നീറ്റ് യുജി 2025 കൗണ്‍സിലിങ്: ഒന്നാം റൗണ്ട് രജിസ്ട്രേഷന് നടപടികള്‍ ആരംഭിച്ചു
നീറ്റ് യുജി 2025 കൗണ്‍സലിങ്ങിന്റെ ഒന്നാം റൗണ്ടിനായുള്ള രജിസ്ട്രേഷന് നടപടികള്‍ ആരംഭിച്ചു. മെഡിക്കല്‍ പ്രവേശന പരീക്ഷയില്‍ യോഗ്യത നേടിയവര്‍ക്ക് ഔദ്യോഗിക വെബ്‌സൈറ്റായ mcc.nic.in സന്ദര്‍ശിച്ച് കൗണ്‍സലിങ്ങിനായി രജിസ്റ്റര്‍ ചെയ്യാവുന്നതാണ്.
കൗണ്‍സലിങ് നാല് റൗണ്ടുകളിലായാണ് നടത്തുക. നടപടിക്രമങ്ങള്‍ സമയബന്ധിതമായി പൂര്‍ത്തിയാക്കുന്നതിനായി, പങ്കെടുക്കുന്ന എല്ലാ സ്ഥാപനങ്ങളും ശനി, ഞായര്‍, പൊതു അവധി ദിവസങ്ങള്‍ പ്രവൃത്തി ദിവസങ്ങളായി കണക്കാക്കണമെന്ന് നിര്‍ദ്ദേശം നല്‍കിയിട്ടുണ്ട്.
നിലവില്‍ ലഭ്യമായ വിവരങ്ങള്‍ അനുസരിച്ച്
റൗണ്ട് 1 പ്രധാന തീയതികള്‍
- രജിസ്ട്രേഷനും ഫീസ് അടയ്ക്കലും ജൂലൈ 21 മുതല്‍ 28 വരെ. അവസാന ദിവസം ഉച്ചകഴിഞ്ഞ് 3 മണി വരെയാണ് സമയം.
- ചോയ്സ് ഫില്ലിങ് ജൂലൈ 22 മുതല്‍ 28 വരെ, രാത്രി 11:55 വരെ ചെയ്യാം.
- ചോയ്സ് ലോക്കിങ് ജൂലൈ 28 ന് വൈകുന്നേരം 4 മണി മുതല്‍ രാത്രി 11:55 വരെ ലഭ്യമാകും.
- സീറ്റ് അലോട്ട്‌മെന്റ് പ്രക്രിയ ജൂലൈ 29, 30 തീയതികളില്‍ നടക്കും.
- അലോട്ട്‌മെന്റ് ഫലം ജൂലൈ 31-ന് പ്രഖ്യാപിക്കും.
- സീറ്റ് ലഭിച്ച ഉദ്യോഗാര്‍ത്ഥികള്‍ ഓഗസ്റ്റ് 1 നും 6 നും ഇടയില്‍ അനുവദിച്ച സ്ഥാപനങ്ങളില്‍ റിപ്പോര്‍ട്ട് ചെയ്യുകയോ ചേരുകയോ ചെയ്യണം.
- സ്ഥാപനങ്ങള്‍ ഓഗസ്റ്റ് 7 മുതല്‍ 8 വരെ ഡാറ്റ പരിശോധിക്കും.
രജിസ്ട്രേഷന് നടപടിക്രമം
- ഔദ്യോഗിക വെബ്‌സൈറ്റായ mcc.nic.in സന്ദര്‍ശിക്കുക.
- ഹോംപേജിലുള്ള 'യുജി മെഡിക്കല്‍ കൗണ്‍സലിങ്' ടാബില്‍ ക്ലിക്ക് ചെയ്യുക.
- നീറ്റ് യുജി 2025 രജിസ്ട്രേഷന് ലിങ്ക് തിരഞ്ഞെടുക്കുക.
- ആവശ്യമായ വ്യക്തിഗത വിവരങ്ങള്‍ പൂരിപ്പിക്കുക, ഒരു സുരക്ഷിത പാസ്‌വേഡ്‌ സജ്ജമാക്കുക, രജിസ്ട്രേഷന് ഫോം പൂര്‍ത്തിയാക്കുക.
- ബാധകമായ രജിസ്ട്രേഷന് ഫീസ് അടയ്ക്കുക, സ്ഥിരീകരണ പേജിന്റെ ഒരു പകര്‍പ്പ് സൂക്ഷിക്കുക.
- പൂര്‍ത്തിയാക്കിയ കൗണ്‍സലിങ് ഫോം ഡൗണ്‍ലോഡ് ചെയ്ത് ഒരു പകര്‍പ്പ് പ്രിന്റ് എടുത്ത് സൂക്ഷിക്കുക
റൗണ്ട് 2 ഷെഡ്യൂള്‍
- ഈ റൗണ്ടിലെ രജിസ്ട്രേഷനും ഫീസ് അടയ്ക്കലും ഓഗസ്റ്റ് 12 മുതല്‍ 18 വരെ ചെയ്യാം, അവസാന പേയ്മെന്റ് സമയം ഉച്ചകഴിഞ്ഞ് 3 മണിയാണ്.
- ഉദ്യോഗാര്‍ത്ഥികള്‍ക്ക് ഓഗസ്റ്റ് 13 നും 18 നും ഇടയില്‍, രാത്രി 11:55 വരെ ചോയിസുകള്‍ പൂരിപ്പിക്കാം.
- ചോയ്സ് ലോക്കിംഗ് ഓഗസ്റ്റ് 18 ന് വൈകുന്നേരം 4 മണി മുതല്‍ രാത്രി 11:55 വരെ പ്രവര്‍ത്തനക്ഷമമാകും.
- സീറ്റ് അലോട്ട്‌മെന്റ് ഓഗസ്റ്റ് 19, 20 തീയതികളില്‍ നടക്കും.
- അലോട്ട്‌മെന്റ് ഫലം ഓഗസ്റ്റ് 21-ന് പ്രഖ്യാപിക്കും.
- റിപ്പോര്‍ട്ടിങ്ങും ജോയിനിങ്ങും ഓഗസ്റ്റ് 22 നും 29 നും ഇടയില്‍ നടക്കും.
- സ്ഥാപനങ്ങള്‍ ഓഗസ്റ്റ് 30 മുതല്‍ സെപ്റ്റംബര്‍ 1 വരെ ഉദ്യോഗാര്‍ത്ഥികളുടെ ഡാറ്റ പരിശോധിക്കും.
റൗണ്ട് 3
- സീറ്റ് മാട്രിക്‌സ് വെരിഫിക്കേഷന്‍ സെപ്റ്റംബര്‍ 2-ന് നടക്കും.
- രജിസ്ട്രേഷന്, പേയ്മെന്റ്, ചോയ്സ് ഫിലിങ് എന്നിവ സെപ്റ്റംബര്‍ 3 മുതല്‍ 8 വരെ തുറന്നിരിക്കും. അവസാന ദിവസം ഉച്ചകഴിഞ്ഞ് 3 മണി വരെ പേയ്മെന്റ് സ്വീകരിക്കും.
- ചോയ്സ് ലോക്കിങ് സെപ്റ്റംബര്‍ 8 ന് വൈകുന്നേരം 4 മണി മുതല്‍ രാത്രി 11:55 വരെ നടക്കും.
- സീറ്റ് അലോട്ട്‌മെന്റ് സെപ്റ്റംബര്‍ 9, 10 തീയതികളില്‍ നടക്കും.
- ഫലം സെപ്റ്റംബര്‍ 11-ന് പ്രസിദ്ധീകരിക്കും.
- റിപ്പോര്‍ട്ടിങ് അല്ലെങ്കില്‍ ജോയിനിങ് സെപ്റ്റംബര്‍ 12 നും 18 നും ഇടയില്‍ പൂര്‍ത്തിയാക്കണം.
- സ്ഥാപനങ്ങള്‍ സെപ്റ്റംബര്‍ 19 മുതല്‍ 21 വരെ ഡാറ്റ വെരിഫിക്കേഷന്‍ നടത്തും.
സ്‌ട്രേ വേക്കന്‍സി റൗണ്ട്
- ഈ റൗണ്ടിനായുള്ള സീറ്റ് മാട്രിക്‌സ് വെരിഫിക്കേഷന്‍ സെപ്റ്റംബര്‍ 22-ന് നടക്കും.
- രജിസ്ട്രേഷനും ഫീസ് അടയ്ക്കലും സെപ്റ്റംബര്‍ 22 മുതല്‍ 24 വരെ തുറന്നിരിക്കും, അവസാന പേയ്മെന്റ് വൈകുന്നേരം 6 മണി വരെ അനുവദനീയമാണ്.
- ചോയ്സ് ഫില്ലിങ് സെപ്റ്റംബര്‍ 25 രാവിലെ 8 മണി വരെ അനുവദിക്കും.
- ചോയ്സ് ലോക്കിങ് സെപ്റ്റംബര്‍ 24 രാത്രി 8 മണി മുതല്‍ സെപ്റ്റംബര്‍ 25 രാവിലെ 8 മണി വരെ പ്രവര്‍ത്തനക്ഷമമാകും.
- സീറ്റ് അലോട്ട്‌മെന്റ് സെപ്റ്റംബര്‍ 25, 26 തീയതികളില്‍ നടക്കും.
- അലോട്ട്‌മെന്റ് ഫലം സെപ്റ്റംബര്‍ 27-ന് പ്രഖ്യാപിക്കും.
- ഉദ്യോഗാര്‍ത്ഥികള്‍ സെപ്റ്റംബര്‍ 27 നും ഒക്ടോബര്‍ 3 നും ഇടയില്‍ സ്ഥാപനങ്ങളില്‍ റിപ്പോര്‍ട്ട് ചെയ്യുകയോ ചേരുകയോ ചെയ്യണം.
രാജ്യത്തുടനീളമുള്ള സര്‍ക്കാര്‍ മെഡിക്കല്‍, ഡെന്റല്‍ സ്ഥാപനങ്ങളിലെ 15% ഓള്‍ ഇന്ത്യ ക്വാട്ട (എഐക്യു) പ്രകാരമുള്ള എംബിബിഎസ്, ബിഡിഎസ്, മറ്റ് അനുബന്ധ മെഡിക്കല്‍ കോഴ്‌സുകളിലേക്കുള്ള പ്രവേശനത്തിനായാണ് ഈ കൗണ്‍സലിങ് നടത്തുന്നത്. ശേഷിക്കുന്ന 85% സീറ്റുകളിലേക്കുള്ള കൗണ്‍സലിങ് സംസ്ഥാന തലത്തില്‍ അതത് അധികാരികളാണ് നടത്തുന്നത്. അവര്‍ നീറ്റ് യുജി സ്‌കോറുകള്‍ തിരഞ്ഞെടുപ്പിന്റെ അടിസ്ഥാനമായി ഉപയോഗിക്കുന്നു. ഉത്തര്‍പ്രദേശ്, ജമ്മു കശ്മീര്‍, ജാര്‍ഖണ്ഡ്, പഞ്ചാബ്, അസം, തെലങ്കാന തുടങ്ങിയ സംസ്ഥാനങ്ങള്‍ അവരുടെ വ്യക്തിഗത കൗണ്‍സലിങ് റൗണ്ടുകള്‍ക്കായുള്ള രജിസ്ട്രേഷന് വിന്‍ഡോ ഇതിനകം തുറന്നിട്ടുണ്ട്.
Content Highlights: NEET UG 2025 Counselling: Round 1 Registration Open