അവൻ കരഞ്ഞുകൊണ്ട് പറഞ്ഞു; അമ്മയ്ക്ക് എന്നും മാറിൽ നല്ല വേദനയാണ് | Doctors Diary

NSS (നാഷണൽ സർവീസ് സ്കീം ) സംഘടിപ്പിച്ച ഒരു കാൻസർ ബോധവൽക്കരണ ക്ലാസ്സായിരുന്നു അത്.. പെൺകുട്ടികളാണ് കൂടുതലും  ഉണ്ടായിരുന്നത്, കൂട്ടത്തിൽ വിരലിലെണ്ണാവുന്ന കുറച്ച് ആൺകുട്ടികളും. എല്ലാവരും കേൾക്കേണ്ട ക്ലാസാണെന്നു പറഞ്ഞുതന്നെയാണ് തുടങ്ങിയത്. എങ്കിൽപോലും സ്തനപരിശോധനയുടെ ഭാഗമൊക്കെയായപ്പോൾ ആൺകുട്ടികളുടെ മുഖത്ത് അസ്വസ്ഥതയും ചമ്മലുമൊക്കെ കാണാമായിരുന്നു. ആൺകുട്ടികളും കേൾക്കേണ്ട ക്ലാസ്സാണെന്ന് വീണ്ടും ഓർമപ്പെടുത്തിക്കൊണ്ട് അവരോട് ഒരു കാര്യംകൂടി പറഞ്ഞു. "നിങ്ങൾ വീട്ടിൽ പോയി അമ്മയോടും ചേച്ചിമാരോടും അനിയത്തിമാരോടുമൊക്കെ ഈ പറഞ്ഞ കാര്യങ്ങൾ പറഞ്ഞു കൊടുക്കണം. അവർക്കൊക്കെ ഈ ലക്ഷണങ്ങൾ എന്തെങ്കിലുമുണ്ടോ എന്ന് കൃത്യമായി ചോദിക്കണം.. അതുപോലെ തന്നെ സ്വയം സ്തനപരിശോധനാരീതികൾ പറഞ്ഞു കൊടുക്കുകയും വേണം...." 

പുരുഷന്മാരിലും മാറിലെ കാൻസർ വരാനുള്ള സാധ്യത ഉണ്ടെന്നൊക്കെ പറഞ്ഞത് വിശ്വസിക്കാൻ അവർക്ക് മടിയുള്ളതുപോലെ തോന്നി. ഞങ്ങൾ ക്ലാസ്സ് കഴിഞ്ഞ് ഇറങ്ങാൻ നിൽക്കുമ്പോൾ ഒരാൺകുട്ടി എന്തോ പറയാനുണ്ടെന്ന ഭാവത്തിൽ ഞങ്ങളുടെ അടുത്തേക്ക് വന്നു. ക്യാമ്പുകൾ കഴിഞ്ഞാൽ ഇതു പലപ്പോഴും സംഭവിക്കുന്ന കാഴ്ചയാണ്. ആ കുട്ടിയെ ഞാൻ ആദ്യമേ ശ്രദ്ധിച്ചിരുന്നു. ശ്രദ്ധിച്ചു കേട്ടിരിക്കുന്നുണ്ടെങ്കിലും ഒന്നിനോടും കൂടുതലായി പ്രതികരിക്കുന്നുണ്ടായിരുന്നില്ല. അവന്റെ കണ്ണുനിറഞ്ഞിരുന്നു. ഉള്ളിലെ സങ്കടവും വെപ്രാളവും അടക്കിപിടിച്ചുകൊണ്ട് അവൻ പറഞ്ഞു തുടങ്ങി. "ഡോക്ടർ എൻ്റെ അമ്മയ്ക്ക് എന്നും മാറിൽ വേദനയാണ് എന്നു പറയുന്നുണ്ട്. ഞാൻ കുറെ ദിവസമായി ഇത് കേൾക്കുന്നു. അച്ഛൻ കള്ളുകുടിച്ചുവന്ന് എന്നും വഴക്കാണ്. അമ്മ ചിലപ്പോഴൊക്കെ ഇരുന്നു കരയുന്നതുകാണാറുണ്ട്. നല്ല വേദനയുണ്ടെന്നു പറഞ്ഞാണ് കരയുന്നത്. എൻ്റെ അമ്മയ്ക്ക് എന്തോ കുഴപ്പമുണ്ട്. ഞാൻ ഇനി എന്താ ചെയ്യുക എന്നവൻ ചോദിക്കുന്നുണ്ടായിരുന്നു. ക്ലാസ് കേട്ട് അവൻ എല്ലാം ഉറപ്പിച്ചപോലെയാണ് പറഞ്ഞത്. അമ്മയ്ക്ക് കുഴപ്പമൊന്നും ഉണ്ടാകില്ല, വിഷമിക്കണ്ട എന്നുപറഞ്ഞു ഞങ്ങൾ അവനെ സമാധാനിപ്പിച്ചെങ്കിലും ആ കണ്ണുകളിൽ അപ്പോഴും ആസ്വസ്ഥയുടെ നനവ് ബാക്കിയായിരുന്നു. നാളെ അമ്മയെ കൂട്ടി ഹോസ്പിറ്റലിലേക്കു വരാൻ പറഞ്ഞ് ഞങ്ങൾ അവിടെ നിന്നിറങ്ങി. പക്ഷേ ഒരുപാടുദിവസങ്ങൾ പിന്നിട്ടിട്ടും അവർ ഹോസ്പിറ്റലിലേക്ക് വന്നില്ല.

Content Highlights: column on breast cancer awareness