യുപിഐയോട് മോദി സർക്കാർ ചെയ്യുന്നത് | വഴിപോക്കൻ

ചൈനയേയും അമേരിക്കയേയും ഒരുപോലെ ഞെട്ടിച്ച കളിയാണ് ഇന്ത്യ യുപിഐ(unified payment interface)യിൽ കളിച്ചത്. പത്ത് വർഷം മുമ്പ് തുടങ്ങിയ ഈ നീക്കത്തിലൂടെ പണം കൈമാറുന്നതിൽ ഇന്ത്യ ഒരു വിപ്ലവംതന്നെ നടത്തി. അഞ്ച് പൈസയുടെ ചെലവില്ലാതെ സ്മാർട്ട് ഫോണിലൂടെ വ്യക്തിയിൽനിന്ന് വ്യക്തിയിലേക്കും കച്ചവട സ്ഥാപനങ്ങളിലേക്കും പണം ഒഴുകി. യുപിഐ വികസിപ്പിക്കുന്നതിന് ചുക്കാൻ പിടിച്ചത് നാഷനൽ പെയ്മെന്റ്സ് കോർപറേഷൻ ഒഫ് ഇന്ത്യ (എൻപിസിഐ) ആണ്. റിസർവ് ബാങ്ക് ഒഫ് ഇന്ത്യയും ഇന്ത്യൻ ബാങ്ക്സ് അസോസിയേഷനും ചേർന്നാണ് എൻപിസിഐക്ക്് രൂപം നൽകിയത്. യുപിഐ ഒരു പൊതുമേഖലാ സംരംഭം ആയിരുന്നുവെന്ന് ചുരുക്കം.

നന്ദൻ നിലേക്കനിയുടെ ആധാർ ടീമിൽ ഉണ്ടായിരുന്ന മലയാളി എഞ്ചിനീയർ ഡോ. പ്രമോദ് വർമ്മയായിരുന്നു യുപിഐയുടെ മുഖ്യശിൽപി. ആർക്കും കുത്തകയില്ലാത്ത സ്വതന്ത്രവും തുറന്നതുമായ ഒരു പ്ലാറ്റ്ഫോം എന്ന നിലയിലായിരുന്നു യുപിഐ വിഭാവനം ചെയ്തതെന്ന് പ്രമോദ് വർമ്മ പറയുകയുണ്ടായി. ഒരു റെയിൽ ട്രാക്കിനോടാണ് പ്രമോദ് വർമ്മ ഈ ഡിജിറ്റൽ പബ്ലിക് ഇൻഫ്രസ്ട്രക്ചറിനെ തുലനം ചെയ്തത്. അങ്ങിനെ വരുമ്പോൾ ജിപേയും ഫോൺപേയും ഈ ട്രാക്കിലൂടെ ഓടുന്ന ട്രെയിനുകളാണ്. നമ്മുടെ പണവും പണം അയക്കാനുള്ള അപേക്ഷകളുമാണ് യാത്രക്കാർ. ഈ യാത്രക്കാർ കയറുകയും ഇറങ്ങുകയും ചെയ്യുന്ന സ്റ്റേഷനുകളാണ് എസ്ബിഐ, എച്ഡിഎഫ്്സി തുടങ്ങിയ ബാങ്കുകൾ. വണ്ടികൾ എത്ര വേഗത്തിൽ ഓടണം, സുരക്ഷാ സംവിധാനങ്ങൾ എന്തൊക്കെ ആയിരിക്കണം എന്നിങ്ങനെയുള്ള നയപരമായ തീരുമാനങ്ങൾ എടുക്കുന്ന റെയിൽവെ ബോർഡാണ് എൻപിസിഐ.

Content Highlights: India's Unified Payment Interface (UPI) has revolutionized digital transactions, allowing seamless money transfers without fees, and is managed by the National Payments Corporation of India (NPCI). The Indian government introduced a new law imposing a Merchant Discount Rate (MDR) on transactions above ₹2,000, sparking criticism that it favors American companies dominating the UPI market. Despite UPI's success in promoting a cashless economy, concerns arise over potential future costs to consumers and the impact on India's economy, with opposition parties criticizing the government's alignment with foreign interests.