെ കഴിക്കുക. 
• അവനവന് തോന്നുന്ന പോലെ മരുന്ന് കഴിക്കുകയോ പെട്ടെന്ന് നിര്‍ത്തുകയോ ചെയ്യുന്നത് ഒഴിവാക്കുക
• സമ്മര്‍ദ്ദം നിയന്ത്രിക്കുക
• ശ്രദ്ധ, ധ്യാനം, ദീര്‍ഘ ശ്വസനം എന്നിവ പരിശീലിക്കുക
• ജോലി-ജീവിതം സന്തുലിതമാക്കുക, മതിയായ ഉറക്കം ഉറപ്പു വരുത്തുക.

നിങ്ങള്‍ക്ക് എന്തുചെയ്യാന്‍ കഴിയും?

ഇത്തവണത്തെ ലോക ഹൈപ്പര്‍ടെന്‍ഷന്‍ ദിനത്തോടനുബന്ധിച്ച് നമുക്ക് കൂട്ടായി പ്രവര്‍ത്തിക്കാൻ തീരുമാനിക്കാം. ഇതിന്റെ ഭാഗമായി നിങ്ങളുടെ ബിപി പതിവായി പരിശോധിക്കുക. പ്രത്യേകിച്ച് നിങ്ങള്‍ക്ക് 30 വയസ്സിനു മുകളില്‍ പ്രായമുണ്ടെങ്കില്‍. പ്രിയപ്പെട്ടവരെ ഹൃദയാരോഗ്യകരമായ ശീലങ്ങള്‍ സ്വീകരിക്കാന്‍ പ്രോത്സാഹിപ്പിക്കുന്നത് ശീലമാക്കുക. സ്‌കൂളുകളിലും ഓഫീസുകളിലും കമ്മ്യൂണിറ്റികളിലും ബോധവല്‍ക്കരണ പ്രവര്‍ത്തനങ്ങള്‍ക്ക് പിന്തുണ നല്‍കുക. 'നിങ്ങളുടെ രക്തസമ്മര്‍ദ്ദം കൃത്യമായി അളക്കുക, നിയന്ത്രിക്കുക, കൂടുതല്‍ കാലം ജീവിക്കുക' എന്ന പ്രമേയം നമുക്ക് ഏവര്‍ക്കും മനസാ സ്വീകരിക്കാം.

(തലശ്ശേരി മിഷന്‍ ആശുപത്രിയിലെ ജനറല്‍ മെഡിസിന്‍ വിഭാഗം സീനിയര്‍ കണ്‍സല്‍ട്ടന്റാണ് ലേഖകൻ)

Content Highlights: Hypertension is a silent killer. It must be tackled down