കാണാമറയത്തെ കാമുകന് വേണ്ടി ബലി നല്കിയത് 10 വര്ഷങ്ങള്; ഒരു വല്ലാത്ത ചതിയുടെ കഥ
ഫെയ്സ്ബുക്കിലെ ഒരു ഫ്രണ്ട് റിക്വസ്റ്റ്.. അതായിരുന്നു എല്ലാറ്റിന്റെയും തുടക്കം. കീരത് അസി എന്ന യുവതിയുടെ ജീവിതം കീഴ്മേല് മറിയുന്നത് അവിടെ നിന്നാണ്. ഫെയ്സ്ബുക്കിലെ സൗഹൃദം പിന്നീട് പ്രണയമായി... എന്നാൽ, താന് സ്നേഹിക്കുന്ന വ്യക്തിയെ ഒന്ന് നേരില് കാണാന് അവര്ക്ക് കാത്തിരിക്കേണ്ടി വന്നത് പത്ത് വര്ഷങ്ങളാണ്. ഒടുവില് ഒരു സിനിമാക്കഥയെ വെല്ലുന്ന സംഭവങ്ങളാണ് കീരതിന്റെ ജീവിതത്തില് അരങ്ങേറിയത്.
ലണ്ടനിലാണ് കഥ നടക്കുന്നത്. ബ്രൈറ്റണിലെ ഒരു പബ്ബില് സുഹൃത്തുക്കള്ക്കൊപ്പം സമയം ചെലവിടുകയായിരുന്നു 29 കാരിയായ കീരത്. പാട്ടും നൃത്തവുമൊക്കെയായി എല്ലാവരും ആഘോഷത്തിലാണ്. അതിനിടെയാണ് പബ്ബിന്റെ പ്രധാനകവാടത്തിലൂടെ ഒരാള് പ്രവേശിക്കുന്നത് കീരതിന്റെ ശ്രദ്ധയില്പ്പെട്ടത്. ഏയ്... ഇയാളെ എനിക്ക് അറിയാമല്ലോ, ഇത് ബോബിയല്ലേ.. കഴിഞ്ഞ അഞ്ചു മാസമായി ഫെയ്സ്ബുക്കില് തന്നോട് സംസാരിക്കുന്ന ബോബി. മാസങ്ങള്ക്ക് മുന്പാണ് കീരതിന് ബോബിയുടെ ഫ്രണ്ട് റിക്വസ്റ്റ് ലഭിക്കുന്നത്. ബന്ധുവായ സിമ്രാൻ ബോഗലിന്റെ മുന്കാമുകന് ജെജെയുടെ സഹോദരനാണ് ബോബി. സിമ്രാനില് നിന്നാണ് ബോബിയെക്കുറിച്ച് കീരത് അറിയുന്നത്. അയാളൊരു കാര്ഡിയോളജിസ്റ്റാണ്. ഫെയ്സ്ബുക്കില് സുഹൃത്തുക്കളായതിനുശേഷം ബോബിയുമായി ഒരുപാട് സമയം ഓണ്ലൈനില് ചെലഴവഴിക്കാറുണ്ട് കീരത്. എന്തും തുറന്ന് പറയാനുള്ള ഒരു അടുപ്പം അയാളുമായി കീരതിനുണ്ടായിരുന്നു. എന്താ ഇവിടെ, ഞാന് കീരത് ആണ് എന്ന് പറഞ്ഞ് അവര് ബോബിയുടെ അരികിലേക്ക് ഓടിച്ചെന്നു. എന്നാല് കീരത് പ്രതീക്ഷിച്ചത് പോലെയായിരുന്നില്ല ബോബിയുടെ പ്രതികരണം. ഹായ് എന്ന് പറഞ്ഞുവെങ്കിലും ഒന്നും മനസ്സിലാകാത്തപോലെ അയാള് അല്പ്പനേരം മിഴിച്ചു നിന്നു. ഏതാനും സെക്കന്റുകള് മാത്രം നീണ്ട സംഭാഷണത്തിനുശേഷം കീരത് സുഹൃത്തുക്കള്ക്കരികിലേക്ക് നടന്നു. ബോബി എന്തുകൊണ്ട് നേരില് കണ്ടപ്പോള് തന്നോട് അടുപ്പം കാണിക്കുന്നില്ല എന്ന ചോദ്യം കീരതിനെ വല്ലാതെ അലട്ടി. ചിലപ്പോള് മദ്യപിച്ചത് കൊണ്ടായിരിക്കാം. അല്ലെങ്കില് മറ്റെന്തെങ്കിലും കാരണമായിരിക്കാം. നൂറ് ന്യായങ്ങള് നിരത്തി ആശ്വസിക്കാന് ശ്രമിച്ചിട്ടും കീരതിന്റെ മനസ്സിനെ ബോബിയുടെ പെരുമാറ്റം അലട്ടിക്കൊണ്ടേയിരുന്നു.
Content Highlights: How Radio presenter Kirat Assi was catfished for nine years, Fake account, Cyber safety