തേൻ മാത്രമല്ല; ചെളിയും ചാണകവും മൂത്രവും രുചിക്കും; കാഷ്ഠം തേടിയെത്തും; പൂമ്പാറ്റയല്ല ചെളിപ്പാറ്റ

ഒരുവിധം എല്ലാ മനുഷ്യർക്കും ഇഷ്ടമുള്ള ഏകപ്രാണിയാണല്ലോ പൂമ്പാറ്റകൾ. ലെപിഡോപ്റ്റെറ ഓർഡറിൽ പെട്ട ഇവർ നിശാശലഭങ്ങളിൽ നിന്ന് ദശലക്ഷക്കണക്കിന് വർഷം മുമ്പ് വേർതിരിഞ്ഞുണ്ടായവരാണ്. സപുഷ്പി സസ്യങ്ങൾ പരിണമിച്ചുണ്ടായ കാലത്തുകൂടെ പരിണമിച്ചുണ്ടായവർ. പലതരം സാഹചര്യങ്ങളിൽ പലതരം അനുകൂലനങ്ങൾ ആർജിച്ച് പല രൂപത്തിലും ആകൃതിയിലും പരിണമിച്ച് ആയിരക്കണക്കിന് ഇനങ്ങളായി ലോകം നിറയെ പറന്നു നടക്കുന്നു.

പൂക്കളെക്കുറിച്ച് ആര് പാട്ടെഴുതിയാലും കവിതയെഴുതിയാലും കൂടെ പൂമ്പാറ്റയും കാണും. ആളൊരു വർണവിസ്മയം കൂടിയായതിനാൽ ചിത്രശലഭമെന്നും നമ്മൾ വിളിക്കുന്നു. പൂക്കളിലെ തേൻ നുകർന്ന്  ആരെയും ഉപദ്രവിക്കാതെ പാറിപ്പറന്ന് നടക്കുന്ന ശുദ്ധരും വൃത്തിയുള്ളവരുമായ സാത്വികജന്മം എന്നാണ് പൂമ്പാറ്റകളെക്കുറിച്ചുള്ള കവികളുടെ സങ്കൽപ്പം. എന്നാൽ, തേൻ മാത്രമല്ല ഇവയുടെ ഇഷ്ടഭക്ഷണം. പല വൃത്തികെട്ട സാധനത്തിലും പോയിരിക്കുന്നതും രുചിയോടെ ആൺപൂമ്പാറ്റകൾ അത് വലിച്ച് കുടിച്ച് രുചിക്കുന്നതും കാണാനാകും. 

Content Highlights: Bandhukkal Mithrangal Column by Vijayakumar Blathur on Keralas Butterfly Migration