മരച്ചീനി, തക്കാളി, വാളൻപുളി, കൈതച്ചക്ക; എല്ലാം വിദേശി, ഒപ്പം വന്നത് കീടങ്ങളും രോഗങ്ങളും | Bio talks
കാട്ടില്നിന്ന് ആഹാരം ശേഖരിച്ചും വേട്ടയാടിയും ജീവിച്ചുപോന്ന മനുഷ്യന് കൃഷി തുടങ്ങേണ്ടി വന്നത് ഏകദേശം 10,000 വര്ഷങ്ങള്ക്ക് മുമ്പെപ്പോഴോ ആയിരിക്കാമെന്നാണ് പണ്ഡിതമതം. ജനപ്പെരുപ്പവും സ്വാഭാവിക പ്രകൃതിയിൽ നിന്നുള്ള ഭക്ഷ്യവസ്തുക്കളുടെ കുറവും ആഹാരത്തിന് പുതിയ മാര്ഗ്ഗങ്ങൾ കണ്ടെത്തിയേ കഴിയൂ എന്ന അവസ്ഥയിലേക്ക് നയിക്കുകയും അത് കൃഷിയുടെ കണ്ടുപിടുത്തത്തിൽ കലാശിക്കുകയും ചെയ്തുവെന്നാണ് വിശ്വസിക്കുന്നത്. മനുഷ്യന് ഏതാണ്ട് ഒരേ കാലഘട്ടത്തിൽ ലോകത്തിന്റെ പല ഭാഗങ്ങളിലായി കൃഷി തുടങ്ങിയെന്നാണ് കരുതുന്നത്. ഒരിടത്ത് ഗോതമ്പായിരുന്നെങ്കിൽ മറ്റൊരിടത്ത് നെല്ല്, വേറൊരിടത്ത് കിഴങ്ങുകൾ എന്നിങ്ങനെ. തദനുസൃതമായി വിവിധ ആഹാരരീതികള് പിന്തുടരുന്ന സംസ്കാരങ്ങളും ഉടലെടുത്തു
ഓരോ സമൂഹവും തുടര്ന്നു വരുന്ന കൃഷിരീതികളും ആഹാരരീതികളും അവരുടെ സംസ്കാരത്തെ സ്വാധീനിച്ചതായി കാണാം. കാലാന്തരത്തില് വിവിധ സംസ്കാരങ്ങൾ കാര്ഷിക വിളകളെയും കാര്ഷിക സാങ്കേതിക നേട്ടങ്ങളെയും പരസ്പരം കൈമാറ്റം ചെയ്യാനാരംഭിച്ചതോടെ കാര്ഷിക വ്യവസ്ഥകളിൽ വന്മാറ്റങ്ങൾ ദൃശ്യമായി. കാലാവസ്ഥയുടെ സമാനസ്വഭാവം ഇക്കാര്യത്തില് പ്രധാന പങ്കുവഹിച്ചതായും മനസ്സിലാകും. ചരിത്രത്തില് നടന്നിട്ടുള്ള പല കുടിയേറ്റങ്ങളും പലായനങ്ങളും ഇത്തരം കാർഷിക വിനിമയങ്ങള്ക്ക് ആക്കം കൂട്ടിയിട്ടുണ്ട്. ക്രിസ്റ്റഫര് കൊളമ്പസ് അമേരിക്കൻ ഭൂഖത്തിൽ എത്തുന്നത്(1492) കാര്ഷിക സാംസ്കാരിക വിനിമയത്തിലെ വലിയൊരു നാഴികക്കല്ലാണ്. അമേരിക്ക, ആസ്ട്രേലിയ തുടങ്ങിയ രാജ്യങ്ങളെയാണല്ലോ "പുതിയ ലോകം" എന്നു വിളിക്കുന്നത്. ഈ "പുതിയ ലോകവും" "പഴയ ലോകവും" തമ്മില് ഏകദേശം 1800-ഓളം വിളകൾ കൊളമ്പസ്സിനു ശേഷം അന്യോന്യം വിനിമയം ചെയ്യപ്പെട്ടതായി കണക്കാക്കുന്നു.
Content Highlights: Global Travel and Culture of Agricultural Crops, Bio Talks