UG പുനഃപരീക്ഷ; ഉത്തരക്കടലാസ് സമർപ്പിക്കുന്നതുവരെ ശ്രദ്ധിക്കേണ്ട കാര്യങ്ങൾ എന്തെല്ലാം ?

ജൂൺ 21-ന് നടക്കാനിരിക്കുന്ന നീറ്റ് യു.ജി. 2026 പുനഃപരീക്ഷ സുതാര്യവും സുരക്ഷിതവുമാക്കാൻ കർശനമായ നടപടികളാണ് നാഷണൽ ടെസ്റ്റിങ് ഏജൻസി സ്വീകരിച്ചിരിക്കുന്നത്. പരീക്ഷാകേന്ദ്രങ്ങളിൽ പ്രവേശിക്കുന്നതുമുതൽ ഉത്തരക്കടലാസ് സമർപ്പിക്കുന്നതുവരെ ശ്രദ്ധിക്കേണ്ട കാര്യങ്ങൾ അറിയാം.

അഡ്മിറ്റ് കാർഡ്

• അഡ്മിറ്റ് കാർഡ് neet.nta.nic.in വഴി ഡൗൺലോഡ് ചെയ്യാം. ഇതിലെ പേര്, ഫോട്ടോ, പരീക്ഷാകേന്ദ്രം എന്നിവ കൃത്യമാണെന്ന് ഉറപ്പുവരുത്തുക. എന്തെങ്കിലും പിശകുണ്ടെങ്കിൽ എൻ.ടി.എ. ഹെൽപ്പ് ലൈൻ നമ്പറായ 011-40759000 ൽ ബന്ധപ്പെടുക. അഡ്മിറ്റ് കാർഡിൽ രേഖപ്പെടുത്തിയ വിവരങ്ങളിൽ മാറ്റംവരുത്തരുത്.
• ഡൗൺലോഡ് ചെയ്യുന്നതിനുമുൻപായി പരീക്ഷാഫീസ് റീഫണ്ട് ലഭിക്കുന്നതിനായി ബാങ്ക് അക്കൗണ്ട് വിവരങ്ങൾ പരിശോധിക്കുകയും ആവശ്യമെങ്കിൽ പുതുക്കുകയും വേണം. ഇതിനായി രജിസ്റ്റർചെയ്ത മൊബൈൽ നമ്പറിൽ ലഭിക്കുന്ന ഒ.ടി.പി. വഴിയുള്ള ടു-ഫാക്ടർ ഓതന്റിക്കേഷൻ നിർബന്ധമാണ്.
• അപേക്ഷയിൽ നൽകിയ ഫോട്ടോതന്നെ അഡ്മിറ്റ് കാർഡിൽ പതിപ്പിക്കണം. കൂടാതെ, 4x6 വലിപ്പമുള്ള പോസ്റ്റ് കാർഡ് സൈസ് ഫോട്ടോ അഡ്മിറ്റ് കാർഡിനൊപ്പമുള്ള പ്രൊഫോർമയിൽ പതിപ്പിക്കണം. ഹാജർപ്പട്ടികയിൽ ഒട്ടിക്കാൻ ഒരു പാസ്പോർട്ട് സൈസ് ഫോട്ടോ കൈയിൽ കരുതുക.
• അഡ്‌മിറ്റ് കാർഡിലെ നിർദേശങ്ങളും ഇൻഫർമേഷൻ ബുള്ളറ്റിനിലെ നിബന്ധനകളും വായിച്ചുമനസ്സിലാക്കണം
• ഒപ്പും വിരലടയാളവും പരീക്ഷാഹാളിൽ ഇൻവിജിലേറ്ററുടെ സാന്നിധ്യത്തിൽമാത്രം ചെയ്യുക

പരീക്ഷാസമയം

• പരീക്ഷാസമയം 195 മിനിറ്റായി വർധിപ്പിച്ചു. ഉച്ചയ്ക്ക് രണ്ടിന് ആരംഭിച്ച് 5.15-നാണ് പരീക്ഷ അവസാനിക്കുക. അധികസമയം ഇൻവിജിലേറ്ററുടെ നടപടികൾക്കും അറ്റൻഡൻസ് ഒപ്പിടുന്നതിനും ഉപയോഗിക്കാം.
• ചോദ്യപ്പേപ്പർ ബുക്ക്‌ലെറ്റിൽ റഫ് വർക്കിനായി നേരത്തേ ഉണ്ടായിരുന്ന രണ്ട് പേജുകൾക്കുപകരം ഇനി നാലുപേജുകൾ ലഭിക്കും. ഇതിൽ രണ്ടുപേജുകൾ ബുക്ക്‌ലെറ്റിന്റെ തുടക്കത്തിലും (നിർദേശങ്ങൾ കഴിഞ്ഞ ഉടൻ), മറ്റുരണ്ട് പേജുകൾ അവസാനഭാഗത്തും. പരീക്ഷാകേന്ദ്രത്തിലെ അച്ചടക്കവും ഡ്രസ് കോഡും
• വലിയ ബട്ടണുകൾ, എംബ്രോയ്ഡറി വർക്കുകൾ, അധികം പോക്കറ്റുകൾ എന്നിവയില്ലാത്ത ലളിതമായ ഹാഫ് സ്ലീവ് (പകുതി കൈയുള്ള) വസ്ത്രങ്ങൾ ധരിക്കുക. ഷൂസുകൾ ഉപയോഗിക്കരുത്. ലളിതമായ ചെരിപ്പുകൾ അല്ലെങ്കിൽ ഹീൽ കുറഞ്ഞ സാൻഡലുകൾ ഉപയോഗിക്കാം.
• ആഭരണങ്ങൾ: ലോഹവസ്തുക്കളായ മാല, കമ്മൽ, മൂക്കുത്തി, വളകൾ, വാച്ച് എന്നിവ ഒഴിവാക്കുക. ആചാരപരമായ വസ്ത്രങ്ങൾ ധരിക്കുന്നവർ പരിശോധനയ്ക്കായി 12.30-ന് മുൻപെങ്കിലും പരീക്ഷാകേന്ദ്രത്തിൽ റിപ്പോർട്ട് ചെയ്യണം.
• പേന പരീക്ഷാകേന്ദ്രത്തിൽനിന്ന് നൽകും

പരീക്ഷാഹാളിലെ നടപടിക്രമങ്ങൾ

• കേന്ദ്രത്തിൽ പ്രവേശിക്കുന്നതിന് മുൻപ് മെറ്റൽ ഡിറ്റക്ടർ ഉപയോഗിച്ചുള്ള ശാരീരിക പരിശോധനയും ബയോമെട്രിക് ഹാജർ രേഖപ്പെടുത്തലും നിർബന്ധമാണ്. ബയോമെട്രിക് സാങ്കേതികതടസ്സങ്ങൾ നേരിട്ടാൽ പരിഭ്രമിക്കേണ്ട; കേന്ദ്രത്തിൽ നൽകുന്ന സത്യവാങ്മൂലം നൽകിയാൽ മതിയാകും.
• പരീക്ഷാഹാൾ സി.സി.ടി.വി. നിരീക്ഷണത്തിലും വീഡിയോ റെക്കോഡിങ്ങിലും ആയിരിക്കും. അതിനാൽ ക്യാമറയ്ക്ക് അഭിമുഖമായി ഇരിക്കാൻ ശ്രദ്ധിക്കുക.
• നിരീക്ഷകന്റെ നിർദേശങ്ങൾ അനുസരിച്ചുമാത്രം പ്രവർത്തിക്കുക. റോൾനമ്പർ പ്രകാരമുള്ള സീറ്റിൽമാത്രം ഇരിക്കുക.

ഹാളിൽ കൊണ്ടുപോകാവുന്നവ

• ഫോട്ടോ പതിപ്പിച്ച അഡ്മിറ്റ് കാർഡിന്റെ മൂന്ന് പേജുകളുടെയും പ്രിന്റൗട്ട് (A4 പേപ്പറിൽ)
• ഹാജർപട്ടികയിൽ പതിപ്പിക്കാൻ ഓൺലൈൻ അപേക്ഷയിൽ നൽകിയ അതേ പാസ്പോർട്ട് സൈസ് ഫോട്ടോ
• ഒരു പോസ്റ്റ് കാർഡ് സൈസ് (4X6) കളർ ഫോട്ടോ (അഡ്മിറ്റ് കാർഡിനൊപ്പമുള്ള പ്രൊഫോർമയിൽ പതിപ്പിക്കാൻ).
• സർക്കാർ അംഗീകൃത ഒറിജിനൽ തിരിച്ചറിയൽ രേഖ (ഉദാ: ആധാർ കാർഡ്, പാൻകാർഡ്, ഡ്രൈവിങ് ലൈസൻസ്, വോട്ടർ ഐ.ഡി. തുടങ്ങിയവ).
• പി.ഡബ്ള്യു.ബി.ഡി. വിഭാഗക്കാർക്ക് ബന്ധപ്പെട്ട സർട്ടിഫിക്കറ്റ്.
• സുതാര്യമായ കുപ്പിയിൽ കുടിവെള്ളം
• ശ്രദ്ധിക്കുക: പേന പരീക്ഷാഹാളിൽനിന്ന്‌ നൽകും

ഹാളിൽ നിരോധിച്ചിട്ടുള്ള വസ്തുക്കൾ

• മൊബൈൽ ഫോൺ, ബ്ലൂടൂത്ത് ഉപകരണങ്ങൾ, സ്മാർട്ട് വാച്ചുകൾ, മറ്റ് ഇലക്ട്രോണിക് ഗാഡ്‌ജെറ്റുകൾ
• പേന, സ്കെയിൽ, പെൻസിൽ ബോക്സ്, കാൽക്കുലേറ്റർ
• വാലറ്റ്, ബെൽറ്റ്, തൊപ്പി, ആഭരണങ്ങൾ, ലോഹനിർമിതമായ മറ്റ് വസ്തുക്കൾ
• കുടിവെള്ളം ഉൾപ്പെടെയുള്ള ഭക്ഷ്യവസ്തുക്കൾ. എന്നാൽ, പ്രമേഹരോഗികൾക്ക് മുൻകൂർ അനുമതിയോടെ പഴങ്ങൾ കരുതാം.

Content Highlights: The National Testing Agency has announced strict guidelines for the NEET UG 2026 re-examination on June 21. The exam duration is increased to 195 minutes, and candidates must adhere to specific biometric, identification, and dress code mandates.