ഹോട്ട് ആന്ഡ് സ്പൈസി; രുചിയേറും അയക്കൂറ ഫ്രൈ ഉണ്ടാക്കാം
ചോറിനൊപ്പം ഒരു ഫിഷ് ഫ്രൈ ഉണ്ടെങ്കില് പിന്നെ കറികളെന്തിന് ചോദിക്കുന്നവരുണ്ട്. മത്സ്യപ്രിയരുടെ ഇഷ്ടപ്പെട്ട ഒന്നാണ് അയക്കൂറ (നെയ്മീൻ). അയക്കൂറ കൊണ്ട് രുചിയേറുന്ന ഒരു ഫ്രൈ തയ്യാറാക്കാം. കാഴ്ചയില് കൂടി മനോഹരമായ ഈ ഫിഷ് ഫ്രൈ എങ്ങനെയാണ് ഉണ്ടാക്കുതെന്ന് നോക്കാം.
ചേരുവകള്
അയക്കൂറ (നെയ്മീന്)- 2 കഷണങ്ങള്
ഉപ്പ് -പാകത്തിന്
ഇഞ്ചി അരിഞ്ഞത്- 10 ഗ്രാം
വെളുത്തുള്ളി അരിഞ്ഞത്- 10 ഗ്രാം
ചെറിയ ഉള്ളി അരിഞ്ഞത്- 50 ഗ്രാം
കറിവേപ്പില- 1 തണ്ട്
നാരങ്ങ നീര്- 10 മില്ലി
മഞ്ഞള്പ്പൊടി- 2 ഗ്രാം
കുരുമുളക് പൊടി- 5 ഗ്രാം
കശ്മീരി മുളകുപൊടി- 15 ഗ്രാം
വെളിച്ചെണ്ണ- 85 മില്ലി
പാചകരീതിയിലേയ്ക്ക്
അയക്കൂറ ഹൃദയത്തിന്റെ ആകൃതിയിലുള്ള കഷണങ്ങളായി മുറിച്ചെടുക്കണം.ഉപ്പ്, കുരുമുളക്, മഞ്ഞള്പ്പൊടി, നാരങ്ങ നീര്, കാശ്മീരി മുളകുപൊടി എന്നിവ നന്നായി യോജിപ്പിക്കുക.
ഹൃദയാകൃതിയില് മുറിച്ച മത്സ്യം ഈ പേസ്റ്റ് ഉപയോഗിച്ച് നന്നായി മാരിനേറ്റ് ചെയ്യുക.
ബാക്കിയുള്ള ഈ പേസ്റ്റിലേയ്ക്ക് വെളുത്തുള്ളി, ഇഞ്ചി, ചെറിയ ഉള്ളി, കറിവേപ്പില എന്നിവ ചേര്ത്ത് നന്നായി ഇളക്കുക. വെളിച്ചെണ്ണ ഉപയോഗിച്ച് മീന് ഫ്രൈ ചെയ്യുക. മീന് പകുതി വേവിച്ചു കഴിഞ്ഞാല്, തയ്യാറാക്കിയ മസാല മത്സ്യത്തിന്റെ ഇരുവശങ്ങളിലും പുരട്ടി 5 മുതല് 8 മിനിറ്റ് വരെ ചെറിയ തീയില് വേവിക്കുക.
അരിഞ്ഞ പച്ചക്കറികള് ഹൃദയാകൃതിയില് ഒരു പ്ലേറ്റില് അടുക്കിയശേഷം തയ്യാറാക്കിയ മത്സ്യം വെച്ച് അലങ്കരിക്കാം. ചോറിനൊപ്പം കഴിയ്ക്കാന് ഉഗ്രന് ഫിഷ് ഫ്രൈ റെഡി.
Content Highlights: hot and spicy fish fry,king fish fry,fish fry,fish recipes,food