ദഹനം മെച്ചപ്പെടുത്തും, പ്രതിരോധശേഷി കൂട്ടും, ചര്‍മത്തിനും നല്ലത്; തുളസിവെള്ളത്തിന്റെ ഗുണങ്ങളറിയാം
മലയാളികളുടെ വീട്ടുമുറ്റത്തോ പരിസരങ്ങളിലോ സുലഭമായ ഔഷധച്ചെടിയാണ് തുളസി. തുളസിയില വെറുതേ കഴിക്കുന്നതും തുളസിയിലയിട്ട വെള്ളം കുടിക്കുന്നതും ആരോഗ്യത്തിന് നല്ലതാണെന്ന് കാലങ്ങളായി നാം കേള്‍ക്കുന്നുണ്ട്.
തുളസി ഇലകള്‍ വെള്ളത്തിലിട്ട് തിളപ്പിച്ച് തയ്യാറാക്കുന്ന പാനീയമാണ് തുളസിവെള്ളം. ആന്റിഓക്സിഡന്റുകള്‍, അവശ്യ എണ്ണകള്‍, ബയോആക്റ്റീവ് സംയുക്തങ്ങള്‍ എന്നിവ തുളസിയില്‍ അടങ്ങിയിരിക്കുന്നു. എന്തൊക്കെയാണ് തുളസി വെള്ളം കുടിച്ചാലുള്ള ഗുണങ്ങള്‍ എന്ന് പരിശോധിക്കാം.
ദഹനം മെച്ചപ്പെടുത്തുന്നു
തുളസി വെള്ളം പതിവായി കുടിക്കുന്നത് ദഹനത്തിന് സഹായിക്കുന്ന എന്‍സൈമുകളുടെ ഉത്പാദനം കൂട്ടുന്നതിനാല്‍ അത് ദഹനാരോഗ്യം മെച്ചപ്പെടുത്താന്‍ സഹായിക്കുന്നു. തുളസിയുടെ ആന്റി-ഇന്‍ഫ്‌ളമേറ്ററി പദാര്‍ഥങ്ങള്‍ വയറുവീര്‍ക്കുന്നത് കുറയ്ക്കുകയും ആമാശയത്തിലെ പാളികളെ ശമിപ്പിക്കുകയും ചെയ്യുന്നു. ഇത് വയറുവേദന, ദഹനക്കേട്, ആസിഡിറ്റി തുടങ്ങിയ പ്രശ്‌നങ്ങള്‍ക്ക് ആശ്വാസം നല്‍കുന്നു.
ശ്വസനവ്യവസ്ഥയുടെ ആരോഗ്യം
ആന്റി-ഇന്‍ഫ്‌ളമേറ്ററി, ആന്റിമൈക്രോബയല്‍, എക്‌സ്‌പെക്ടറന്റ് എന്നിവയ്ക്ക് സഹായിക്കുന്ന പദാര്‍ഥങ്ങള്‍ അടങ്ങിയതിനാല്‍ തുളസി വെള്ളം ശ്വസനവ്യവസ്ഥയുടെ ആരോഗ്യത്തിന് ഗുണകരമാണ്. ശ്വാസനാളങ്ങളില്‍ നിന്ന് കഫം നീക്കം ചെയ്യാന്‍ സഹായിക്കുന്ന സംയുക്തങ്ങള്‍ ഇതില്‍ അടങ്ങിയിട്ടുണ്ട്. ഇത് ശ്വാസമെടുക്കുന്നത് എളുപ്പമാക്കുന്നു.
പ്രതിരോധശേഷി വര്‍ധിപ്പിക്കുന്നു
തുളസി വെള്ളം കുടിക്കുന്നത് രോഗപ്രതിരോധ ശേഷി വര്‍ധിപ്പിക്കാന്‍ സഹായിക്കും. തുളസിയിലെ ആന്റിഓക്സിഡന്റുകളും അവശ്യ എണ്ണകളും ഇത് ഫ്രീ റാഡിക്കലുകളെ ചെറുക്കുകയും അണുബാധകള്‍ക്കെതിരെ പോരാടാനുള്ള ശരീരത്തിന്റെ കഴിവിനെ ശക്തിപ്പെടുത്തുകയും ചെയ്യുന്നു.
സമ്മര്‍ദവും ഉത്കണ്ഠയും കുറയ്ക്കുന്നു
തുളസി വെള്ളത്തിന് അഡാപ്‌റ്റോജെനിക് പദാര്‍ഥങ്ങളുണ്ട്. ഇത് സമ്മര്‍ദത്തെയും ഉത്കണ്ഠയെയും നേരിടാന്‍ ശരീരത്തെ സഹായിക്കുന്നു. തുളസിയിലെ ബയോആക്റ്റീവ് സംയുക്തങ്ങള്‍ സമ്മര്‍ദത്തിന് കാരണമാകുന്ന ഹോര്‍മോണായ കോര്‍ട്ടിസോളിന്റെ അളവ് നിയന്ത്രിക്കുന്നു.
ഹൃദയാരോഗ്യം
തുളസി വെള്ളം രക്തചംക്രമണം മെച്ചപ്പെടുത്തുകയും കൊളസ്ട്രോളിന്റെ അളവ് കുറയ്ക്കുകയും ചെയ്യുന്നു. ഇത് ഹൃദയാരോഗ്യത്തിന് നല്ലതാണ്. തുളസിയിലെ ആന്റിഓക്സിഡന്റുകള്‍ കൊളസ്ട്രോളിന്റെ ഓക്സിഡേഷന്‍ തടയുകയും ധമനികളില്‍ കൊഴുപ്പടിയുന്നത് കുറയ്ക്കുകയും ചെയ്യുന്നു. തുളസിയുടെ ആന്റി-ഇന്‍ഫ്‌ളമേറ്ററി ഗുണങ്ങള്‍ രക്തസമ്മര്‍ദം കുറയ്ക്കുന്നതും ഹൃദയാരോഗ്യം മെച്ചപ്പെടാന്‍ കാരണമാകുന്നു.
രക്തത്തിലെ പഞ്ചസാരയുടെ അളവ് നിയന്ത്രിക്കുന്നു
തുളസി വെള്ളം രക്തത്തിലെ പഞ്ചസാരയുടെ അളവ് നിയന്ത്രിക്കാന്‍ സഹായിക്കും. ഇത് പ്രമേഹരോഗികള്‍ക്ക് ഗുണകരമാണ്. തുളസിയിലെ ഫൈറ്റോകെമിക്കലുകള്‍ ഇന്‍സുലിന്‍ ഉത്പാദനം കൂട്ടുകയും ഇന്‍സുലിന്‍ സെന്‍സിറ്റിവിറ്റി മെച്ചപ്പെടുത്തുകയും ചെയ്യുന്നു. രക്തത്തിലെ ഗ്ലൂക്കോസിന്റെ അളവ് സ്ഥിരപ്പെടുത്തുന്നതിലൂടെ പെട്ടെന്നുള്ള ഏറ്റക്കുറച്ചിലുകള്‍ തടയാന്‍ തുളസി വെള്ളം സഹായിക്കുന്നു.
വായിലെ ആരോഗ്യം മെച്ചപ്പെടുത്തുന്നു
ആന്റി ബാക്ടീരിയല്‍, ആന്റി-ഇന്‍ഫ്‌ളമേറ്ററി ഗുണങ്ങള്‍ കാരണം തുളസി വെള്ളത്തിന് വായിലെ ആരോഗ്യം മെച്ചപ്പെടുത്താന്‍ കഴിയും. തുളസിവെള്ളം പതിവായി കുടിക്കുന്നത് വായിലെ ഹാനികരമായ ബാക്ടീരിയകളുടെ വളര്‍ച്ച കുറയ്ക്കുകയും പല്ലിലെ കേടുപാടുകള്‍, വായ്നാറ്റം തുടങ്ങിയവ തടയുകയും ചെയ്യുന്നു.
ചര്‍മത്തിന്റെ ആരോഗ്യം മെച്ചപ്പെടുത്തുന്നു
ആന്റിഓക്സിഡന്റ് ഗുണങ്ങളുള്ളതിനാല്‍ ശരീരത്തിലെ വിഷാംശം നീക്കം ചെയ്യാനും ചര്‍മത്തിന്റെ ആരോഗ്യം മെച്ചപ്പെടുത്താനും തുളസി വെള്ളം കുടിക്കുന്നത് ഗുണംചെയ്യും. ഇതിന്റെ ആന്റിമൈക്രോബയല്‍ ഗുണങ്ങള്‍ മുഖക്കുരു ഉണ്ടാക്കുന്ന ബാക്ടീരിയകളില്‍ നിന്ന് ചര്‍മത്തെ സംരക്ഷിക്കുകയും ആന്റി-ഇന്‍ഫ്‌ളമേറ്ററി ഗുണങ്ങള്‍ ചര്‍മത്തിലെ വീക്കവും ചുവപ്പും കുറയ്ക്കുകയും ചെയ്യുന്നു.
വൃക്കകളുടെ പ്രവര്‍ത്തനം
ശരീരത്തിലെ വിഷാംശം നീക്കംചെയ്യാനും രക്തത്തിലെ യൂറിക് ആസിഡിന്റെ അളവ് കുറയ്ക്കാനും സഹായിക്കുന്നതിലൂടെ തുളസി വെള്ളം വൃക്കകളുടെ പ്രവര്‍ത്തനത്തെ പിന്തുണയ്ക്കുന്നു. തുളസിയുടെ ഡൈയൂററ്റിക് ഗുണങ്ങള്‍ മൂത്രത്തിന്റെ ഉത്പാദനം വര്‍ധിപ്പിക്കുകയും, വിഷവസ്തുക്കളെ പുറന്തള്ളാനും വൃക്കയിലെ കല്ലുകള്‍ തടയാനും സഹായിക്കുന്നു.
ശരീരഭാരം നിയന്ത്രിക്കാന്‍ സഹായിക്കുന്നു
തുളസി വെള്ളം പതിവായി കുടിക്കുന്നത് മെറ്റബോളിസം കൂട്ടുകയും കൊഴുപ്പ് കുറയ്ക്കാന്‍ സഹായിക്കുകയും ചെയ്യുന്നു. ഇത് ശരീരഭാരം നിയന്ത്രിക്കാന്‍ സഹായിക്കുന്നു. തുളസിയിലെ സംയുക്തങ്ങള്‍ ഉപാപചയ പ്രവര്‍ത്തനങ്ങളെ മെച്ചപ്പെടുത്തുന്നതിനാല്‍ അത് കൂടുതല്‍ കലോറി നഷ്ടപ്പെടുത്താനും സഹായിക്കുന്നു.
(ശ്രദ്ധിക്കുക: ആരോഗ്യ വിദഗ്ധന്റെയോ ന്യൂട്രീഷനിസ്റ്റിന്റെയോ ഉപദേശം തേടിയശേഷം മാത്രം ഭക്ഷണക്രമത്തില്‍ മാറ്റം വരുത്തുക)
Content Highlights: Discover the amazing health benefits of Tulsi (Holy Basil) water